ЗэманкIэ укъызэмытхьэкъу

             Мы фхуэсIуэтэжыну хъыбарыр къэхъупа Iуэхугъуэщ. Зэман мымащIэ абы лъандэрэ дэкIами, къызыщыщIам и цIэр къидмыIуэмэ нэхъыфIщ.

 Си зы цIыхугъэ щIалэ къызэлъэIуащ ди зы къуажэ пхыдза и зы хозяйствэ зэпэщ си машинэмкIэ сшэну. Сэри щIалэр куэд щIауэ сцIыхут, и унагъуи мызэ-мытIу сихьати, схуэгъэщIэхъуакъым.

         Къалащхьэмрэ дыздэкIуэну жылагъуэмрэ зы сыхьэт мынэхъ мащIэкIэ ткIун гъуэгуанэ дэлъти, ар къызэднэкIыху, сэ нэхърэ илъэсипщIкIэ нэхъыжь щIалэм и жьафэ къемыхыу гъэсэныгъэ лэжьыгъэ къыздригъэкIуэкIащ. Нэхъыбэу псалъэмакъыр зытеухуар зэфIэкI, къулыкъу зиIэ, уей-уей жезыгъэIэ цIыхухэр къызэрыдэпхьэхыну щIыкIэмрэ ахэр къэгъэсэбэпа зэрыхъунумрэт. «Щытхъур зыми и жагъуэкъым - ущымысхь уи щытхъумрэ хъуэхъумрэ», - жиIэрт абы, кIэщI-кIэщIурэ, зэм нэхъ къыкIэлъыкIуэу къыщытригъэзэжкIэ «щытхъу» псалъэм нэхъ тригъэчыныхьу.

         Сэри, си цIыхугъэ щIалэм мащIэу сыдэуэршэрынуми, IэпэдэупIэ къызитынутэкъым. Тхьэ зыщиIуэрати, дэ щIалэгъуалэр куэдым дыхуегъэджэн, дыхуэгъэсэн, дыхуэущиин хуейт.

         Сытми, «си гъэсакIуэм» си щхьэр зэтрихуауэ жыхуиIа къуажэмрэ IэнатIэмрэ дынос.  ЗыхуэкIуа унафэщIми, хьэщIагъэ къыдехри, чэзууншэу и кабинетым дыщIегъэхьэ, сэлам гуапэ къыдехри, ди Iуэху зытетымрэ узыншагъэр зыхуэдэмрэ къыщIоупщIэ. Адыгэ хабзэм къызэригъэувым тету, дыщIэкIуам и щхьэусыгъуэм щIэмыупщIэу, хуэкIуа щIалэм псалъэ къылъегъэс.

         - Хьэсдин, Къэбэрдей псом зы адыгэлI, цIыхугъэ лъагэ бгъэдэлъу, гуащIафIэу, ехъулIэныгъэ мыужьыхыж иIэу, фIыщIэмрэ щытхъумрэ я нэхъ лъапIэр хуэфащэу исмэ - ар уэращ. Нобэми ныжэбэми зэпымыууэ, сыбампIэу согупсыс, махуэм зы дакъикъи сигу ихуркъым, жэщым сигъэжейкъым, сыжеями, сызэпщIыхьыр аращ – уэ къэблэжьауэ, пхуэфащэ пщIэ щхьэ мы ди республикэ унафэщIхэм къыпхуамыщIарэ? Арат уэ къэблэжьыр? ИкIи…

         - КхъыIэ, уи жагъуэ умыщI, ауэ егъэлеяуэ лэжьыгъэшхуэ къыспэщылъщ, хъунумэ, зэманкIэ укъызэмытхьэкъу - узыхуейр къызжеIи схузэфIэкIынур пхуэсщIэнщ, - жиIащ бысым унафэщIым.

         Хьэсдин зыхуейр жиIа иужь, апхуэдэ лъэкIыныгъэ дызыхуэкIуа тхьэмадэм зэрыбгъэдэмылъыр, хозяйствэми зэрамыIэр кIэщIрэ гурыIуэгъуэу къыжриIащ, и жагъуэ имыщIыну къелъэIури, дыкърагъэжьэжащ.

         Си цIыхугъэ щIалэм и щхьэр фIэхуарэ жиIэж щIагъуи щымыIэжу, фIы дыдэу илъагъу дунейм ехыжауэ, абы и дыуэщI къикIыжым хуэдэу, къалащхьэм къэсшэжащ.

                                                                                        ШАФИЙ Аслъэн.