Кавказ Ищхъэрэр зыгъэщIэращIэ ухуэныгъэ

Кавказым цIыху куэд къина къыщIэкIынкъым Черкесск къыщызэIуаха мэжджытыщIэм щымыгуфIыкIауэ. Къэбэрдей-Балъкъэрым къыбгъэдэкIыу хъуэхъуакIуэ щыIахэщ муфтийм и къуэдзэ Мисиров Хъызыр, Кавказ Ищхъэрэ ислъам институтым и ректор Чочаев Шарафутдин, проректор Шыбзыхъуэ Мурат сымэ. Iэбу Хьэнифэ и цIэр зыфIащыжа мэжджытышхуэм и бжэхэр япэ мэрем нэмэзым къыхузэIуихащ дыгъэгъазэм и 23-м.
«КъШР-м мэжджытыщIэ къызэрыщызэIуахамкIэ сынывохъуэхъу, - захуигъэзащ Iуэхум егъэщIылIа дауэдапщэм хэта, УФ-м и Президентым и лIыкIуэу КИФЩI-м щыIэ Чайкэ Юрий. - Кавказ Ищхъэрэм и муслъымэн псоми я дежкIэ тхьэелъэIупIэ ин хъунущ ар. УнафэщIхэмрэ щIыналъэм щыщ жэрдэмщIакIуэхэмрэ зэкъуэту зрагъэхъулIэфа Iуэху щхьэпэщ а ухуэныгъэр».
Мэжджытыр и инагъкIэ метр зэбгъузэнатIэ мин 4 мэхъу. Абы и фIыгъэкIэ, цIыхубзхэми цIыхухъухэми яубыд Iыхьэхэм зэуэ куэд щIэхуэнущ. ЦIыху нэхъыбэ къыщекIуалIэ хьидхэм мэжджытым и Iэгъуэблагъэм цIыху мин 20-м нэс нэмэз щащIыфынущ.
Къатищу зэтет ухуэныгъэм азэн джапIэу 4 хэтщ, дэтхэнэ зыми метр 52-рэ и лъагагъыу. Мэжджытыр къыхэзыгъэщ теплъэщ абы зи лъагагъкIэ зэхуэмыдэ унащхьэ хъурейуэ 33-м нэс зэрытеIубар, и кум итым метр 20 и къэухьу. Щхьэгъубжэ 220-рэ хэлъщ мэжджытым. И блынхэм метр 32-рэ я лъагъагъщ, мухьэрэбым – метр 12. Лъэгур мывэхум къыхэщIыкIащ. Мэжджыт пщIантIэм мыдрисэ дэтщ. КъинэмыщIауэ, гъэмахуэми щIымахуэми хуэщIа андез щтапIэхэр хэщIыхьащ. Мэжджытым и хъуреягъкIэ - парк, щIыхьэпIэм пэгъунэгъуу - псыутх хащIыхьащ.