Урыс-Кавказ зауэм и гуащIэгъуэт, бийм гущIэгъуншэу адыгэ къуажэхэр ягъэсырт. Апхуэдэ Iуэхухэм ящыщ зым полковник Малышевскэм и Iэблэм фочышэ къытохуэ. Гупым къахэуэр илъэс 12-м ит адыгэ хъыджэбз цIыкIут. Абы пкIэунэм зыщигъэпщкIуауэ дамэдазэ гуэрым къыдэукIырт. Хъыджэбз цIыкIум шэхэр къыхуишийуэ къыбгъэдэст илъэсипщIым ит и дэлъхур. Ахэр зылъэгъуа полковникым унафэ ещI тIури псэууэ къаубыдыну. ЩIалэ цIыкIур, губгъуэ бжэным хуэдэу, зы унащхьэм илъым, адрейм лъэурэ яIэщIэкIри щIэпхъуэжащ, ауэ и шыпхъур къаубыдащ. Ар мэз джэдум хуэдэу емылыджт, яIэщIэкIыжыну хэту зауэлIхэм ядэфыщIейрт. Джанэ щыгъыр, уигъэгужьейуэ лъы защIэт, хъыджэбзым уIэгъэ телъу къахуэгъуэтакъым (уIэгъэ хъуа гуэ-рым дэIэпыкъуауэ хуагъэфэщащ). Полковникым и унафэкIэ хъыджэбз цIыкIур япэ щIыкIэ къутырым яшащ, итIанэ, полковникым и щхьэгъусэр арэзы хъумэ, пщащэ тхьэIухудыр пхъууэ къащтэну я унэ ишащ.
Наталье Сергеевнэ арэзыпсу хъыджэбзыр япIыну къащтэ. Пщащэ цIыкIур Iэнкунт, хамэбзэкIэ къепсалъэхэм ящышынэ къыщIэкIынти гъырт. Зи адэ-анэр зыфIэкIуэда пщащэ цIыкIум Наталье Сергеевнэ игу щIэгъурти, зришалIэурэ гуапэу IэплIэ хуищIырт.
Апхуэдэурэ махуэ зыбжанэ кIуащ. Наталье пхъу ищIар игъэпскIащ, щыгъыныщIэкIэ ихуэпащ, и щхьэцыр екIуу хузэригъэзэхуащ, зыгуэрурэ и цIэри къищIащ - Жэнэт. Ар бзылъхугъэм «Жаннет» цIэм иригъэщхьри, абыкIэ еджэн щIидзащ, иужькIи а цIэм къытенащ.
Жаннет къыпхуэмыцIыхужыну хъыджэбз дахэ къищIыкIат. ИтIанэ еджэфу тхэфу ирагъэсащ. Хъыджэбз цIыкIур мызэшын папщIэ дэрбзэр IэщIагъэм хуагъэсащ, унагъуэр зыхуей хьэпшып цIыкIу гуэрхэр ирагъэдурэ. Сыт хуэдиз фIыгъуэм хэсми, абы зэи и унагъуэр игу ихуртэкъым, махуэр зи кIыхьагъым егупсысырт, жэщым нэху щыху абыхэм епщIыхьырт.
Жаннет къызэрымыкIуэу дихьэхырт цIыхухъу Iэщэ-фащэхэм. «И адэ» Ипполит Петрович пщIантIэм къызэрыдыхьэжу, Iуэхуу иIэр къигъанэрти, абы и деж щIэжырт, шым телъэщIыхьырт, уанэр къытрихыжырти, Iус иритырт. ИтIанэ езыр шэсырти, шыр псафэ ишэрт. Уеблэмэ и фочри щыхуилъэщI щыIэт.
