Республикэм и хабзэхъумэхэр токIуэ

Урысей Федерацэм и Лъэпкъ гвардием и дзэхэу Кавказ Ищхъэрэ округым щыIэхэм дзэ прикладной спорт лIэужьыгъуэхэмкIэ я чемпионат Зеленокумск щекIуэкIащ. Командэ 15 зыхэта зэпеуэм бжьыпэр щиубыдащ Урысей гвардием и управленэу КъБР-м щыIэм и гупым. 

 Хабзэхъумэхэр зэпеуащ метр 400, 3000 къэжынымкIэ, апхуэдэуи гранатэхэр дзынымкIэ. Япэ гупым бжьыпэр щаубыдащ ди республикэм икIахэм, етIуанэ хъуащ Урысей гвардием Владикавказ щиIэ Управленэм и лIыкIуэхэр, жэзыр ялъысащ Дагъыстэн Республикэм щыщхэм. 
ЕтIуанэм щытекIуащ Ставрополь щыIэ гуп хэхам и дзэ къулыкъущIэхэр, етIуанэ увыпIэр иубыдащ Железноводск къалэн хэхахэр зыгъэзащIэ и центрым и гуп зэхэтым, Зеленокумск щыщ инженер-сапёр полкым и командэр ещанэщ. 
Чемпионатым щытекIуахэмрэ призёрхэмрэ дамыгъэхэр яритащ Кавказ Ищхъэрэ щIыналъэм щыIэ Урысей гвардием я лэжьакIуэхэр псыхьауэ щытынымрэ спортымкIэ и унафэщI полковник Бунин Сергей.