НОБЭ

ЩIэныгъэ зэгъэгъуэтыным и дунейпсо махуэщ. ООН-м щIэныгъэншагъэр гъэкIуэдыным теухуауэ къищта унафэм ипкъ иткIэ ягъэувауэ 1966 гъэ лъандэрэ ягъэлъапIэ.
Журналистхэм я зэкъуэтыныгъэм и дунейпсо махуэщ. Фашизмэм и бийхэм ящыщ чех журналист Фучик Юлиус Берлин и тутнакъэщ Плётцензее 1943 гъэм фокIадэм и 8-м гуузу щаукIауэ щытащ.
Урысейм и Дзэ щIыхьым и махуэщ – Кутузов Михаил зи унафэщI урысеидзэм Бородино и деж щригъэкIуэкIа зауэшхуэм и махуэщ
Финансистым и махуэщ
1636 гъэм Гарвард университетыр – США-м и еджапIэ нэхъыжь дыдэхэм икIи нэхъ лъэрызехьэхэм ящыщ зыр – къызэрагъэпэщащ.
1941 гъэм Ленинград къалэр фашистыдзэхэм къаухъуреихьащ. А къапхъэныр щызэпатхъыфар I944 гъэм щIышылэм и 27-рщ. А зэманым къриубыдэу къалэдэс мин 600-м щIигъу мэжэщIалIагъэм ихьащ, нэмыцэ кхъухьлъатэхэм кърадзых лагъымхэр къатехуэурэ хэкIуэдащ.
1812 гъэм къалъхуащ урысей усакIуэ щэджащэ Пушкин Александр и щхьэгъусэу щыта Гончаровэ Наталье.
1923 гъэм къалъхуащ Дагъыстэным и цIыхубэ усакIуэ, Социалист Лэжьыгъэм и ЛIыхъужь, Лениным и цIэр зезыхьэ, СССР-м и Къэрал саугъэтхэм я лауреат Гамзатов Расул.
1958 гъэм къалъхуащ КъБР-м щIыхь зиIэ и ухуакIуэ, КъБР-м и Парламентым и депутату щыта Къандэхъу Мухьэмэд.
1954 гъэм къалъхуащ урысей альпинист цIэрыIуэ, «Урысейм щыщхэм дунейм и къурш нэхъ лъагэхэр къагъэIурыщIэ» проектым и унафэщI Хамицаев Казбек.
1962 гъэм къалъхуащ КъБР-м мэкъумэш хозяйствэмкIэ щIыхь зиIэ и лэжьакIуэ КIэдыкIуей Аслъэн.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус I8 – I9, жэщым градус 11 – 12 щыхъунущ.
Лъэпкъ Iущыгъэ:
Ажалым умылъыхъуэ - езым укъигъуэтынщ.