Къэпщтэныгъэ зэрырагъэкIуэкIынумкIэ хъыбарегъащIэ тхылъ

Урысейхэр къэралым и нэгузыгъэужь щIыпIэхэм зэрыкIуэр къапщытэ АСИ-мрэ Б1 IуэхущIапIэхэм я лэжьакIуэхэмрэ. Iуэхур къызэгъэпэщынымкIэ щIэгъэкъуэн мэхъу ГеографиемкIэ Урысей зэгухьэныгъэр, «Пэрытхэм я зэщIэхъееныгъэ», урысейпсо щIалэгъуалэ зэгухьэныгъэр, «Уи кIуэгъуэщ» урысейпсо студент проектым хэтхэр, къищынэмыщIауэ, УФ-м спортымкIэ и министерствэмрэ УФ-м Егъэджэныгъэмрэ щIэныгъэмкIэ и министерствэмрэ. Къэпщытэныгъэм и къалэн нэхъыщхьэу ягъэувар жылагъуэм хэкур зэрацIыхур, абы и зыгъэпсэхупIэ щIыпIэхэм зэрыщыгъуазэр, зыплъыхьакIуэ кIуэну щIэхъуэпсыр зыгъэпIейтей упщIэхэр къэгъэнэхуэнырщ.

Абы теухуауэ упщIэ 20 къыщывгъуэтынущ https://leader-id.ru/events/481565 сайтым, абыхэм я жэуапыр ефт хъунущ гъатхэпэр икIыху. Абы папщIэ, Leader-ID интернет напэкIуэцIым фихьэу, фи цIэ-унэцIэр ифтхэн хуейщ.

Къэпщытэныгъэм хэтыну хуитщ туризмым дихьэх псори: лъэсу, шэсу, лъакъуэрыгъажэкIэ, къызэражыхь лыжэкIэ, сноубордкIэ зекIуэ ежьэну, бгым дэкIыну зыфIэфIхэр. Къэпщытэныгъэм хэту псори саугъэт зэмылIэужьыгъуэхэмкIэ ягъэлъэпIэнущ.

ЗэрыжаIэмкIэ, къэпщытэныгъэм къигъэлъэгъуар гъэмахуэр къимыхьэ щIыкIэ наIуэ къащIынущ. КъыкIэлъыкIуэ къэпщытэныгъэр 2025 гъэм и щIышылэ - гъатхэпэ мазэхэм ирагъэкIуэкIынурэ, а тIур зэрагъэпщэжынущ.

«Урысейм и закъуэ мыхъуу, дуней псом и зыгъэпсэхупIэхэр къэгъэнэхуэнымрэ абыхэм зегъэужьынымкIэ АСИ-м лэжьыгъэшхуэ иригъэкIуэкIауэ, фIыуэ щыгъуазэщ. УФ-м Экономикэм зегъэужьынымкIэ министерствэр, ВЭБ.РФ, Кавказ.РФ IуэхущIапIэхэмрэ дызэщIыгъуу, мы унэтIыныгъэмкIэ законодательствэм зегъэужьынми долэжь. Япэ нэхъ идгъэщхэм ящыщщ зыгъэпсэхупIэхэр зыхуэныкъуэ псомкIи къызэгъэпэщынымрэ ахэр егъэфIэкIуэнымрэ. Мы едгъэкIуэкI къэпщытэныгъэхэм къагъэлъагъуэ щIэныгъэр сэбэпышхуэ къытхуэхъунущ «Урысейм и турист лъагъуэхэр» проектыр гъэзэщIэнымкIэ, нэгъуэщI щIыпIэ щIэщыгъуэ гуэрхэри къызэIухынымкIэ», - жеIэ АСИ-м и «Къалэ экономикэ» дивизионым и унафэщI Захаровэ Ольгэ.

