Спорт

Грознэ къалэм щекIуэкIащ «Динамо» зэгухьэныгъэм и Совет нэхъыщхьэм IэпщэрызауэмкIэ и щхьэзакъуэ-гуп урысейпсо чемпионат. Зэхьэзэхуэм хэтащ Урысей Федерацэм и щIыналъэ зэмылIэужьыгъуэхэм къикIа спортсмен 200-м щIигъу. Къэбэрдей-Балъкъэрым щыIэ МВД-м и спортсменхэм зэфIэкI лъагэхэр къагъэлъэгъуащ икIи етIуанэ гуп увыпIэр зыIэрагъэхьащ.

Бахъсэн муниципальнэ районым и стадион нэхъыщхьэм щызэхэтащ 2005 - 2006 гъэхэм къалъхуахэм футболымкIэ я зэхьэзэхуэ. Ар хухахащ Къэбэрдей-Балъкъэрым и япэ Президент КIуэкIуэ Валерэ къызэралъхурэ илъэс 80 щрикъум.

Америкэм и Штат Зэгуэтхэм и Финикс къалэм щекIуэкIащ Bellator 268 зэзауэ зэхэтхэмкIэ зи чэзу зэхьэзэхуэ. Абы япэу утыку къыщихьащ Къбэрдей-Балъкъэрым щыщ спортсмен цIэрыIуэ, зэIущIэ куэдым щытекIуа ди лъэпкъэгъу Бырхьэм Мухьэмэдрэ США-м щыщ Уиллис Джалилрэ. 

Старэ Оскол къалэм дэт Невский Александр и цIэр зезыхьэ спортым и уардэунэм щекIуэкIащ дзюдомкIэ «Динамо» физкультурэ спорт зэгухьэныгъэм и урысейпсо зэхьэзэхуэхэр. Я хьэлъагъ елъытауэ гуэшауэ щыта гуп 16-м я саугъэтхэмрэ Урысей Федерацэм и зэхьэзэхуэм кIуэнымкIэ Iэмалымрэ щIэбэнащ къэралым и щIыналъэ 26-м къикIа зи ныбжьыр илъэс 21-рэ мыхъу спортсмен 300-м щIигъу.
ЗэIущIэ гуащIэхэм Къэбэрдей-Балъкъэрым икIа спортсменхэм медаль зэмылIэужьыгъуи 6 къыщахьащ.

Налшык и «Спартак» стадионым щекIуэкIащ СССР-м спортым и мастер Боташев Хьэсэн и фэеплъу дзюдомкIэ республикэпсо зэхьэзэхуэ. Абы хэтащ Къэбэрдей-Балъкъэрым и щIыналъэхэм къикIа спортсмен ныбжьыщIэ 150-м щIигъу.

Италием и Ольбие къалэм щекIуэкIащ зи ныбжьыр илъэс 21-м щIимыгъуахэм дзюдомкIэ гупхэм я дунейпсо зэхьэзэхуэм и кIэух зэIущIэхэр. 

Кърым Республикэм хыхьэ Евпаторие къалэм дэт «Эволюция» спорт центрым щекIуэкIащ пауэрлифтингымкIэ Урысей Федерацэм и кубокыр къэхьыным ехьэлIа зэхьэзэхуэ. Саугъэтхэм щIэбэнащ зи узыншагъэм ныкъусаныгъэ зиIэ къэралым и щIыналъэ 42-м икIа спортсмени 150-м щIигъу.
Къэбэрдей-Балъкъэрым щыщу зэхьэзэхуэм хэта Кугъуэт СулътIан (килограмм 72-м нэблагъэ) къиIэтащ килограмми I60-рэ зи хьэлъагъ щтангэр икIи дыжьын медалыр къихуагъэфэщащ.

Ейск къалэм дэт «Солнечный» спорт комплексым щекIуэкIащ алыдж-урым бэнэкIэмкIэ «А» класс зиIэ зэхьэзэхуэ. БэнакIуэ цIэрыIуэ, СССР-м щIыхь зиIэ спортым и мастер Поддубный Иван къызэралъхурэ илъэси 150-рэ щрикъум ирихьэлэIу къызэрагъэпэща фэеплъ зэхыхьэм хэтащ Адыгэ, Дагъыстэн, Осетие Ищхъэрэ-Алание, Къэбэрдей-Балъкъэр, Кърым, Къалмыкъ, Шэшэн республикэхэм, Ямало-Ненецкэ автоном округым, Мэзкуу, Волгоград, Севастополь, Кранодар, Дон Iус Ростов къалэхэм, Мэзкуу областым къикIа спортсменхэр, псори зэхэту 150-м щIигъу.

Дыгулыбгъуей къуажэм пэгъунэгъу уэхым щекIуэкIащ «Джэдыкъуэ плъыжь - 202I» шыгъажэмкIэ зэхьэзэхуэ.

Урысей Федерацэм футболымкIэ и етIуанэ дивизионым и Япэ гупым щекIуэкI зэхьэзэхуэм «Спартак-Налшыкыр» Таганрог щыIущIащ «Форте» -м. Ар нэхъри хьэлэмэт ищIырт хьэрхуэрэгъухэм зэрахэтым нэхъапэм ди командэм и пашэу щытахэу Пащты Русланрэ Машэжь Ратмиррэ. А тIуми хъарзынэу зыкъагъэлъэгъуащ.