Плъыфэ зэмыфэгъухэр

Мыгъэрей щэкIуэгъуэ мазэр и кIэм нэблэгъащ. Лъэсу къалэм къыщызыкIухьхэри нэхъыбэ хъуащ, пщэдей зызыхъуэжынкIэ хъуну дунейм и дыгъэпс кIапэр яутIыпщыну ягу пымыкI хуэдэ. ЦIыху куэдым уащыхэплъэкIэ япэу нэм къыфIэнэр щыгъын щIыIутелъ щхъуэкIэплъыкIэхэрщ. Нэхъапэм иджы хуэдэ зэманым цIыхухэм щIэкIыу ящыгъыу щыта бжьыхьэ щыгъынхэр яжьафэ-гъуабжафэ зэфэзэщу щыщытар щыIэжкъым. А зэманым модэр зыубзыхухэм къалъытэрт дуней уэтIпсытIым щыгъыныгъуэхэм я плъыфэри техуэн хуейуэ. Плъыфэ псори щыIэт абы щыгъуэми, арщхьэкIэ, ахэр нэм къыщIэлыдэртэкъым: удзыфэмэ - удзыфэ-фIыцIафэу, плъыжьмэ - фIыцIафэ къыщIыхьэу щытыныр нэхъ кърагъэзэгъырт.

А блэкIам пэув хуэдэ, махуэм я нэхъ щIыIэми, уэшх къежэхми ихъуреягъым нобэ щыплъагъур цIугъэнэ защIэщ. Зэ еплъыгъуэкIи апхуэдэ плъыфэ зэхэдзэм дуней фаер дэщIэращIэу, гукъыдэжыр къаIэту къыпщохъу, арщхьэкIэ зэман докIри, а псом тезэша нэм бжьыхьэм и теплъэ дыдэхэр къилъыхъуэу щIедзэ, псоми чэзу зэраIэр уигу къигъэкIыжу.

А Iуэхум куэдкIэ ехьэлIащ Шанель Коко и «Бостей фIыцIэ цIыкIур», ноби цIыхум яIурылъыр. МыкIуэдыжын дунейпсо цIэрыIуагъ къэзылэжьа модельерым и тхыгъэм къызэрыхэщыжымкIэ, абы къежьапIэ хуэхъуар Iуэху къызэрыгуэкIт... Театрым здыщIэсым, абы нэкIэ къилъыхъуэу щIидзащ и цIыхугъэхэм ящыщ зы нэхъ мыхъуми, арщхьэкIэ къыхуэгъуэтакъым икIи абы и щхьэусыгъуэу къилъытар цIыхуу залым щIэсыр щхъуэкIэплъыкIэ ямылейуэ зэрыхуэпарт. Спектаклым и зэпыугъуэм хуэзэу ар иджыри зэ абыхэм яхэплъэжащ - щыгъын цIугъэнэхэм фIэкIа цIыхухэм я нэгур плъагъуртэкъым, нэм къыфIэнэу къахэпхын щIахэмытри арат. Абдежым абы мурад ищIащ цIыхур гупым къахэзыгъэщ щыгъын «къызэрыгуэкI» щыIэн зэрыхуейр. Коко и гупсысэр куэдым жащ, икIэм-икIэжым абы къыгурыIуащ псори плъыфэм зэрелъытар. Ар жэщым къэтэджыжри, и щыгъынхэр зэхищыпыкIащ. Абдеж абы и нэм къыфIэнащ къызэрыгуэкI дыдэу, Iэпкълъэпкъым хуэфIу да бостей фIыцIэ цIыкIур икIи, гуп уарихыхьэну абы хуэдэ щымыIэу къилъытащ. Щыгъуэ щыгъыну къекIуэкI «бостей фIыцIэм» Коко етIуанэ гъащIэ иритащ икIи зэман кIэщIым къриубыдэу псоми ар я гум дыхьащ.

Бостей фIыцIэм пщампIэ хужь телъмэ, къулыкъу зезыхьэхэмкIэ хэкIыпIэт, абы цIугъэнэ куэд дыщIыбгъумэ, псоми уакъыхэщу гупым уазэрыхыхьэн щыгъыныгъуэт. Апхуэдэхэм деж зэуэ нэм къыщIэлыдэр езы бостейратэкъым, атIэ цIыхум и нэгумрэ абы екIуу дыщIигъу хьэпшып цIыкIухэмрэт.

А цIыхубз Iущырщ къэзыгупсысар япэ цIугъэнэ IэрыщIхэр - бижутериехэри.

- ЦIугъэнэ куэдым цIыхубзыр ягъэдэхэнущ, цIыхум къахигъэщынущ, ахэр IэрыщIу щытмэ, ауэ дыщэхэкIымрэ налкъутналмэсхэмкIэ ебгъэлеиныр емыкIущ,- жиIэгъащ абы. Апхуэдиз мылъку зыбгъэдэлъ цIыхубзыр (ар дуней псом щынэхъ къулей дыдэхэм ящыщт) зэи мылъкум мылъкуу еплъакъым, цIыхухэм зэрадэIэпыкъу, псэуныгъэм къыщигъэсэбэп Iэмалхэм ящыщ зыуэ фIэкIа.

Абы и зы щапхъэщ бижутериехэр къигупсысын хуей щIэхъуари. Шанель Коко тыгъэ къыхуащIат метрий зи кIыхьагъ налкъут щыгъэ, ауэ абы зригъэщIэгъуэн щхьэкIэ зэи зыкIэрилъхьакъым, абы къыпхухэмыцIыхукIыу къытращIыкIа налмэс IэрыщIым фIэкIа. ИужькIэ абы мурад ищIащ апхуэдэхэр куэду къыщIигъэкIыну, дэтхэнэ зы цIыхубзми, мыхъуапсэу, Шанель и налкъутхэм ещхь къащэхуфын хуэдэу. Апхуэдэ щIыкIэкIэ модэм къыхыхьащ кIуэ пэтми гулъытэ нэхъыбэж зыгъуэт бижутериехэр. Иджыпсту къуэлэн ямылейхэм я зэманщ, ауэ абы Iэмал имыIэу зэгуэр къыкIэлъыкIуэнущ плъыфэ къэс и пIэм щиувэж лъэхъэнэ.