Хущхъуэ къэщэхуным пыщIа Iуэхухэр

- Иджы ещанэ къытезгъэзэжурэ хущхъуэ зэхэдзэ сщIын хуей хъуащ. А ещанэри сэбэп къысхуэхъуакъым, ауэ щыхъукIэ, къэсщэхуа хущхъуэ къызэрыгуэкIхэм сом миным щIигъу естащ, - мэтхьэусыхэ аптекэхэм ящыщ зым щIыхьа ныбжь зиIэ цIыхубзыр. Абы зэрыжиIамкIэ, уз хьэлъэ гъэтIылъа иIэкъым, а иIэ тIэкIури щхьэщызыхынщ къилъыхъуэр.

Хущхъуэр зыщэхэми загъэкъуаншэркъым - щыIэр ящэ, нэпцI зэрахьэуи къыпхуэумысынукъым: ЦIыхум ныбжь иIэщ, а хущхъуэр сэбэп къыхуэмыхъужынкIи мэхъу, зэхъуэкIын хуейуэ, е зэрызрихьэлIэн хуей мардэм теткъым, Iэпкълъэпкъым зыдещI дунейм и щытыкIэ зызыхъуэжам - къащэхуар сэбэп къащIыхуэмыхъуам и щхьэусыгъуэхэр гъунэжщ. Хъурейуэ къекIуэкI а Iуэхум щIэх кIэ иIэнуи фIэщщIыгъуейщ.

Апхуэдэ псалъэмакъхэр махуэ къэс дэни къыщоIу, цIыхури абы есэжащ, ауэ узыр узщи, зыщIыпIи пхуэхьынукъым. Аптекэу хъуар унейщ, адрей сату щIапIэхэми хуэдэу, икIи абыхэм я дэтхэнэми езым ищэ хущхъуэгъуэхэмкIэ жэуап ехь, ауэ хэт жызыIэфынур хущхъуэ нэпцIым и зэранкIэ узыр хэтIэсауэ? Ар къэпхутэнри бгым зебгъэгъэзэнри зыуэ къыщIэкIынущ. Къэнэжыр зыщи, зым къыщащэхуар сэбэп къахуэмыхъумэ, нэгъуэщI щIыпIэхэм къыщалъыхъуэ, тIэунейрэ, щэнейрэ уасэ щIатын хуей зэрыхъуми емыгупсысыжу. 

Мы зэманым ирихьэлIэу Урысейм и хущхъуэгъуэхэм хагъэкIащ нэгъуэщI къэралыгъуэхэм щагъэхьэзырхэм ящыщу I20-м нэблагъэ. Абыхэм я пIэм къиувэнур сыт хуэдэ, къыщиувэнури дапщэщ? - цIыхур зэгупсысын иIэщ.

Хущхъуэхэм нэпцI куэд къазэрыхыхьар къалъытэри, иджыблагъэ Ставрополь щIыналъэм фельдшер-акушер пунктхэм аптекэ къыщызэIуахыну траухуащ икIи ар куэдым ягу ирихьащ, къэралым и щIыналъэ псоми апхуэдэ Iуэху бгъэдыхьэкIэр къыщыхалъхьэныр яфIэигъуэу. 

- Аптекэхэр коммерческэ IуэхущIапIэщ. Ахэр жылэ цIыкIухэм къыщызэIуахкIэ сату зыщIхэм фейдэ яIэкъым. Хущхъуэхэр къешэлIэнымрэ ахэр зегъэкIуэнымрэ трагъэкIуадэр къахущIэхыжынукъым, - жеIэ медицинэ Iуэхутхьэбзэхэр къэзыгъэсэбэпхэм я урысейпсо зэгухьэныгъэм и Iэтащхьэхэм ящыщ Жулёв Юрий.

 ФАП-хэм я унэ мыинхэм хуэкIуэ аптекэ цIыкIухэр къэралым и нэIэм щIэту щагъэлэжьэну, е фельдшерхэм хущхъуэхэр ящэну хуитыныгъэ иратыну арагъэнщ жызыIэхэри къахэкIащ.

Апхуэдэ къабзэу къыхалъхьащ шэрхъым тет аптекэхэр къызэIухауэ, дэфтэркIэ фIэкIа ямыщэ хущхъуэхэр цIыхухэм яIэрыгъэхьэн зэрыхуейри. Адрейхэр арыншами онлайнкIэ къащэхуф. А Iуэхур «Урысейм и пощт» IуэхущIапIэм къащигъэпсынщIэну мэгугъэхэр, абыкIэ хуитыныгъэ иратмэ. Апхуэдэ Iуэху бгъэдыхьэкIэм хущхъуэ нэпцIхэр дэкIуэдыну щыгугъми, хьэрычэтыщIэхэм я сату губгъуэм нэхъри зрагъэубгъуну хуейми зэкIэ гурыIуэгъуэкъым.