Жаннет хъыджэбз гурыхуэт, и «анэм» къыжриIэу хъуар зэригъащIэрт, зыхилъхьэрт. Ар щагъэгъуазэрт урысхэм я хабзэм, зэхэтыкIэм. ТхакIуэ цIэрыIуэхэм я IэдакъэщIэкI къыхэхахэм ирагъаджэрт, макъамэм, щэнхабзэм, гъуазджэм хагъэгъуазэрт. Жаннет гугъу демыхьыщэу пианинэ еуэкIи зэригъэщIат. Ипполит Петровичрэ Наталье Сергеевнэрэ щыгуфIыкIырт тегушхуэу къащта хъыджэбзыр зэрыгубзыгъэм, зэрыакъыл жаным, зэрыщIыкIафIэм, уеблэмэ загъэщIэгъуэжу ирипагэрт.
Зэманыр псынщIэрыкIуэщ. Жаннет и ныбжьыр илъэс 14-м щрикъуам и теплъэкIи, цIыху хэтыкIэкIи, зыIыгъыкIэкIи зыдэс къутырым къахэщт. Ар къамылыфэт, и щхьэцыгъуэр и бгым фIэкIырт. ЖыпIэнуракъэ, а щIыпIэм щыпсэу щIалэхэм ящыщу куэд Жаннет къеплъакIуэрт.
* * *
Зэгуэрым Абдул ефэндыр гъэру къахуащ. Абы куэд щIауэ урысхэр къигъапцIэрт: я щэхур и ныбжьэгъу шэрджэсхэм яхуихьырт, мыдрейуэ бийм «ныбжьэгъу» захуищIауэ шэрджэсхэм я Iуэхур зэдзэкIауэ урысхэм яIуридзэжырт, фитIнэ жыхуаIэм хуэдэт. Ар къащIэри Абдул ефэндыр яубыдауэ арат. Абы и Iэхэр быдэу пхат, пхъафэм хуэдэу къурэ хъуа и джанэр лъы защIэт. Ауэ щыхъукIи, и щхьэр лъагэу Iэтауэ, зыри къримыдзэ хуэдэ кIуэрт.
Ипполит Петрович гъэрыр я унэ къыхуашэну унафэ ищIащ (абы Абдул ефэндыр куэд щIауэ ицIыхурт). ЛIыжьым и уIэгъэхэр хуатхьэщIащ, хуапхащ, ягъэшхащ.
Жаннет и гур къилъэту зэпиплъыхьырт жьакIэ фIыцIэ зытет «хьэщIэр». Дауи, абы къыгурыIуат гъэрыр зэрыадыгэр, ауэ епсэлъэну дзыхь ищIыртэкъым.
Абдул а унагъуэм щIэх дыдэу яхэсыхьащ. Ар цIыху гушыIэрейуэ, хъыбарыбэу къыщIэкIат. Абы и урысыбзэ мащIэр хурикъурт сыт хуэдэ Iуэхугъуэри къиIуэтэжыну. Абдул Жаннет адыгэбзэкIэ къепсалъэрт, къыдэгушыIэрт, игъэдыхьэшхырт. Езыр жьэкIэ пшынэ еуэурэ къафэрт, джэгурт.
Зэщхьэгъусэхэм я пхъур ныщхьэбэ хуэдэу нэщхъыфIэу зэи ялъэгъуатэкъыми, абыхэм Абдул фIыщIэшхуэ хуащIырт. ПщыхьэщхьэхуэкIуэ щыхъум, Жаннетрэ Абдулрэ зыкъомрэ адыгэбзэкIэ зэпсэлъащ, Алыхьым ещIэ а тIур зытепсэлъыхьар… Феплъыт адэкIэ къэхъум.
* * *
Абдул ефэндыр жэщым щэхуу къыщIокIри, станицэм къыдокIуэсыкI. Жаннет шым уанэ трелъхьэ, мэшэсри, дыгъуэпшыхь зэраухылIа псы Iуфэм Абдул щыIуощIэ. Жаннет Iэ сэмэгумкIэ шхуэмылакIэр шэщIауэ иIыгът, Iэ ижьым кIэрахъуэ гъэпкIа IэщIэлът.
