Иджырей мардэхэм хуэщIауэ

Узыншагъэ

Урысей Федерацэм и Президент Путин Владимир и жэрдэмкIэ къыхалъхьа лъэпкъ проетым ипкъ иткIэ, 2023 гъэм республикэм медицинэ IуэхущIапIэу 3 щаухуащ, зы къагъэщIэрэщIэжащ, 2-м зэгъэпэщыжыныгъэ лэжьыгъэхэр щрагъэкIуэкIащ. 

Iуащхьэмахуэ районым и Эльбрус къуажэмрэ Бахъсэн щIыналъэм и Куба жылэмрэ амбулаторэхэр, Май куейм и Октябрьскэм ФАП дащIыхьащ. Метр зэбгъузэнатIэу 600-м нэблагъэ къызэщIэзыубыдэ, иджырей мардэхэм тещIыхьауэ яухуа амбулаторэхэр екIущ икIи хуитщ. Абыхэм хэтынущ унэтIыныгъэ зэхуэмыдэхэмкIэ дохутырхэр щылажьэ, цIыхухэм медицинэ Iуэхутхьэбзэхэр щыхуащIэ, сымаджэхэм махуэм щеIэзэ пэш щхьэхуэхэр. ФАП-м и хэщIапIэр сыт и лъэныкъуэкIи хуэщIауэ щытынущ цIыхухэм япэ медицинэ дэIэпыкъуныгъэр нэсу щагъуэтын IэнатIэу, ар сымаджэхэми дохутырхэми я тыншыпIэм хуэщIауэ яухуащ.
Нарткъалэ дэт, ЩIыналъэхэм зэдай, узыфэ зэмылIэужьыгъуэхэр зыпкърытхэм щеIэзэ сымаджэщым и поликлиникэ къудамэр сымаджэщ къалэ цIыкIум и пщIантIэм ягъэIэпхъуэжащ. ЦIыхухэм я тыншыпIэр къызэгъэпэщыным тещIыхьауэ къащта унафэм абы къекIуалIэхэри щылажьэхэри арэзы техъуащ. Апхуэдэ Iуэху бгъэдыхьэкIэм Iэмал къитащ пIащIэгъуэкIэ медицинэ дэIэпыкъуныгъэ хуэныкъуэм нэхъ псынщIэу зыхуей Iуэхутхьэбзэр игъуэтынымкIэ, сыт щхьэкIэ жыпIэмэ жэщми махуэми лажьэ а IэнатIэр иджы гъунэгъуу щытщ. Поликлиникэм и теплъэм и закъуэкъым къагъэщIэрэщIэжар, атIэ я Iуэхутхьэбзэхэри ефIэкIуащ, IэнатIэм иджырей технологиехэр къыщагъэсэбэп зэрыхъуам и фIыгъэкIэ. Дохутырхэр зыщIэс, сымаджэхэм къыщеплъ пэшхэр, чэзум щыпэплъэ, дохутырым и деж зыщрагъэтх плIанэпэхэр тэмэму ягъэпсащ. КъищынэмыщIауэ, поликлиникэм къекIуалIэхэм здэкIуэнур нэхъ псынщIэу къагъуэтын папщIэ зыгъэлъагъуэ дамыгъэхэр, гъуэгугъэлъагъуэ картэхэр иIэщ.
Дзэлыкъуэ районым и Чыщбалъкъ къуажэм щызэрагъэпэщыжа амбулаторэм цIыху 1144-рэ епхащ, махуэ лэжьэгъуэм абы медицинэ Iуэхутхьэбзэхэр щыхуащIэфынущ сымаджэ 15-м. IуэхущIапIэм и пэшхэр абы щекIуэкIыну лэжьыгъэм хуэщIауэ къызэгъэпэщащ, абы къепха щIыналъэри зэIузэпэщ ящIащ. 
Медицинэм къигъэув иджырей мардэхэм хуэщIауэ щытыну IуэхущIапIэхэм цIыхухэр зыхуэныкъуэ дэIэпыкъуныгъэхэр къызыхуэтыншэу щагъуэтынущ.