гушыIэ
Ещанэ Iыхьэ
Дали и хъыбарыр
- Хьэрф къэтэджыжакIэт. Ауэ «Дауэ зэрыгухьэр?» упщIэр зэрызэхихыу, лъы пэгун къракIыхам ещхьу, къэуцIыплъщ, ищIэр зэримыщIэжыр плъагъуу, екъури, «Iущыцэ» журналыр тIууэ зэгуитхъащ. «Мис мыпхуэдэущ!» - жиIэурэ, кофе къизыкIагъащIэ Iущыцэ цIыкIум трипхъэри, директорым и бостеищIэри, и прическэри, и шэнтри, и пыченэри…
- Еуа? – щIоупщIэ школыр зыхиубыдэ полицэ участкэм кърагъэкIа Зубер.
- Хьэуэ, хьэуэ! Сыт жыпIэр? Журнал зэфIитхъар и пащхьэм иридзауэ аращ. Езы Iущыцэ зимыудамэ…
- Хьэрф хуэмыгъуэтыр сытыт?
- Си тхыгъэр зэпхъуэкIыжащ, - жи.
Зубер «Iущыцэ» журналыр зэтредз, къызэтредзыж:
- Дэтхэнэра?
Дали къыщолъэтри, Хьэрф сабийхэм яхузэхилъхьа таурыхъыр ирегъэлъагъу.
- Географиеращ зэрыригъаджэри, цIыкIухэм псысэ яхузэхилъхьэурэ, дрегъэхьэх, и гуэныхь сыхуейкъым.
- «Мазэм улъатэмэ», Борэн Iущыцэ, - макъкIэ къоджэ хабзэхъумэр. - Мыр Хьэрфкъым зейр, Iущыцэщ!
- Адрейхэм еплъыт!
- Борэн Iущыцэ… Борэн Iущыцэ… Борэн Iущыцэ… Псори Iущыцэщ зытхар!
- Псоми и цIэр якIэщIитхауэ аращ.
- Апхуэдэ щыIэ?
- Сыт щIыщымыIэр, удиректормэ?
- Абы зэреджэр «плагиатщ».
- КхъыIэ, Зубер! А псом Iущыци Хьэрфи зыри хащIыкIыркъым.
- Сыт-тIэ Хьэрф зыхуейр? Си цIэр кIэщIэптхакъым, жиIэу арат?
- Хьэуэ, зиунагъуэрэ! Илъэс еплIанэр йокIуэкI мы журналыр къыдэдгъэкIын зэрыщIэддзэрэ! Зэритхам хуэдэу къызэрытрамыдзаращ игу къеуэр. ЗэIигъэхьэу къыфIощI. Сабийхэм географием ягу щегъэкI, жи. Тхыгъэ щхьэкIэ апхуэдизу укъыщIэцыджынур…
- Ахъшэ къыватрэ мыбыхэм щхьэкIэ?
- Делэ хъуа? ЕгъэджакIуэ улахуэм хагъэкI журналым иримыкъур.
- ИтIанэ-щэ?
- ИтIанэ сабийхэм иращэ…
- КъыщIэкIыр адрей журналым ирикъужрэ?
- Хьэуэ, бжызоIэ! Мазэ къэс улахуэм хагъэкI.
- ЦIыху дапщэ фыхъурэ?
- Зы щэщI хуэдиз.
- Журналым къыщIэкIыр и жып ирелъхьэ, къыкIэлъыкIуэ мазэм ирагъэувэну тхыгъэхэри фотх, и уасэри щIэрыщIэу зэхыволъхьэж?
- Бюрократие, си къуэшыжь! ЛIо пщIэнур? Сэ а къомым си Iуэху хэлъкъым. Си цIэр зыщIыпIэ деж къыщыхэщынуи сыхуейкъым.
- Уэра инстаграмым къизылъхьэу изыхыжар?
- Делэ сыхъуа? – и нэхэр щIрегъэлъафэ «ихыж уасэр» къызыIэрыхьа Дали.
