БРИКС-м хыхьэну зэрыхуеймкIэ Мысырым иджыблагъэ лъэIу тхылъ иригъэхьащ а зэгухьэныгъэм. Апхуэдэ хъуэпсапIэ зиIэр зи гугъу тщIы къэралым и закъуэкъым. Сыт-тIэ абы хэтхэмрэ хыхьэну хуейхэмрэ къахуихьыр?
Шэч хэлъкъым а упщIэм и жэуапым хуэмыхьэзыру апхуэдэ зэгухьэныгъэм зы къэрали зэрыхэмыхьэнур. Мысырми фIэгъэщIэгъуэнщ псоми къагъэсэбэп долларым ещхьу БРИКС-м ахъшэщIэ къыдигъэкIыну зэрыхущIэкъур - а къэралым къыгуроIуэ абы къэкIуэну дахэ зэриIэнур. Псори зытещIыхьар зи гугъу тщIы гупым хэтынухэм сату, экономикэ хуит зэрызэдаIэнурщ. Мысырым и лъэIур Урысейм зэрыдиIыгъыр а къэралым ди лIыкIуэу щыIэм жиIаш.
БРИКС-м и дунейпсо форумым и президент Ананд Пурнимэ 2022 гъэм и бадзэуэгъуэм и 16-м и къэпсэлъэныгъэм къыхигъэщат Мысыр зэгухьэныгъэм хагъэхьэнкIэ зэрыхъунур. Апхуэдэуи, Иранымрэ Аргентинэмрэ лъэIу тхылъхэр къызэратари, Алжирри абы хыхьэну хуейуэ зэрыхэтри къыхагъэщат абы щыгъуэ. Мы зэманым ирихьэлIэу, къэрал 13-м лъэIу тхылъ къагъэхьащ, псори зэхэту къэрал 20-м нэблагъэ абы хыхьэну ягъэхъыбар.
Къэралхэр зи гугъу тщIы гупым зэрыхагъэхьэну щIыкIэм и унафэр зэкIэ къызэдащтакъым, ауэ шыщхьэуIум и 22 - 24 махуэхэм ЮАР-м щекIуэкIыну зэхыхьэм абы жэуап зэригъуэтынум, апхуэдэуи, псоми зэдай валютэ къызэращтэнум зыми шэч къытрихьэркъым.
БРИКС-м зыужьыныгъэмкIэ и банкыщIэм хыхьэну зэрыхуеймкIэ, Мысырым и лъэIур 2023 гъэм гъатхэпэм и 30-м иригъэхьащ. Накъыгъэм икIэхэм «Financil Taims»-м хъыбар зэригъэIуамкIэ, банкым хыхьэну хуейщ Сауд Хьэрыпхэри.
Африкэ-хьэрып къэралхэм ящыщу, нэхъ зызыужьауэ къалъытэ Египетым и экономикэр. Абы и ВВП-р доллар триллион 1,347-м ноблагъэ. Африкэм ар щыетIуанэщ. Ауэ урыс-украин зауэ Iуэху хэхар къызэрыхъейрэ экономикэр а къэралми щекIэкIуащ. Мы зэманым куэдкIэ кIэрыхуащ Мысырым зыщызыгъэпсэху урыс, украйн туристхэм я бжыгъэр. Аращи, зауэм ижь къыщIимыхуу къэнакъым а къэралым.
Фигу къэдгъэкIыжынщи, БРИКС-м мы зэманым хохьэ къэралитху: Бразилиер, Урысейр, Индиер, КНР-р, ЮАР-р. 2006 гъэм Санкт-Петербург щекIуэкIауэ щыта экономикэ форумым къыщызэрагъэпэщауэ щытащ а зэгухьэныгъэр.
Мысырыр зэгухьэныгъэм хыхьэну щIыхущIэкъум и зы щхьэусыгъуэщ абы хэт къэралхэм инвестицэ и лъэныкъуэкIэ зыкъыщIагъэкъуэну зэрыщыгугъым. Апхуэдэуи, Урысейм и гъавэу а къэралым ищэхум хэхъуэ зэпытщ. Зи гугъу тщIы, мелуани 107-рэ щыпсэу африкэ къэралым Iэрыхьэ гуэдзым и процент 50-р Урысейрщ езыщэр. Гъавэм и уасэми кIэрыхуу ар нэхъ пуду яIэрыхьэну щогугъ псоми я зэхуэдэ ахъшэкIэ зэпыщIа хъууэ щытмэ. Абы къищынэмыщIауэ, а зэгухьэныгъэм хыхьэфмэ, китай хьэпшыпхэри нэхъ тыншу зэрыIэрыхьэнум шэч къытрахьэркъым. Мысырыр зэхагъэхьэу щытмэ, апхуэдэ зэпыщIэныгъэм БРИКС-м хэт къэралхэми я сэбэп хэлъынущ. Псом япэу, Суэц кIэнауэр нэхъ зэIуха яхуэхъунущ, ар экономикэ и лъэныкъуэкIэ мыхьэнэшхуэ зиIэщ.
Мыри къыхэгъэщыпхъэщ: Мысырыр а зэгухьэныгъэмкIэ нэхъ щIеIэр КъуэкIыпIэ Гъунэгъум США-м и лъэр нэхъ щабэ зэрыщыхъуарщ. Апхуэдэ еплъыкIэ иIэщ къуэкIыпIэхутэ, ЭкономикэмкIэ школ нэхъыщхьэм и егъэджакIуэ нэхъыжь Чупрыгин Андрей. Абы къызэрилъытэмкIэ, ар къызыхэкIыр хьэрып къэралхэм америкэр щIыналъэ унафэщIу, хъумакIуэ нэхъыщхьэу къамылъытэж зэрыхъуарщ. Американхэми, япэхэм хуэдэу, хьэрып къэралхэм тепщэу щыщытыну хъуэпсапIи яIэжу щыткъым.
БРИКС-м илъэс тIощI иримыкъум хузэфIэкIащ лъэныкъуэ псомкIи къару зэриIэр игъэлъэгъуэн. Абы иIэ фIэлIыкIым махуэ къэс къыхэхъуэ зэпытщ. Шэч къыщIытепхьэни щыIэкъым Мысырыр зэгухьэныгъэм хыхьэу щытмэ, адрей хьэрып къэралхэри абы и лъагъуэм зэрырикIуэнум. БРИКС-м къэрал нэхъыбэ хыхьэху, Урысейм экономикэ и лъэныкъуэкIэ и сэбэп хэлъщ. Апхуэдэу щытми, мыбыи уегъэгупсысэ: къэрал куэд зэхыхьэху зэгурымыIуэныгъэри экономикэм къигъэув къалэнхэри нэхъыбэ мэхъу. Абы и зы щапхъэщ европей зэгухьэныгъэр.