- Уи пщэдджыжь фIыуэ губгъуэ тхьэрыкъуэ цIыкIу, - ефэндыр пщащэм къыпожьэри шхуэIур еубыд. - Епсыхи, уанэр фIыуэ щIэзгъэкъузэж». Кърегъэпсыхри, езым шым зытредзэ.
- Плъагъурэ дахэ Iуэхур зэрыхъу… Уэ уIуэхукъым, хъумэ, иужькIэ сыкъыпкIэлъыкIуэжынщ. Сэ сопIащIэ, узыншэу! - шым йолъэдэкъауэри зреч, напIэзыпIэм ар нэхущым хокIуасэ.
Абдул ефэндым заримыгъэубыдыжын и гугъэу къэзакъхэм япэщIэтами, къикIа щыIэкъым. Ар полковникым щызэхихым и гур нэхъ псэхужащ. Ауэ зэщхьэгъусэхэм ягу къеуэр нэгъуэщIт. Апхуэдизу зыхуей хуагъазэ, зыхуэгуапэ, ягу зыкIэрыпщIа хъыджэбз цIыкIур щIэпхъуэжыну игу щIрилъхьар яхузэгъэзахуэртэкъым тIуми.
Жаннет и Iуэхур зэрымыщIагъуэр къыгурыIуэнтэкъэ? КъыгурыIуэрт, арат гъыуэ и пэшым щIыщIэсыр.
Жаннет зэрыт щытыкIэм кърашыну, трагъэун мурад яIэу Наталье Сергеевнэ и гъусэу Тифлис ягъэкIуащ. Шэч хэмылъу, абыхэм загъэпсэхуащ, я нэгу зрагъэужьащ. Шэрджэс пщащэ тхьэIухудым куэд ныбжьэгъу къыхуэхъуат. ЦIыху хыхьэмэ, и зыIыгъыкIэм, Iэдэбагъым, псэлъэкIэм, гъэсэныгъэм куэд дихьэхырт.
* * *
Ипполит Петрович зауэ къулыкъур щиухым, генерал-майор къыфIещри унагъуэр Урысейм и къалэ жыжьэ гуэрым Iэпхъуэжащ. Дауи, абыхэм ягу къеуэрт Кавказыр зэрабгынэр, зэи я гум имыхуну бгырыс Iэлхэр, ауэ щыхъукIи, къызэрымкIуэу пэжхэр, я щхьэхуитыныгъэм, хэкум папщIэ зи псэр зытыну хьэзырхэр. Ахэр здэIэпхъуэжа къалэр шынагъуэншэщ, тыншыпIэщ, псом нэхъыщхьэращи, я атэлыкъ хъыджэбзым ягу ирихь щауэ къыщыхуалъыхъуэнущ.
Зэщхьэгъусэхэр я хъыджэбз гъэфIэным хухэплъыхьырт. Дауи, абыхэм малъхъэ къулей, къулыкъу зиIэт къалъыхъуэр.
Наталье «и пхъум» и пщэм ирилъхьат налкъуткIэ гъэщIэрэщIа жор. Ар хуейт шэрджэс пщащэм чыристан дин къызэрищтар хэIущIыIу ищIыну. Абы дэнэ щищIэнт, и диныр иригъэхъуэжами, и адыгэгум зыри зэрыхуемыщIар. Жаннет фIыгъуэм хэсу псэуми, а зыхэтыр абы зэримыдунейр, зэримыгъащIэр къыгурыIуэрт. Абы а «дунейр» фIыуэ хуэлъагъуртэкъыми, зэныкъуэкъуж зэпытт… А узыр зыкIи хуэмыгъэхъужу пкърытт адыгэ пщащэм. Абы ищIэрт псом нэхъ хущхъуэфIыр - адэжь лъахэр зэрыарар. Адыгэ пщащэм хэкужьым и къарур, абы кърит гушхуэныгъэр зыпищI щыIэтэкъым. Ар зыхэт щIалэгъуалэм я зыщIыкIэм, гупсысэкIэм, дуней тетыкIэм игу иримыхь куэд хэлът. Хъыджэбзхэр Iуэхуншэ защIэ хъужрэ Iэпэ задэти зыхащIыкI мы дунейм теттэкъым. ЩIалэхэращи, хуэмыху защIэхэт. Пэжщ, абыхэм дахэу загъэфэрыщI, зыкърах, ауэ надэ защIэщ.