- АдэкIэ къэхъуар жыIэжыт! – хабзэхъумэм и бохъшэр къызэрырихыу,
Дали зэрыфилологыр къищIэжащ.
- ИщIар къызэрыгурыIуэжу, Хьэрфу пщIэр щIэщтэжри, журнал напэхэр къищыпыжу хуежьащ. «Къысхуэгъэгъу, Тхьэм щхьэкIэ!» - жиIэурэ, напэкIуэцI щэщIрэ тху хуэдиз къищыпыжат. АрщхьэкIэ Iущыцэ къыщылъэтщ, Хьэрф и Iэр иджыри здынэмыса напэ тIощIыр зэ Iэбэгъуэм топым ещхьу зэкIуэцIиупIышкIуэри, Хьэрф и щхьэм фIэпкъутыхьынумэ, къеблагъэ.
4
- Сыт мыр? – Iущыцэ и зыгъэгусэм иджыри IэфI щIэлъщ.
- Заявленэщ, - Хьэрф и фIэщу IукIыжыныгущ. - Сэ... сылейщ.
- Сэрами пщIэркъым лейр.
Зыри жимыIэмэ, нэхъыфIщ.
- Синэ-щэ?
- Ар ирелажьэ.
- Уэ сыт, абы естыр пшхыуэ ущIэсыну ара?
- У-Алыхьу жумыIэ!
- Сымы-Алыхьми, сыкъэралщ! Си пIэ уиту къызыщыгъэхъут!
- Алыхьым жимыIэкIэ! Бэзэрым утетми нэхъыфIщ абы нэхърэ.
- Гъуэгу махуэ! Уэ пхуэдэ романтик уIэгъэхэм нэхърэ сигу нэхъ темыхуэ цIыхухъу лIэужьыгъуэ къигъэщIынтэкъым Алыхьталэм.
- Темыхуэмэ, мис, сыIуокI!
- Щыгугъ уэ абы, илъэсым и кум узутIыпщу, егъэджакIуэншэ зысщIыну? Учебный годыр иухмэ, пэжалустэ! «Республикэм лэжыгъэ дэлъкъым!» - жаIэу, къавэу дэт гупым яхыхьэ, цIыхум ущемызэгъкIэ.
- Хэт сызэмызэгъыр? Стхам ухэмыIэбэ жысIэмэ, сыхьэкIэкхъуэкIэу ара? Сэри…
- Сыт, уэри? КIуэи тхьэусыхэ! Зэспэсу си цIэр кIэщIэстхэмэ, гуфIэ! – Iущыцэ къыщылъэтащ. – Сэра судым уезытын хуейр, хьэмэ уэра? Уи фызым еуи еплъыт журнал зэфIэтхъакIэ? Хьэмэ уи пхъум? КIуэи лажьэ, куэд жумыIэу! Къэралым илъэситхукIэ уригъаджэу илъэс щэщI хъуауэ улахуэ къущIитыр уи техьэ-текIым дэджэрэзын щхьэкIэкъым. Зыкъыстегъахуи, сыхэIэбэжынкъым! Сэри си щхьэ пщIэ хузощIыж. «ТIум тIу хэплъхьэмэ, тху къыщIокI», - жыпIэу птхымэ, си Iэр зэтедзауэ сыщысын уи гугъэу ара?
ЗэрамыутIыпщынур къызыгурыIуа Хьэрф ищIэнум йогупсыс.
- Еуэ-тIэ, баз дызэпигъэхьэ!
- Дапхуэдэу? – Iущыцэ и мылыр IэщIоткIухь.
- Мазэ къакIуэ къыдэдгъэкIыну журналым «тIум тIу хэплъхьэмэ, тху къыщIокI» жиIэу хэзгъэувэнщи, хэудыж. Къэбгъуэтрэ - сылэжьэху «Iым» жысIэнкъым. ПIэщIэкIрэ – афIэкIа зэи си тхыгъэм ухэIэбэркъым.
- Еуэ, сыарэзыщ!
Iущыцэ бжэмкIэ щIокIиикI:
- Дали, къакIуи базыр зэпыуд!