КъБР-м и Парламентым и УнафэщI Егоровэ Татьянэ дыгъэгъазэм и 22-м зэхуищIыжащ республикэм и хабзэубзыху орган нэхъыщхьэм и бжьыхьэ лэжьэгъуэр. Иужьрей зэIущIэм депутатхэм етIуанэ еджэгъуэу къыщащтащ «КъБР-м и бюджетыр 2024 гъэм, 2025 - 2026 гъэхэм ятещIыхьауэ» КъБР-м и законым и проектыр.
КъБР-м финансхэмкIэ и министр Лисун Еленэ абы щытепсэлъыхьым жиIащ дэфтэрым и япэ еджэгъуэр щэкIуэгъуэм и 30-м къащтауэ зэрыщытар икIи абы зэхъуэкIыныгъэхэр зэрыхалъхьэжар. Ахэр ехьэлIащ сабийхэм защIэгъэкъуэным, гъуэгу ухуэныгъэхэм, къуажэхэр IэщIагъэлIхэмкIэ къызэгъэпэщыным, щыIэкIэ-псэукIэр егъэфIэкIуэным епха нэгъуэщI Iуэхухэри зэрагъэзэщIэнум хухах ахъшэм зэрыдыщIагъужым.
КъБР-м и Парламентым БюджетымкIэ, налогхэмрэ финанс IуэхухэмкIэ и комитетым и унафэщI АфэщIагъуэ Михаил жиIащ 2024 гъэм республикэм къилэжьымрэ къигъэсэбэпынумрэ хэхъуэ зэраIэнур. «Къыхэгъэщыпхъэщ щIыналъэм езым и хэхъуэхэр нэхъыбэ зэрыхъури. Бюджетым къыхалъытащ республикэм дежкIэ мыхьэнэшхуэ зиIэ ухуэныгъэхэр зэрызэфIагъэкIынури. Абыхэм ящыщщ лышх узыфэхэмкIэ сымаджэщыр, Мылылъэ уардэунэр, Театрхэм я уардэунэр, нэгъуэщI куэди, - жиIащ къэпсэлъам. - Къапщтэмэ, бюджетым и процент 70-м щIигъур соци-альнэ Iуэхуу хъуар республикэм зэригъэзэщIэнум тещIыхьащ. Дэфтэрым и етIуанэ еджэгъуэм къэдгъэлъэгъуа Iуэхугъуэ 24-ри абы хэдгъэхьащ. Узэрыгушхуэнщ курыт школхэр, сабий гъэсапIэхэр, поликлиникэхэмрэ амбулаторэхэмрэ зэгъэпэщыжынымрэ щIэхэр ухуэнымрэ етIанэгъэ зэрызэфIэдгъэкIынур. Псалъэм папщIэ, республикэм и школи 9 а Iуэхум хыхьэу и кIэм нагъэсынущ».
Депутатхэм зэIущIэм къыщащтащ «КъБР-м ФIэкIыпIэ зимыIэ медицинэ страхованиемкIэ и фондым и бюджетыр 2024 гъэм, 2025 - 2026 гъэхэм ятещIыхьауэ» КъБР-м и Законыр.
ЗэхъуэкIыныгъэхэр халъхьащ Хэхыныгъэхэмрэ референдумхэмрэ ятеухуа республикэ закон щхьэхуэхэм, «ГъущI гъуэгу, автомобиль, транспорткIэ цIыхухэм Iуэхутхьэбзэ зэрыхуащIэр къызэрызэрагъэпэщым теухуауэ», «КъБР-м и ЩIы кодексым и Iыхьэ 14-мрэ 17-мрэ зэхъуэкIыныгъэхэр хэлъхьэнымрэ КъБР-м унэ яухуэн папщIэ цIыху щхьэхуэхэм щIы Iыхьэ зэрыщратымрэ теухуауэ» КъБР-м и законхэм я проектхэм, нэгъуэщIхэми. КъБР-м щIы, мылъку IуэхухэмкIэ и министр Тохъу Аслъэн иужьрей законопроектым щытепсэлъыхьым жиIащ ар УФ-м и Президентым мэкъуауэгъуэм и 6-м къыдигъэкIа унафэм - Урысей Федерацэм и Лъэпкъ гвардием и дзэхэм, УФ-м IэщэкIэ ЗэщIэузэда и Къарухэм хэтхэм, контракткIэ къулыкъу щызыщIэхэм, зауэлIхэм къэралым зэрызащIигъакъуэ Iэмалхэм зегъэубгъуным теухуам - къыщыгъэлъэгъуахэр гъэзэщIэным ипкъ иткIэ зэрызэхагъэу-вар.
КъБР-м и Парламентыр 2024 гъэм зэлэжьынухэм щытепсэлъыхьым, Къэпщытэныгъэмрэ регламентымкIэ комитетым и унафэщI Кансаевэ Еленэ къыхигъэщащ къапэщылъ гъатхэ лэжьэгъуэм республикэм и хабзэубзыху орган нэхъыщхьэм и еханэ зэхыхьэгъуэм и лэжьыгъэр зэриухыр, абы къыхэкIыу Iуэхугъуэ куэд зэфIагъэкIыну зэрытраухуар.
