Ди республикэм нобэ къыщызэIуахащ «Урысейм ипс» урысейпсо Iуэхур, абы ипкъ иткIэ ягъэкъэбзэнущ псы ежэххэмрэ псыхъуэхэмрэ.
«Зи гугъу тщIы акцэр «Экология» лъэпкъ проектым и зы Iыхьэу щыт «Зыми хуэмыдэ псыежэххэр хъумэныр» федеральнэ проектым хыхьэу ирагъэкIуэкIыу аращ, ар къыхэзылъхьар Урысей Федерацэм и Президент Путин Владимирщ.
«Урысейм ипс» Iуэхур ди къэралым и щIыналъэ псоми къыщызэдащтащ. Си щхьэкIэ, си гуапэу, фIэхъускIэ захуэзгъэзащ акцэм хэтыну къыдэкIа псоми, ар къызэзыгъэпэщахэми.
Мы Iуэхум и мыхьэнэр псыхэр къабзэу, фIагъ лъагэ иIэу хъумэн зэрыхуейм жылагъуэм, псом хуэмыдэу, щIалэгъуалэм гу лъегъэтэнырщ, ар 2014 гъэ лъандэрэ ирагъэкIуэкI. Илъэси 10-м къриубыдэу, псы 10 300-рэ ягъэкъэбзащ. Апхуэдэуи мы Iуэхутхьэбзэм зэкъуигъэуващ ди къэралым и хэгъэгу 89-м щыщ цIыху мелуни 10.
Къэбэрдей-Балъкъэрым щедгъэкIуэкI Iуэхум жыджэру къыхыхьащ муниципалитет псори. Шэджэм, Шэрэдж, Малкэ, Бахъсэн, Аруан, Тэрч, Аргудан, Урыху, Лэскэн, Залкэ псыхэр гъэкъэбзэнымкIэ лэжьыгъэхэр щокIуэкI щIыналъэхэм.
Щэбэт щIыхьэхухэр щекIуэкIынущ Гуэл ЩхъуантIэхэм, Шэджэм псыкъелъэхэм, Тызыл псыхъуэм. Iуэхум хэтщ щIыуэпсыр хъумэным епха къулыкъущIапIэхэм, министерствэхэм, ведомствэхэм, щIалэгъуалэ, экологие зэгухьэныгъэхэм я лIыкIуэхэр, волонтерхэр, лъэныкъуэкIэ къыщынакъым цIыхубэри.
Къыхэзгъэщыну сыхуейщ «Урысейм ипс» урысейпсо акцэм Къэбэрдей-Балъкъэрыр иджы илъэс 4-нэ хъуауэ зэрыхэтыр. Абы лъандрэ псыIуфэ километр мин1,5-рэ дгъэкъэбзащ, псыуэ, псыхъуэу республикэм итым дылъэIэсащ.
Иджыри лэжьыгъэу къытпэщылъыр мащIэкъым», – щетх КIуэкIуэ Казбек и телеграм-каналым.
