Нэжэгужагъэщ - узыншагъэщ

Уэсым и дунейпсо е, нэгъуэщIу жытIэмэ, Спортым и щIымахуэ лIэужьыгъуэхэм я махуэр щагъэлъапIэр щIышылэм и ещанэ тхьэмахуэ махуэрщ. Гъэ дызэрытым ар зыхуэзэр щIышылэм и 21-рщ. ЩIы Хъурейм тет бгы лыжэ зыгъэпсэхупIэ псоми, Урысей Федерацэри хэту, а махуэр зэдагъэлъапIэ.

Уэсым и дунейпсо махуэр (World Snow Day) хуэгъэзащ спортым и лIэужьыгъуэу щIымахуэ лъэхъэнэм щызэкIэлъагъакIуэхэмрэ гъащIэр жыджэру ехьэкIынымкIэ щхьэпэ IуэхущIафэхэмрэ гулъытэ хэIэтыкIа хуэщIыным. Ар къэгъэунэхунымкIэ жэрдэмыр 2007 гъэм къыхэзылъхьауэ щытар Лыжэ спортымкIэ къэралхэм я федерацэрщ.

Спортым и щIымахуэ лIэужьыгъуэхэм я махуэм дыкъыхуреджэр узыншагъэр езыгъэфIакIуэ щыIэкIэ-псэукIэ дахэм балигъхэри дыдихьэхыу сабийхэри къызэретшэлIэным. КъызэгъэпэщакIуэхэм къазэрехъулIэуи, зыгъэпсэхугъуэ махуэм трагъахуэ гуфIэгъуэ зэхыхьэхэм балигъхэри сабийхэри хэтщ.

Зи гугъу тщIа зэгухьэныгъэм хэтхэм зэрагъэувам тету, мы махуэм «Уэсым и фестиваль» зыфIаща гуфIэгъуэ зэхуэсхэри ирагъэкIуэкI, лъэрыжэкIэ, лыжэкIэ, сноубордкIэ къэжыхьынымкIэ зэхьэзэхуэу балигъхэри ныбжьыщIэхэри зрашалIэхэр къызэрагъэпэщ.

ЩIымахуэм ику дыдэм хуэзэу бгы лыжэ зыгъэпсэхупIэхэм щрагъэкIуэкIын хуейуэ «къыщIрагъэдза» зэхыхьэхэм япэ илъэсым (2012 гъэм) хэтащ къэрал 20-м щIигъур. Абыхэм ящыщт бгы лыжэ спортымрэ зыгъэпсэхупIэхэмкIэ цIэрыIуэ хъуа къэралхэу Швейцариер, Тыркур, Къэзахъстаныр, Норвегиер, Финляндиер, нэгъуэщIхэри.

ЕтIуанэ илъэсым зи гугъу тщIы фестивалым хэтыну гупыж зыщIахэм я бжыгъэр 40-м нэблэгъат. 2020 гъэр къэтщтэнщи, Уэсым и дунейпсо махуэр къэрал 45-м щагъэлъэпIащ. ГъэщIэгъуэныр аращи, абыхэм «захезыгъэтхахэр» бгы лыжэ курортхэр лIэщIыгъуэкIэрэ здэщыIэ къэралхэм (Швейцарием, Норвегием, Финляндием, нэгъуэщIхэми) я закъуэтэкъым, атIэ, апхуэдэхэм «хуэчэм» хэгъэгухэри (псалъэм папщIэ, Венгриер, Япониер, Эстониер, уеблэмэ Пакистанри) къахыхьат.