Къэбэрдей-Балъкъэрым ипэкIэ зэи къыщымыхъуауэ адыгэ бзылъхугъэ, пщащэ лъагъугъуафIэ, спортсмен бэлыхь Бекъул Миланэ, хьэлэмэтращи, адыгэ щIыналъэм - Адыгэ Республикэм щыIэу - тхэквондомкIэ (ВТФ, Олимп джэгухэм хыхьэ лIэужьыгъуэмкIэ) Урысей Федерацэм и чемпионату мы гъэм, Мейкъуапэ щекIуэкIам япэ увыпIэр къыщихьащ. Абы къыдэкIуэу тхэквондомкIэ дунейпсо классымкIэ спортым и мастер цIэ лъапIэри къыфIащащ, ари ди республикэм щыяпэу. Миланэ и ныбжькIэ щIалэ щхьэкIэ хузэфIэкIащ къэралым и командэ къыхэхам хыхьэн, икIи и хьэлъагъ елъытауэ зыкъыщигъэлъагъуэ килограмм 46-рэ хъу гупым я деж бжьыпэр УФ-м щиIыгъщ.
Адыгэ пщащэ цIыкIум тхэквондом щиIэ ехъулIэныгъэхэм уатепсэлъыхьын щIэбдзэмэ, зэрыжаIэу, махуэней пхутегъэкIуэдэнущ. Медалрэ кубокыу Миланэ иIэр щэ бжыгъэм зэрынэхьэсащ. Адрей илъэс блэкIахэмкIэ умыIэбэжу, мы гъэ къудейм дунейпсо утыкушхуэхэм абы щыхузэфIэкIахэр къыхэбгъэщмэ, Африкэм щыIэ Сенегал къэралым и къалащхьэ Даккар бадзэуэгъуэм щекIуэкIа «Гран-при» зэхьэзэхуэм япэ увыпIэр къыщихьащ. Абы иужькIэ екIуу хэтащ Франджым и къалащхьэ Париж и «Гран-при» зэпеуэм, иужькIэ Мейкъуапэ щекIуэкIа УФ-м и чемпионатым щытекIуащ, а псом ищIыIужкIэ, щэкIуэгъуэ мазэм, къэралым и командэ къыхэхам хэту Белоруссием и «Кубок зэIухам» япэ щыхъуащ.
Езы хъыджэбз IэмащIэ-лъэмащIэ цIыкIур щыплъагъукIэ, апхуэдэ къарурэ ерыщагърэ абы къыкъуэкIыну уи фIэщ пхуэщIыркъым. Зэхьэзэхуэхэм Миланэ къыщыпэщIэтхэр зы щхьэкIэ нэхъ лъагэщ, ауэ абы щхьэкIэ къэмынэу зэкIэлъхьэужьыу ахэр трегъэкIуэт. Европей къэралхэм «танк цIыкIу» къыхужаIэ Миланэ, абы и зэфIэкIыр здынэсыр ящIэри.
Тхэквондом зэрыхыхьам, а спорт лIэужьыгъуэр къыщIыхихам теухуауэ Миланэ жеIэ: «Илъэсибл сыщыхъум сэ сщIэрт ар зищIысыр. Зэгуэрым телевизорымкIэ сеплъат зэхьэзэхуэр зэрекIуэкIым икIи къызгурыIуащ сэ абы нэмыщI нэгъуэщI спорт лIэужьыгъуэкIэ зызгъэсэну сызэрыхуэмейр. Къафэми, художественнэ гимнастикэми сахуеплъэкIыжакъым абы иужькIэ. Мурад сщIащ тхэквондом ехъулIэныгъэхэр щызыIэрызгъэхьэну. СыщIэхъуэпсырт утыкушхуэм ситу си цIэкIэ къэрал гимныр къеуэу зэхэсхыну», - жеIэ Миланэ.
ЗригъэхъулIащ адыгэ пщащэ цIыкIум и хъуэпсапIэр: абы и щIыхькIэ утыкушхуэ Iэджэми мызэ-мытIэу къыщеуащ къэралым и гимныр. Илъэс зыбжанэкIэ узэIэбэкIыжмэ, Европэм пашэныгъэр къыщыхьыным хуэунэтIауэ Испанием щекIуэкIа зэхьэзэхуэм япэ увыпIэр щиубыда нэужь, Миланэ жиIат, сыт хуэдэ лъагапIэми удэкIуеинри зэрыгухэхъуэр, ауэ езым и плъапIэ нэхъыщхьэу щытыр къэралым и командэ къыхэхам хэхуэныр, Олимп джэгухэм хэтыныр зэрыарар.
Миланэ иджыпсту зыщегъасэ республикэм и Кенжэ къуажэм дэт «Пять колец» спорт академием и тренер нэхъыщхьэ Ахъмэт Амир и деж. Тренер губзыгъэм, набдзэгубдзаплъэм, зи IэщIагъэм фIыуэ хэзыщIыкIым занщIэу гу къылъитат хъыджэбз цIыкIум. Ар япэу щилъэгъуам щыгъуэ, шэчи къытрихьатэкъым, ерыщу зигъасэу щытмэ, лъагапIэ нэхъ ин дыдэхэр Миланэ къызэрыхуэщтэнум, икIи щыуакъым.
«Тренерым и IэщIагъэм хищIыкIыу щытмэ, спортсменым дежкIэ ар ехъулIэныгъэшхуэщ. Ахъмэт Амир хуэдэ тренер гъуэтыгъуейщ. Ар цIыху хьэлэмэтщ икIи гъэсакIуэ Iэзэщ. Си фIэщ мэхъу абырэ сэрэ лъагапIэ куэд иджыри къызэрытхуэщтэнур», - жеIэ езы Милани.
Жагъуэ зэрыхъущи, иджыпсту къэралым къращIылIа дэкъузэныгъэхэм я Iэужьу, ди спортсменхэр хуиту утыку ихьэжыфыркъым, ауэ тхэквондомкIэ зызыгъасэхэм ар щхьэщахащ икIи абыхэм хуитыныгъэ къратащ зэхьэзэхуэхэм хэтыну.
Дыгугъэнщ Бекъул Миланэ и щIыхькIэ къэралым и гимныр Олимп джэгухэм я утыкум къыщеуэну, и тренер Ахъмэт Амиррэ езымрэ я хъуапсапIэр къайхъулIэну. Дэ тщIэращи, ар гукIи псэкIи абы хуэхьэзырщ, шэчи къытетхьэркъым, апхуэдэ Iэмал кърату щытмэ, ар зэрызригъэхъулIэнум.