Хэку лъагъуныгъэм теухуащ уэрэдхэр

Музыкэ къэрал театрым щекIуэкIащ «Хрустальные звёздочки-2024» фестиваль-зэпеуэм и щIыналъэ Iыхьэр. Сабийхэм ар къы­хузэрагъэпэщащ Суд приставхэм я федеральнэ къу­лыкъущIапIэм.

Зэпеуэр къызэзыгъэпэщахэм зэрыжаIамкIэ, дэтхэнэ зы сабийми Iэмал иIащ абы и зэфIэкIрэ къарурэ щеплъыжыну. Ар къыхэзылъхьахэм я къалэн нэхъыщхьэр ныбжьыщIэхэм я зэфIэкIхэр къагъэнэIуэнырщ, апхуэдэхэм зрагъэужьынырщ. 
КъБР-м и Iэтащхьэ КIуэкIуэ Казбек и унафэкIэ ди щIыналъэм Белгород областым щыщу кърагъэблэгъа сабийхэр фестиваль-зэпеуэм ирагъэплъащ.
Концертыр ягъэдэхащ «Шагъдий», «Эдельвейс» сабий къэфакIуэ ансамблхэм, «Хрустальные звёздоч­ки-­ ­2023» фестиваль-зэпеуэм щы­текIуа Къазий Дамиррэ Къуршэ Арианнэрэ.
ЦIыкIухэр зэпеуащ къэфэнкIэ, уэрэд жыIэнкIэ, актёр IэзагъкIэ. Фестивалым хэта цIыху 18-м я нэхъыщIэр илъэситху ныбжьым ит Теувэжыкъуэ Сафиет. КъэпщытакIуэ гупым хэтхэм текIуахэр къыхахыным теухуа я лэжьыгъэр тынштэкъым, куэдым удихьэхыу зэрызыкъагъэлъэ­гъуам къыхэкIыу.
Ауэ нэхъ зэфIэкI зиIэхэр къыхахын хуейтэкъэ?! Актёр Iэзагъэр нэхъ далъэгъуауэ къалъытащ Баший Мадинэрэ Селиванов Кириллрэ. КъэфакIуэхэм я пашэ хъуащ Маговэ Энолэ, Хъарзынэ Ис­лъам, Шэрхъ Рианнэ, Уэсмэн Алим. УэрэджыIакIуэхэм къахэжаныкIащ Уэлджыр Миланэрэ Теувэжыкъуэ Сафиерэ. Фестиваль-зэпеуэм хэта псоми щIыхь тхылъхэмрэ сау­гъэтхэмрэ иратащ. ТекIуа­хэм фестивалым и саугъэт щхьэхуэхэмкIэ яхуэупсащ.