НэхъапэIуэкIэ и гугъу фхуэтщIауэ щытащ метр 4200 - кIэ Iэтауэ Iуащхьэмахуэ джабэм кIэрыт «Приют 11» альпинист хьэщIэщым иращIэкIыну лэжьыгъэхэм.
Фигу къэдгъэкIыжынщи, 1998 гъэм абы къыщыхъуа мафIэсым и Iэужьыр ягъэзэкIуэжыну иужь щихьар иджыщ. Лэжьыгъэхэр 2025 гъэм зэфIагъэкIыну я мурадщ. Илъэс куэдкIэ альпинистхэм я увыIэпIэу къекIуэкIа хьэщIэщыр тхыдэ фэеплъхэм ящыщ зыуэ къэнэжын зэрыхуейм къыхэкIыу, абы и теплъэр яхъумэнущ. КъищынэмыщIауэ, дяпэкIэ ар хьэщIэщ къудей мыхъуу, УФ-м КъызэрымыкIуэ щытыкIэхэмкIэ и министерствэм и Къэбэрдей-Балъкъэр къудамэм и къегъэлакIуэхэми я увыIэпIэу щытынущ.
Iуащхьэмахуэ и бгы лъагэ къэлъыхъуакIуэ-къегъэлакIуэ гупым я нэхъыщхъэ Гулиев Абдуллэхь къызэрыхигъэщамкIэ, иджы Iэмал ягъуэтынущ щытыкIэ гугъум ихуа альпинистхэм тIукIэ нэхъ псынщIэу ялъэIэсыну. Сыту жыпIэмэ, «Приют 11»-р Iуащхьэмахуэ и щыгу дыдэм зэрыпэIэщIэ щыIэкъым. КъегъэлакIуэхэр и лъабжьэм щежьэу альпинист лъагъуэхэм щыгъуэщахэм сыхьэтитI трагъэкIуадэу щытамэ, иджы дакъикъэ 40 - 45м къитIэсэнущ.
Альпинистхэр иджыпстуи къыщоувыIэмафIэс нэужьым лажьэу къэна дизель хьэку закъуэм щхьэкIэ «Дизельхат» зыфIаща хэщIапIэм икIи къахуэмыгъэсу ахэр поплъэ «Приют 11» хьэщIэщыщIэм. НобэкIэ Iуащхьэмахуэ и бгы нэкIухэм ущрихьэлIэнущ нэху укъыщекI хъуну езэгъыпIэхэм, «Бочка» хьэщIэщым, нэгъуэщIхэми, ауэ «Приют 11"-м и пIэм иувэн абыхэм яхэткъым, ар здэщыIэ лъагагъми нэгъуэщI щыбгъуэтынукъым.
Иджырей мардэхэм тету зэфIагъэувэжыну хьэщIэщыр, сыт щыгъуи хуэдэу, сэбэп къахуэхъунущ, зэуэ щыгум дэкIыныр къызытехьэлъэхэм: абыхэм абдежым зыщагъэпсэхуу я гъуэгуанэм пащэ хъунущ, псом ящхьэращи, хьэуар щымащIэ а лъагапIэм зыхуагъэхьэзырыну Iэмал ягъуэтынущ. Iуащхьэмахуэ дэкI гъуэгум альпинистхэр щытехьэр жэщыр хэкIуэтауэщ. Лъагэу тет «Приют 11»-м и фIыгъэкIэ, ищхьэкIэ къащыпэплъэ гъуэгу нэхъ гугъум я къарур нэхъ пэлъэщынущ .
