Тэрч щIыналъэм и унафэщIхэм зэфIэкIыу яIэр ирахьэлIэ гъуэгухэр зыхуей хуэгъэзэным ехьэлIа лъэпкъ пэхуэщIэр IэужьыфIэу гъэзэщIэным.
Абы хиубыдэу Инарыкъуей, Курп Ипщэ жылэхэм километри 4 зи кIыхьагъ гъуэгур щызэрагъэпэщыжащ: асфальтыщIэ тралъхьащ, лъэс зекIуапIэхэр къагъэщIэрэщIэжащ, уэрам зэпыхьэпIэхэм ягъуэта сэкъатхэр ягъэзэкIуэжащ, иджырей светодиоднэ светофорхэр щагъэуващ, гъуэгур и кIыхьагъкIэ къагъэнэхуащ.
Красноармейскэ къуажэм зэман кIэщIым къриубыдэу зыхуей щыхуагъэзащ зы километр зи кIыхьагъ гъуэгур. Абы сэкъатышхуэхэр куэд щIауэ иIэт, цIыхухэр гугъу иригъэхьу. Плановскэм къыщагъэнэхуащ нобэм къэс уэздыгъэ здэщымыIа, километри 10 зи кIыхагъ гъуэгур.
Къэбэрдей-Балъкъэрым и Iэтащхьэм ищIа унафэм тету Тэрч къалэм и уэрам нэхъыщхьэр зэIузэпэщ ящIащ. Абы тетщ социальнэ мыхьэнэ зиIэ IуэхущIапIэхэм я нэхъыбэр: щIыналъэ сымаджэщыр, школхэр, сабий садхэр, ЩэнхабзэмкIэ унэр. А лэжьыгъэхэм къадэкIуэу, транспорт гъэувыпIэщIэ щаухуэну щIыпIэри къыхахащ.
Мы илъэсыр икIыху гъуэгу лэжьыгъэхэр зэпыунукъым. Арыкъ жылэм щызэрагъэпэщыжынущ километри 2,5 - рэ зи кIыхьагъ гъуэгур.
Гъуэгу лэжьыгъэхэмкIэ Джылахъстэнейм къыкIэрыхуркъым абы и гъунэгъу Лэскэн щIыналъэри.
Иджырей мардэхэм тету абы щызэрагъэпэщыжащ Анзорей, Лэскэн ЕтIуанэ, Ерокъуэ жылэхэр зэпызыщIэ, километри 6 зи кIыхьагъ (Ленинымрэ Щынахъуэмрэ я цIэхэр зезыхьэ уэрамхэм хуэзэр) гъуэгум и япэ Iыхьэр.
Адрей Iыхьэм хеубыдэ Степной уэрамым къыщыщIэдзауэ Лэскэн ЕтIуанэм хуэкIуэ лъэмыжым нэс. Лъэмыжри щхьэхуэу зэрагъэпэщыжынущ.
«Къуажэхэм я теплъэхэр егъэфIэкIуэн» къэрал программэм хиубыдэу Анзорейрэ Урыхурэ транспорт гъуэгуу 3 зыхуей щыхуагъазэри, гъуэгу дамыгъэхэмкIэ, уэздыгъэхэмкIэ, светофорхэмкIэ къызэрагъэпэщыжащ.
2023 гъэм къриубыдэу гъуэгу лэжьыгъэхэр щекIуэкIынущ Аргудан къуажэми. «Къэрал, щIыналъэ, щIыпIэ мыхьэнэ зиIэ автомобиль гъуэгухэр зэIузэпэщ щIын» къэрал программэм хиубыдэу абы щелэжьынущ километри 8,5-рэ зи кIыхьагъ гъуэгум.
Мы гъэм Лэскэн щIыналъэм псори зэхэту зыхуей щыхуагъэзэнущ гъуэгуу километр 20-м нэс.