* * *
Апхуэдэурэ мазэ зыбжанэ дэкIауэ, Ипполит Петрович Кавказым къикIыу письмо къыхуатхащ: «Уи ныбжьэгъу генералымрэ и фызымрэ яукIри, я сабий илъэсищ фIэкIа мыхъур зеиншэу къэнащ»-псалъэхэр иту. Генералым хъыбар гуауэр гущIыхьэ щыхъуащ, икIи, куэдрэ мыгупсысэу, щIалэ цIыкIур я унэ къригъэшащ. Ар къэзышар къэзакъ зауэлI Матвейт. Абы адыгэ фащэ дахэ щыгът, щIалэ къекIут, теплъафIэт. Генералым шы фIыуэ илъагъурти, куэд щIауэ къилъыхъуэрт ар зезыхьэн. Матвей шыкIэ IэкIуэлъакIуэу генералым къыщищIэм, я деж къигъэнащ ишхэм кIэлъигъэплъыну. Абы шы мыгъасэ, емылыдж гуэр иIэти, ар щIалэм игъэсэну и къалэнт.
ЩIалэм шыр къыщIешри, мэшэс, шыр йотхауэ, фIалъэ лъакъуитIыр еIэтри кIэбдзхэмкIэ мэув, тесыр къызэтридзыну хузэфIэкI къигъанэркъым. АрщхьэкIэ, Матвей шхуэIур быдэу иIыгъщи, шыплIэм къимыхуу тесщ. А къэхъу псоми Жаннет гузавэу щхьэгъубжэмкIэ кIэлъоплъ. Матвейрэ шымрэ зэрытегъакIуэркъым. Сытми, зы зэман шыр йозэшри, кIэбдз лъакъуитIымкIэ йотIысэх. Жаннет гуфIэу долъей. ЗэрыгуфIар дауэ Матвей къригъэщIэну? И щхьэгъубжащхьэм тет удз гъэгъам щыщ къудамэ хуридзыхыну игу къокI, апхуэдэуи ещI. Матвей абы гу лъимытэу къэнакъым, ауэ гъэгъар къызыдадза щхьэгъубжэри къыдэзыдзари къыгурыIуакъым. Ауэ ар игу ирихьа хъыджэбзыр арауэ хуигъэфэщащ.
Матвей и фащэ нэхъыфIымкIэ зыкъихуапэри, генералым хуей хуэдэ, хъыджэбзыр зыщIэс пэшым щIыхьащ. ЩIалэ бгы псыгъуэм и сэмэгурабгъумIэ къамэрэ сэшхуэрэ кIэрыщIащ, ижьырабгъумкIэ кIэрахъуэ кIэрылъщ. Жаннет къэIэубжьауэ абы бгъэдэкIуатэри, адыгэбзэ къабзэкIэ еупщIащ:
- Матвей, уэ у-адыгэ?
- Си анэр адыгэщ, си адэр къэзакъщ, - адыгэбзэ къабзэкIэ жэуап къетыж мыдрейми. Жаннет и Iыхьлы гуэр къигъуэтыжа хуэдэ щIалэм щыгуфIыкIырти, зимыгъэнщIу зэпиплъыхьырт.
- Сэ сощIэ, къэзакъхэри адыгэхэм хуэдэу - фышыуейщ, фыIэщакIуэщ - и адыгэ къамэм тоIэбэ.- Саут хэлъщ, - Матвей гъунэгъу къыхуэхъуа хъыджэбзым и дахагъэм зыщимыгъэнщIу зэпиплъыхьырт.
