Спорт

Подмосковьем хыхьэ Покровскэ къалэм щекIуэкIащ тэмэму зэхэзымыххэм тхэквондомкIэ я урысейпсо чемпионат. КъБР-м ТхэквондомкIэ и федерацэм и секретарь нэхъыщхьэ Къанкъул Беслъэн хъыбар къызэрыдигъэщIамкIэ, абы медалищ къыщахьащ Къэбэрдей-Балъкъэрым щыщ спортсменхэм.

Шэджэм районым хыхьэ Щхьэлы-къуэ­ къуажэм дэт секцэ цIэрыIуэм иджыблагъэ щыIащ боксымкIэ Урысей Федерацэм и командэ къыхэхам и тренер нэхъыщхьэ Фархутдинов Викторрэ УФ-м СпортымкIэ и министерствэм и лIыкIуэ, боксымкIэ командэ къыхэхахэм я лэжьыгъэм кIэлъыплъ Назаров Сергейрэ спортсменхэр я гъусэу. 

Осетие Ищхъэрэ-Аланием и къалащхьэ Владикавказ дэт «Манеж» спортым и уардэунэм щIы­шылэм и 20-22-хэм щекIуэкIащ IэпщэрызауэмкIэ Ипщэ дзэ щIыналъэм и чемпионат. Псори зэгъу­сэу командийуэ гуэшауэ абы хэтащ дзэ къулыкъу езыхьэкI цIы­хуи 100-м щIигъу. 

Новоросийск къалэм дэт «Патриот» спорт комплексым и алэрыбгъухэм щекIуэкIащ «ЛокоДзюдо» урысейпсо сабий зэхьэзэхуэм и пэщIэдзэ Iыхьэр. «Локомотив» физкультурэ-спорт зэгухьэныгъэм къызэригъэпэща зэпеуэм хэтащ 2009-2010, 2011-2012 гъэхэм къалъхуа Урысей Федерацэм и щIыналъэ куэдым къикIа спортсмен 500-м нэблагъэ.
ДзюдомкIэ къэралпсо зэпеуэм Къэбэрдей-Балъкъэрым и командэ къыхэхам зэфIэкI лъагэхэр къыщигъэлъэгъуащ. Псори зэхэту абыхэм зэмылIэужьыгъуэу медаль I2 зыIэрагъэхьащ.

Владимир къалэм дэт Тимофеев Дмитрий и цIэр зезыхьэ щхьэзакъуэ зэзауэхэм хухэха спорт комплексым щIышылэм и 25-26-хэм щекIуэкIащ бэнэкIэ хуитымкIэ тэмэму зэхэзымыххэм я урысейпсо чемпионат.
Къэбэрдей-Балъкъэрым щыщ Токъмакъ Азэмэт зи хьэлъагъыр килограмм 70-м нэблагъэхэм я гупым дыжьын медалыр къыщихьащ.

Владимир къалэм щекIуэкIащ тэмэму зэхэзымыххэм алыдж-урым бэнэкIэмкIэ я урысейпсо чемпионат. Абы хэтащ къэралым и щIыналъэ зэмылIэужьыгъуэхэм къикIа спортсмен 69-рэ.
Къэбэрдей-Балъкъэрым щыщ Мудрэн Хьэзрэт щыбэна гупым къыщыпэлъэщын къыхэкIакъым икIи Урысей Федерацэм и чемпион хъуащ. Килограмм 72-м нэблагъэ зи хьэлъагъ ди лъэпкъэгъум иджырейм ипэкIэ щэнейрэ къэралым щынэхъыфI хъуащ.

Ставрополь къалэм щекIуэкIащ лыжэкIэ къызэдэжэнымкIэ зэпеуэ. Кавказ Ищхъэрэ федеральнэ университетым къызэригъэпэща зэхыхьэм хухэхауэ щытащ Студентхэм я дунейпсо махуэмрэ Къэбэрдей-Балъкъэрымрэ Къэрэшей-Шэрджэсымрэ къызэрызэрагъэпэщрэ илъэсищэ зэрырикъумрэ.
Къыэзэдэжэм хэтащ хамэ къэрал зыбжанэм щыщ щIалэгъуалэри. Зэхьэзэхуэм зэфIэкI лъагэхэр къыщигъэлъэгъуащ Къэбэрдей-Балъкъэрым хыхьэ Сэрмакъ къуажэм щыщ, Кавказ Ищхъэрэ федеральнэ университетым щеджэ Шыд Арсен. ЩIалэщIэр сытым дежи жыджэру хэтщ еджапIэ нэхъыщхьэм къызэригъэпэщ Iуэхугъуэхэм, спорт зэпеуэхэм.

Налшык дэт Универсальнэ спорт комплексым щекIуэкIащ стIолыщхьэ теннисымкIэ Кавказ Ищхъэрэ федеральнэ щIыналъэм и чемпионат. Абы и гуп, щхьэзакъуэ саугъэтхэм щIэбэнащ Ставрополь крайм, Дагъыстэным, Шэшэным, Осетие Ищхъэрэ-Аланием, Къэбэрдей-Балъкъэрым, Къэрэшей-Шэрджэсым щыщ спортсмени 100-м щIигъу.

КъБР-м спортымкIэ и министрым и къуэдзэ Анаев Аслъэн IущIащ ушумкIэ Урысей Федерацэм и зэхьэзэхуэм щытекIуа икIи къыщыхэжаныкIа Газаевэ Хьэлимэтрэ абы и гъэсакIуэ Къарэмырзэ Зауррэ.

Липецк областым хыхьэ Копцевы Хутора жылагъуэм щекIуэкIащ Урысей Федерацэм щIыхь зиIэ и тренер Пушкарёв Вячеслав и фэеплъу дзюдомкIэ къэралпсо зэхьэзэхуэхэр. Зэпеуэм и саугъэтхэм щIэбэнащ Урысейм и щIыналъэ 23-м къикIа спортсмен 237-рэ.