Дзэлыкъуэ куейм къикIыу

Къуажэхэр зэщIагъаблэ

Дзэлыкъуэ щIыналъэм и жылагъуэхэм я уэрамхэу, псори зэхэту километр 28-рэ хуэдиз я кIыхьагъыу, иджырей уэздыгъэхэмкIэ къызэщIагъэблэнущ. Абы хыхьэнущ Дзэлыкъуэкъуажэ, Светловодскэ, ЯтIэкъуэ, Бэтэх, Псынадахэ, Дзэлыкъуэдэс, Къармэхьэблэ къуажэхэр.

Иджырей уэздыгъэхэр падзэнущ гъуэгубгъухэм къыIут гъущI-бетон пкъоужьхэм, ахэр щычэм щIапIэхэм деж пкъоущIэхэр щагъэувынущ. Абы къыдэкIуэу, трансформаторхэмкIэ къуажэхэр къызэрагъэпэщынущ, электрокъарур зэрырикIуэ кIапсэхэр яукъуэдиинущ, плафоныщIэхэр падзэнущ.

Апхуэдэ щIыкIэкIэ, гъуэгум ущызэкIэщIэплъу щытынущ, пщыхьэщхьэкIэ гъуэгубгъухэм Iуту зекIуэ цIыхухэм я шынагъуэншагъэр къызэгъэпэща хъунущ, машинэ зэжьэхэуэхэми щахъумэнущ.

Пэрытхэм къахохъуэ

Дзэлыкъуэкъуажэ ЩанхабзэмкIэ и унэм иджыблагъэ гуфIэгъуэ зэхыхьэ щекIуэкIащ. Ар теухуауэ щытащ «Пэрытхэм я зэщIэгъэхъееныгъэ» щIыналъэ зэгухьэныгъэм и къудамэхэр куейм и Белокаменскэ, Шордакъ, ЯтIэкъуэ, Псынэдахэ, Бэтэх, Зольскэ, Совхознэ, Дзэлыкъуэдэс, Дженал жалагъуэхэм къыщызэIухыным.

ЗэIущIэм хэтахэм псалъэ гуапэкIэ зыхуагъэзащ щIыналъэ зэгухьэныгъэм и лIыкIуэхэу Мамсыр Руслан, Кугъуэт Оксанэ, «Сабиигъуэм и унэтIакIуэ» щIыпIэ сабий зэщIэхъееныгъэм и лэжьакIуэ Къущхьэ Залинэ сымэ.

 «Пэрытхэм я зэщIэхъееныгъэ» щIыналъэ зэгухьэныгъэм хагъэхьахэм тхьэрыIуэ псалъэхэр жаIащ, гуфIэгъуэ пшыхькIи зэхуэсыр зэхуащIыжащ.

Иджы, «Пэрытхэм я зэщIэхъееныгъэ» зэгухьэныгъэм и къудамэхэр Дзэлыкъуэ щIыналъэм и курыт еджапIэхэм къанэ щымыIэу щолажьэ.

Жылэхэр шахматымкIэ зэпоуэ

Дзэлыкъуэ щIыналъэм и жылагъуэхэм шахматымкIэ я зэхьэзэхуэ Сэрмакъ къуажэ и курыт еджапIэ №2-м иджыблагъэ щрагъэкIуэкIащ. Ар теухуат щытащ щIыналъэм хыхьэ къуажэхэм я щIыпIэ администрацэхэм я унафэщIхэм я Кубокыр къэхьыным. Зэхьэзэхуэм хэтащ къуажиблым я гупи 8, дэтхэнэри цIыхуищ хъууэ.

Зэпеуэм кърикIуахэр зэхалъхьэжа нэужь, япэ увыпIэмрэ Кубокымрэ иратащ Совхознэ жылагъуэм и командэм (Къаскъул Артур, Махуэ Рустам, Каскъул Ахьед), Дзэлыкъуэ къуажэр етIуанэщ (Куэт Хьэбил, Махуэ Заурбэч, Куэт Арсен), ещанэ увыпIэр къылъысащ Сэрмакъым (Хьэшкъул Юрэ, Дохъушокъуэ Толэ, Угъурлы Хьэмид).

Зэхьэзэхуэм къыщыхэжаныкIахэм иратащ медалхэмрэ щIыхь тхылъхэмрэ.

Адыгейм зыкъыщагъэлъагъуэ

Адыгей Республикэм Физкультурэмрэ спортымкIэ щIыхь зиIэ и лэжьакIуэ, СССР-м СпортымкIэ и мастер ЦIэIугъуафIэ Нурбий алыдж-урым бэнэкIэмкIэ и фэеплъ зэхьэзэхуэу Тохъутэмыкъуей щIыналъэм и «Нарт» спорт IуэхущIапIэм иджыблагъэ щекIуэкIам хэтащ КъБР-м и Дзэлыкъуэ куейм и гъэсэнхэр икIи ехъулIэныгъэхэр яIэу къагъэзэжащ.

Я хьэлъагъ елъытауэ ахэр щыбэна гупхэм япэ увыпIэр къыщахьащ Шыбзыхъуэ Ратмиррэ Къудащ Темырланрэ. Джэдмышх Имран, КIуэкIуэ Къантемыр, ЦIыпIынэ Ринат сымэ етIуанэ хъуахэщ. Домбеякъ медалхэр къахьащ БищIо Имран, Къардэн Идар, Къуий Хъусейн сымэ.

ТекIуауэ къагъэзэж

Урысей Федерацэм щIыхь зиIэ и тренер, Къэбэрдей-Балъкъэрым Физкультурэмрэ спортымкIэ щIыхь зиIэ и лэжьакIуэ Битокъу Нургъэлий алыдж-урым бэнэкIэмкIэ и фэеплъ зэхьэзэхуэ иджыблагъэ Тэрч къалэ щекIуэкIащ. Дзэлыкъуэ щIыналъэм и «Арена» спорт еджапIэм и гъэсэнхэр зэпеуэм ерыщу хэтащ икIи медаль зэхуэмыдэхэр абы къыщахьащ.

Бекъул Мурат (кг 55-рэ), Кумыщ Ислъам (кг 60), Къардэн Ибрэхьим (кг 110-рэ) сымэ япэ увыпIэм дэкIуеящ. ЛыфыщI Рустам (кг 60-рэ) етIуанэ хъуащ. Ещанэхэр Бекъул Темырлан (кг 42-рэ), Айнетдинов Рэмэзан (кг 55-рэ), ХъуэкIуэн Имран (кг 55-рэ), Лыджыдэ Имран (кг 65-рэ), ТIэхъу Идар (кг 29-рэ) сымэщ.

ЩIалэхэм я тренерхэр Темырчы Темырланрэ Елъчэпар Муратрэщ.