Спорт хъыбархэр

НыбжьыщIэхэр зэпоуэ

Дзэлыкъуэ щIыналъэм и «Победа» спорт комплексым иджыблагъэ щекIуэкIащ щIыналъэхэм дзюдомкIэ я зэхьэзэхуэ. Абы щызэпеуащ 2008-2016 гъэхэм къалъхуахэу Къэбэрдей-Балъкъэрым, Шэшэным, Къэрэшей-Шэрджэсым, Дагъыстэным, Осетие Ищхъэрэ – Аланием, Ингушым, Ставрополь крайм, Армением я спортсмен 500-м нэблагъэ, псори зэхэту команди 8 хъууэ.

КъБР-м и командэм хэту абы щыбэнащ Дзэлыкъуэ щIыналъэм и ныбжьыщIэхэри икIи ехъулIэныгъэфIхэр зыIэрагъэхьащ.

Я хьэлъагъ елъытауэ щыбэна гупхэм япэ щыхъуащ Кугъуэт Мурат (кг 66-рэ), Къардэн Нодар (кг 55-рэ), Емыш Дамир (кг 34-рэ), Къамбий Алихъан (кг 50), БищIо Даянэ (кг 29-рэ) сымэ. ЕтIуанэ хъуахэщ Бабыгуей Алинэ, (кг 44-рэ), Гындыгъу Исуф (кг 42-рэ), Емыш Даянэ (кг 52-рэ) сымэ. Теувэж Артур (кг 55-рэ), Гранов Артур (кг 26-рэ), Къанщауэ Даянэ (кг 40), Гындыгъу Астемыр (кг 73-рэ) сымэ ещанэ увыпIэр къахьащ.

                            Дзэлыкъуэ щIыналъэм и щIыхьыр яхъумэу

Прохладнэ щIыналъэм хыхьэ Къэрэгъэш къуажэм дэт спорт IуэхущIапIэм иджыблагъэ щекIуэкIащ бэнэкIэ хуитымкIэ зэхьэзэхуэ зэIуха. Ар щытащ дзэ Iуэху хэхам хэкIуэдахэм я фэеплъ зэIущIэу.

Зэхьэзэхуэм кърихьэлIат бэнакIуэ 300-м щIигъу. Абыхэм яхэтащ Дзэлыкъуэ куейм и «Арена» спорт еджапIэм и гъэсэнхэри икIи медаль зыбжанэ къахьащ. Псалъэм къыдэкIуэу, Наурыз Дамир япэ увыпIэр къихьащ килорамм 33-м щыбанэхэм я деж. ЕтIуанэ хъуащ БжэныкIэ Ренат (кг 52-рэ). Ещанэ увыпIэм дэкIуеящ Махуэ Ислъам (кг 25-рэ), Шыд Муса (28-рэ), Бжьахъуэ Рустам (кг 33-рэ), Пщыунэ Мартин (кг 35-рэ), Мамхэгъ Ашэмэз (кг 52-рэ), БжэныкIэ Астемыр (кг 60) сымэ.

Я зэфIэкIхэр ягъэлъагъуэ

Налшык къалэм иджыблагъэ щекIуэкIащ ныбжьыщIэхэм Араши каратэ (Арашидо) спорт лIэужьыгъуэмкIэ я щIыналъэ зэхьэзэхуэ. Абы хэтащ Бахъсэн щIыналъэм щыщ Жанхъуэтекъуэ жылэм и спортсмен цIыкIухэри.

Я хьэлъагърэ я ныбжьрэ елъытауэ зыхэта гупхэм япэ щыхъуащ ХьэцIыкIу Айдамиррэ (кг 35-рэ) Джаппуев Мансуррэ (кг 35-рэ). ЕтIуанэ увыпIэр къахьащ Джаппуев Муслим (кг 25-рэ), Тез Астемыр (кг 45-рэ), БатIитIэ Естэм (кг 55-рэ) сымэ.

НыбжьыщIэхэм я гъэсакIуэр Джаппуев Алийщ.

                            Гимнастикэм зрагъэужь

Бахъсэн къалэм и администрацэм и Iэтащхьэ Мамхэгъ Хьэчим иджыблагъэ щыIащ «Дыгулыбгъуей» спорт IуэхущIапIэм икIи яIущIащ абы щылажьэ центрым и унафэщI, Урысей Федерацэм спорт гимнастикэмкIэ щIыхь зиIэ и тренер Апатьев Дмитрий.

Ахэр тепсэлъыхьащ гимнастикэм щIыналъэм зыщегъэужьынымкIэ щIапхъэхэм, центрыр зыхуей-зыхуэфIхэмкIэ къызэгъэпэщыным, спорт IэщIагъэлIхэр лэжьыгъэм къыхэшэным теухуа Iуэхугъуэхэм.

«ГимнастикэмкIэ центрым лэжьэн мы гъэм щIидзауэ аращ, ауэ а зэман кIэщIым къриубыдэу ди спортсмен ныбжьыщIэхэу Хъыжьрокъуэ Надаррэ Нэгъуей Кемранрэ КъБР-м пашэныгъэр къыщыхьыным хуэунэтIауэ дыгъэгъазэм екIуэкIа зэхьэзэхуэм къыщыхэжаныкIащ. Абыхэм дагъэгуфIащ икIи тлъэкI къэдгъэнэнукъым тренерхэм дадэIэпыкъун, ахэр зыхуей-зыхуэфIхэмкIэ къызэдгъэпэщын папщIэ», - къыхигъэщащ Мамхэгъ Хьэчим.

                                      АЛЫДЖЫКЪУЭ Руслан.