«Туризмым ехьэлIа къэпщытэныгъэхэр АСИ-м дедгъэкIуэкIыну, абыхэм дадэлэжьэну ди гуапэщ. Мы Iуэхум и фIыгъэкIэ дэ къэттIэщIынущ икIи зыужьыныгъэ игъуэтынущ туризмым и унэтIыныгъэ зыбжанэм. Апхуэдэу, Урысейм экотуризмым зыщегъэужьынымкIэ едгъэкIуэкIа лэжьыгъэм щыщщ Катун заповедникым эколъагъуэ къызэрыщызэIуахар. Гу зэрылъыттамкIэ, апхуэдэ щIыпIэщIэхэр жылагъуэми щIэщыгъуэ ящохъу, я гуапэщ», - къыхигъэщащ Б1 гупым и лэжьакIуэ Архангельская Ольгэ.

«Урыс географие зэгухьэныгъэм илъэс зыбжанэ хъуауэ турист лъагъуэхэр зэгъэщIэным куууэ зыщегъэгъуазэ. Абы и лъэныкъуэкIэ щIыналъэхэм лэжьыгъэшхуэ щедгъэкIуэкIащ. Лэжьыгъэ и пIалъэкIэ дадэгуэшэфынущ икIи а унэтIыныгъэм Iуэхум зыщедгъэужьыфынущ. Дыщылажьэ щIыналъэхэм щыIэ хьэрычэтыщIэхэм я деж щIэупщIэшхуэ щыдиIэщ. Ди дежкIэ мыхьэнэшхуэ иIэщ унэтIыныгъэщIэр зыхуэдэм теухуауэ зэхэхауэ ди еплъыкIэхэр, Iуэхутхьэбзэ пыухыкIахэр къызэрыдгъэлъэгъуэфыным», - жиIащ Урыс географие зэгухьэныгъэм туризмэм зегъэужьынымрэ экспедицэ IуэхухэмкIэ и департаментым и унафэщI Беляковэ Татьянэ.

ЩIэупщIэныгъэхэр йокIуэкI турист, бгы-лыжэ IэмэпсымэхэмкIэ «Спорт-Мегафон» тыкуэным и дэIэпыкъуныгъэкIэ.

«ЗыплъыхьакIуэ, зекIуэ ежьэну цIыхухэр тегъэгушхуэныр, абыкIэ щхьэпэ яхуэхъун хъыбархэмкIэ ядэгуэшэныр ди къалэну къыдолъытэ. Iуэхур ублэнымкIэ турист лъагъуэхэр IэмалыфIщ, тыншыпIэм хуэщIауэ къызэгъэпэщащи, абы теухуа куэд ди блогым и жэуапылъэм щыдотх, а гъуэгуанэм ущызыгъэгъуазэ лекцэхэр ди зыплъыхьакIуэхэм я клубым щыдогъэкIуэкI. Абы къыхэкIыуи лъагъуэхэм теухуа къэхутэныгъэр егъэкIуэкIыныр дэIыгъыным ди дежкIэ мыхьэнэшхуэ иIэщ», - къыхигъэщащ «Спорт-Мегафон» тыкуэным маркетингымкIэ и унафэщI Кузьмина Иринэ.

КъэхъукъащIэ туризмэмкIэ туриндустрием и урысей зэгухьэныгъэм и комитетым къызэритамкIэ, 2023 гъэм жыджэр турист зекIуэхэм яIэ щIэупщIэм проценти 10 - 30-кIэ хэхъуащ. Апхуэдэу къэпщытакIуэхэм къыхагъэщ лъэс зекIуэхэм, караванингым, лъакъуэрыгъажэ туризмым дихьэххэр нэхъыбэ зэрыхъур. «VeloRussia»-м и къэхутэныгъэхэм къызэрагъэлъагъуэмкIэ, Урысейм щыпсэухэм я процент 87-р гъащIэ узыншэ ехьэкIыным и телъхьэщ, куэдым я дежкIэ туризм жыджэрыр узыншагъэр егъэфIэкIуэным быдэу пыщIащ.