КъБР-м и Парламентыр 2023 гъэм зэлэжьар зэIущIэм къыщызэщIикъуэжащ Егоровэ Татьянэ. Псом япэу абы къыхигъэщащ къэралыр иужьрей илъэсхэм зыхэт гъэунэхуныгъэщIэхэм емылъытауэ, республикэм и хабзэубзыху IуэхущIапIэр зэрыхущIэкъур щIыналъэм и къалэнхэр зэпIэзэрыту екIуэкIыным хуэгъэза Iуэхухэр къызэригъэпэщыным.
- Ди къалэн нэхъыщхьэхэм ящыщщ Украинэм щекIуэкI дзэ Iуэху хэхам хэтхэмрэ абыхэм я унагъуэхэмрэ защIэдгъэкъуэныр. Хэкур зыхъумэ ди щIалэхэм сыт и лъэныкъуэкIи дазэрыдэIэпыкъуным иужь дитщ. Псалъэм папщIэ, дэ къыхэтлъхьащ абыхэм я унагъуэхэр депутатхэм тегуэшауэ ди нэIэ зэрытетынур. Си фIэщ мэхъу а Iуэхум ахэр жэуаплыныгъэ яхэлъу зэрыбгъэдыхьэнур, - жиIащ Егоровэм. - 2023 гъэм и кIуэцIкIэ ди лэжьыгъэр зыхуэунэтIауэ щытар цIыхухэм я псэукIэр егъэфIэкIуэным теухуа хабзэхэр къэтщтэнырщ, апхуэдэуи УФ-м и Президентым УФ-м и Федеральнэ Зэхуэсым Зэрызыхуигъазэмрэ КъБР-м и Iэтащхьэр КъБР-м и Парламентым Зэрызыхуигъазэмрэ къыщыгъэлъэгъуахэр гъэзэщIэнырщ.
Гугъуехьхэм емылъытауэ, республикэм и бюджетыр 2024 гъэм зыхуэдэнур нобэ къэтщтащ икIи абы и Iыхьэ щанэм щIигъур егъэджэныгъэм, узыншагъэр хъумэнымкIэ IэнатIэм, социальнэ Iуэхухэм зэрызедгъэужьынум тещIыхьащ. КъБР-м и Парламентым и комитетхэм я зэIущIэхэм, Правительствэм хухэтх сыхьэтхэм дыщытопсэлъыхь щIыналъэм и туризмэр, спортыр, щэнхабзэр, гъуэгухэр, инвестицэ Iуэхухэр зэредгъэфIэкIуэну щIыкIэм. Къыхэзгъэщыну сыхуейт мы гъэм КъБР-м и Парламентыр илъэс 30 зэрырикъуар. Тхыдэ и лъэныкъуэкIэ ар бжыгъэшхуэкъым, арщхьэкIэ нобэ жытIэфыну къысщохъу республикэм парламентаризмэр лъэ быдэкIэ щыувауэ. КъБР-м и Iэтащхьэм и Iэ щIэлъу, абы епха Iуэхугъуэшхуэхэр къызэдгъэпэщащ. Гуманитар къэхутэныгъэхэмкIэ Къэбэрдей-Балъкъэр щIэныгъэ институтыр, Къэбэрдей-Балъкъэр къэрал университетыр ди гъусэу щIэныгъэ конференц ин едгъэкIуэкIащ, Урысейм ХудожествэхэмкIэ и академием и лIыкIуэхэм, Урысейм и юристхэм я зэгухьэныгъэм хэтхэм даIущIащ. Мыпхуэдэ Iуэхухэр псори ди лэжьыгъэм хуэщхьэпэ защIэщ. ФIыщIэ фхуэсщIыну сыхуейт жыджэру абыхэм хэта псоми. Шэч хэмылъу, ди нэIэ зытетыпхъэхэм ящыщщ ди нэхъыжьыфIхэр, ветеранхэр, тылым и лэжьакIуэхэр. Абы и щапхъэщ «ЛIыхъужьхэм я бынхэр» проектми дызэрыхэтыр. ЗэгурыIуэу, зы лъэныкъуэкIэ плъэфу зэдэлажьэ гупым нэхъыбэ къехъулIэну къызолъытэ. АдэкIи сыщогугъ нэхъыбэж тхузэфIэкIыну. ЕтIанэгъэ екIуэкIынущ Урысей Федерацэм и Президент хэхыныгъэхэр. Абы ди пашэ Путин Владимир хэтыну зыкъызэригъэлъэгъуам мыхьэнэшхуэ иIэщ. Къэралым щыIэ и Iуэху еплъыкIэхэр къэтлъытэу, абы и Iуэху нэхъ зэрыдэкIынум ди къару псори абы етхьэлIапхъэщ».
ЗэIущIэр, зэрыхабзэу, Урысеймрэ Къэбэрдей-Балъкъэрымрэ я къэрал гимнхэмкIэ зэхуащIыжащ.