- Матвей, уэ щхьэгъусэ уиIэ?- къызэрыжьэдэлъэтар къыгурымыIуэжу хъыджэбзым жиIэри, укIытэжащ. ЩIалэм Iэнкуну:
- Хьэуэ… уэ генералщ пхуэфащэр,- жи.
- Ауэ жыхуэпIэхэм сатеплъэну сыхуейкъым сэ!
- АтIэ къэзакъ зауэлI нэхъ къапщтэу ара?
- Матвей, зэгъусэу дыщIэгъэпхъуэж. Сэ Iэджэ щIауэ сыщIэпхъуэжыну сигу илъщ. Хъыджэбзым и мурадхэр къанэ щымыIэу хуиIуэтащ къэзакъым. ЩIалэм къыгурыIуащ Жаннет и хэкум игъэзэжын папщIэ, фIыуэ имылъагъум дэкIуэну, и хуитыныгъэм и насыпыр щхьэузыхь хуищIыну зэрыхьэзырыр.
Хъыджэбзыр къэзакъ щIалэм зэрегуэкIуар къыщищIэм дауи, генералыр губжьащ икIи ар Жаннет хуамыгъэзэну унафэ быдэ ищIащ.
- Наталье, мы къэзакъым ди мурадхэр зэтрикъутэнкIэ хуэIуа щыIэкъым. Абы дэкIуасэм дыкъэсыжакъэ - хуэтхьэусыхэрт Ипполит Петрович и щхьэгъусэм.
- Ипполит, къэзакъыр къыздикIам гъэкIуэж, зэман дэкIмэ, тIуми ягу илъыр ящыгъупщэжынущи, дэ дызыхуей щIалэм хуэдэ хъыджэбзым къыхуэдгъуэтыжынщи, зэфIэкIащ,- еущиерт бзылъхугъэр и щхьэгъусэм.
Къэзакъ щIалэр хуэзэну къызэрыпаубыдрэ Жаннет яхуэшхэртэкъым. «Сышхэну фыхуеймэ, Матвей къысхущIевгъэхьэ», - жиIэрти, хуахьыр къыщIригъэхыжырт.
Апхуэдэурэ Жаннет сымаджэ мэхъу. ЯщIэнур ямыщIэу зэщхьэгъусэхэр мэгузавэ, хэкIыпIэ къалъыхъуэ. «Бгырыс бзылъхугъэм щалъхуа лъахэр пхущыгъэгъупщэнукъым. Ар хьэкъщ. Матвей мыбеижьми хуэмыхукъым, хъыджэбзыр игъэпсэуфынущ»,- жаIэри зэщхьэгъусэхэм унафэ ящIащ япхъу гъэфIэныр абы иратыну.
Нэчыхь хурагъэтхыу хьэгъуэлIыгъуэ дахи иращIэкIа иужь унагъуэщIэр Кавказым къэкIуэж гъуэгум къытрагъэувэжащ.
* * *
Илъэсихым къриубыдэу Жаннетрэ Матвейрэ быниплI зэдагъуэтащ (къуитIрэ пхъуитIрэ). Жаннет зэи щыгъупщакъым адэ-анэ пэлъытэу иIа, зыпIа, гъэсэныгъэ дахэ къезыта цIыхуфIхэр - Ипполит Петровичрэ Наталье Сергеевнэрэ. Ахэр щIэх-щIэхыурэ зэрощIэ, зэкIэлъокIуэ, я пхъурылъхухэр къохъу, кIуэурэ ялъагъу. Ипполитрэ Натальерэ жьыщхьэ махуэ хъуауэ забжыж.
Дружинин Александр и «Мадемуазель Жаннет»
хъыбарым щыщ пычыгъуэщ.
АдыгэбзэкIэ зэзыдзэкIар
Шыгъушэ Алийщ.
Сурэтыр Пащты Герман ейщ.