Адыгэ щIалэм закърегъэлъагъу

Урысей Федерацэм футболымкIэ и Премьер-лигэм и командэ нэхъ лъэщ дыдэхэм ящыщ Санкт-Петербург и «Зенит»-р иджыблагъэ щыхьэщIат Азербайджаным и «Нефтчи»-м деж. Зэныбжьэгъугъэ зэIущIэр, бжыгъэр 2:1-уэ, хэгъэрейхэм яхьащ абя щыгъуэ, пэжыр жыпIэмэ, дызэримыгугъауэ. Ауэ дапхуэдэу мыхъуами, футболым кIэлъымыплъхэми хэзыщIыкIхэми, мыхьэнэшхуэ зимыIэ къызэрыгуэкI джэгугъуэу къалъытэнкIэ хъунт мы зыр хэмылъатэмэ: хьэщIэхэм топитIри яхудэзыгъэкIар Урысей Федерацэм щыщ футболист Мырзэ Резуану щымытамэ.

Журналистхэм ар ящIэу, зэIущIэм ипэ къихуэу зэхашэ хабзэ пресс-конференцым ирагъэблэгъащ адыгэ щIалэр. Абыхэм я упщIэхэм жэуап яритыжкIэрэ, Мырзэм къыхигъэщащ  ди къэралым и командэхэм хэту Санкт-Петербург и «Зенит»-м мызэ-мытIэу зэрыдэджэгуар, топ зэрыхудигъэкIар икIи апхуэдэ Iэмал къыхукъуэкIмэ, иджыри ар къызэригъэсэбэпынур.

         «Сэ садэджэгуащ Халк, Данни, Витцель сымэ. Абы щыгъуэ «Зенит»-р пхуэмыубыдыну лъэщт. Нобэрей командэм хэтхэр нэгъуэщIщ, я джэгукIэми фIыуэ зихъуэжащ. Иджырей «Зенит»-р япэрейм хуэдэжкъым», - жиIащ Мырзэм.

Апхуэдэуи игу къигъэкIыжащ Тулэ къалэм и «Арсенал»-м хэту Санкт-Петербург и командэм топ худигъэкIауэ зэрыщытар. «Абы щыгъуэ ди командэр Европэм и Лигэм щыджэгухэм яхэхуат. Нобэрей зэныбжьэгъугъэ зэIущIэми «Зенит»-м и гъуэм топ зэрыхудэзгъэкIынум яужь ситынущ, слъэкI къэзгъэнэнукъым абы щхьэкIэ», - къыхигъэщат Резуан. 

Адыгэ щIалэр журналистхэм яхутепсэлъыхьащ «Нефтчи»-м и Iуэхухэр Азербайджаным и чемпионатым зэрыщыдэкIым.

«КъыдгуроIуэ командэр щытыкIэ гугъум зэридгъэувар. Ар дгъэзэкIуэжын щхьэкIэ, дытекIуэу щIэдмыдзэжу хъунукъым. Си гугъэщ, нобэ «Зенит»-м дедгъэкIуэкIыну зэIущIэм къаруущIэхэр къытхилъхьэну, абы и фIыгъэкIи, чемпионатым ди Iуэхухэр щедгъэфIэкIуэжыну, къыддэщIхэр дгъэгуфIэну, дэрэжэгъуэ яттыну», - зэIущIэм щIимыдзэ щIыкIэ журналистхэм апхуэдэу яжриIат Мырзэ Резуан.

Ди гуапэ зэрыхъущи, ди щIалэр и псалъэм епцIыжакъым: зыхэт командэм текIуэныгъэр къыхуихьащ, футболеплъхэм гуфIэгъуэрэ дэрэжэгъуэу, зэрыжаIэу, мазэ псокIэ зрикъун яритащ.

         Резуан журналистхэм щепсалъэм къыхигъэщащ «Нефтчи»-м чемпионатым зыщыхуигъэхьэзырым щыгъуэ езыр командэм зэрыхэмытам и зэран гуэрхэри къызэрекIар.

         «Чемпионатым ипэ махуэм къыщыщIэдзауэ командэм очкохэр къихьын хуейт. Топджэгухэр пхъуэжу, абыхэм уахэплъэну апхуэдэ зэман зэрыщымыIэм къыхэкIыу, зэIущIэхэр щекIуэкIым губгъуэм куэдрэ сыкъихьакъым. Иджыпсту си Iуэхур нэхъыфI хъуащ, сызыхэт гупым хуэм-хуэмурэ сахосыхь. «Сумгаит»-м дыщыдэджэгуам губгъуэм сыкърагъэхьащ.

         Сыхуейщ футболеплъхэр си джэгукIэмкIэ къыдэсхьэхыну, дэрэжэгъуэ ястыну, нэхъыщхьэращи, командэм сэбэп сыхуэхъуну. Дэ къытпэщылъщ очко нэхъыбэ къэтхьын хуейуэ, таблицэм ищхьэIуэкIэ дыщыдэкIуэтеин папщIэ. Фэ жывоIэ «Нефтчи»-м зэIущIэ гугъухэр къыпэщылъу. АтIэ, псори къэдгъанэу афIэкIа дымыджэгужыну ара иджы? Хьэуэ, дызэкъуэувэу щытыкIэ гугъум дыкъикIыжу ипэкIэ дыкIуэтэн хуейуэ аращ», - ядэгуэшащ журналистхэм Мырзэр.

         Мэзкуу и «Спартак»-м хэту зэрыджэгуам теухуауэ Резуан жиIащ ар къэралым и командэ нэхъ лъэщхэм зэращыщыр, цIыху куэд абы зэрыдэщIыр. Езыр а клубым щыхэхуам щыгъуэ мэзкуудэсхэр щытыкIэ гъум итт, абы къыхэкIыуи и Iэзагъыр нэсу игъэлъэгъуэну Iэмал игъуэтакъым.

         «Дауэ мыхъуми, Мэзкуу и «Спартак»-м сыщыщыджэгуа лъэхъэнэр гукъинэж сщыхъуащ», - жеIэ Мырзэм.

Фигу къэдгъэкIыжынщи, мы гъэм щегъэжьауэ Мырзэ Резуан Азербайджаным и «Нефтчи»-м щоджэгу. Абы теухуауэ езым жиIауэ щытар мыращ:

«Мы командэм, зэрыжаIэу, сызэримыгугъауэ псынщIэ дыдэу сыкъыхыхьащ. Абыхэм я деж сыщагъэджэгуну хуейуэ куэд щIауэ срагъэблагъэрт, арати, псынщIэу дызэгурыIуащ.

«Нефтчи»-р командэ лъэщщ, тхыдэшхуэ зиIэщ. Ар къызгурыIуэу арэзы сытехъуащ къысхуагъэлъэгъуахэм. Гупым сызэрыхыхьэмкIэ зыми сечэнджэщакъым, унафэр сэ езым къэсщтэжащ. Иджыпсту къыспэщылъ къалэныр командэм сыдэIэпыкъунырщ.

Мыбы ипэкIэ сыщыджэгуа клубым есщIылIа зэгурыIуэныгъэм и пIалъэр и кIэм щынэсам, сигу ислъхьат хамэ къэрал сыщыджэгуну. Ар мынобэмэ, атIэ, дапщэщ, жысIэри, си мурадыр зэзгъэхъулIащ».

Азербайджаным футболымкIэ и премьер-лигэм 2023 - 2024 гъэхэм щекIуэкI чемпионатым «Нефтчи»-р 6-нэ  увыпIэм щыщытщ, очко 18 иIэу.

                                                                                   ХЬЭЩЫКЪУЕЙ Олег.