Сыт хуэдэ хъыбарыфIми ущогуфIыкI, ауэ ар щIалэгъуалэм я ехъулIэныгъэхэм теухуамэ, ямылейуэ укъызэщIеIэтэ, къыпщIэхъуэ щIэблэмкIэ уиIэ фIэщхъуныгъэр нэхъ ин мэхъу. Ди щIыналъэм и дахагъыр дуней псом зэрыхэIуам хуэдэу, щыпсэу цIыхум и дахагъымрэ Iущыгъэмрэ хъыбарыжьу хамэ жылэхэм зэлъащIысат, IуэрыIуэтэжу зэIэпахырт. УсакIуэшхуэ Гамзатов Расул зы зэIущIэ гуэрым мынэхъ мащIэу цIэрыIуэ МэшбащIэ Исхьэкъ зэгуэр къыщыжриIэгъат апхуэдиз псалъэ дахэр зытеухуа адыгэхэм я пкъынэлынэм ирижэ лъыр лIэщIыгъуэбэкIэ къыпхиудурэ зэрекIуэкIынур, укIуэдынкIэ шынагъуэ уиIэу гугъэ щумыщIыжми, адыгэлъым и макъыр лъэхъэнэ жыжьэхэр зэрыщыIунур. А псалъэхэр зэпымычу гум къыдредзей ди лъэпкъэгъу ныбжьыщIэ цIыкIухэм я цIэр утыкушхуэм дахэкIэ къыщраIуэм, текIуэныгъэ къахьар ину щагъэхъыбарым деж. Апхуэдэу, иджыблагъэ Мэзкуу щызэхэта, сабийхэмрэ щIалэгъуалэмрэ я «МедиаМалъхъэдис» урысейпсо зэщIэхъееныгъэм и утыкум щекIуэкIа ГъэфIэж пшыхьым и цIэр къыщраIуащ ди щIыналъэм щыщ адыгэ хъыджэбз цIыкIум- Кумыщ Сафие.
Сабийхэмрэ щIалэгъуалэмрэ я «МедиаМалъхъэдис» урысейпсо зэщIэхъееныгъэм гуфIэгъуэ зэIущIэр щIызэхиша пэхуэщIэр хъыбарегъащIэ IэнатIэхэм я зыужьыкIэм, абыхэм яхэлъхьапхъэ бгъэдыхьэкIэхэмрэ къыщызэгъэпэщыпхъэ Iуэху щIэкIэхэмрэ ятеухуат. Зэхьэзэхуэм хэтыну хуитт курыт щIэныгъэ икIи IэщIагъэ щрагъэгъуэт IуэхущIапIэхэм щIэс ныбжьыщIэхэр, егъэджакIуэхэр, адэ-анэхэр. Псори зэгъусэу Урысейм и щIыналъэ 87-м къикIа гупхэр зэхьэзэхуэм хэтащ.
Зэпеуэм цIыху миниблым нэблагъэ хыхьащ. КъыхэкIа лэжьыгъэхэм хэплъа къэпщытакIуэ гупым абыхэм цIыху 500 къыхашащ, ахэращ щыхьэрышхуэми кIуар. Бжьыгъуэ зэфIэхьым нэсахэм яхэхуащ Налшык къалэ дэт, дерс щхьэхуэхэр куууэ щрагъэдж курыт еджапIэ №9-м щIэс Кумыщ Сафие. Адыгэ пщащэ цIыкIум и лэжьыгъэр «Видеогъэлъэгъуэныгъэхэр» унэтIыныгъэм нэхъыфI дыдэу къыщалъытащ. Сафие «Пэрытхэм я зэщIэхъееныгъэ» жылагъуэ зэгухьэныгъэм жэджэру хэт, абы и щIыналъэ медиацентрым и лэжьыгъэр ипэкIэ зыгъэкIуатэ ныбжьыщIэхэм ящыщщ.
«МедиаМалъхъэдис» урысейпсо зэхьэзэхуэм ипкъ иткIэ утыкум кърахьэну пэхуэщIэ лэжьыгъэхэр едзыгъуитIу зэхэтын хуейт: еджэныгъэм епха Iыхьэрэ зэпеуэм и утыкум щагъэлъэгъуэн хуей Iыхьэрэ. Зэпеуэм хэтхэр щхьэж и ныбжьрэ Iуэхум зэрыхуэхьэзыр теухуауэ гуп зыбжанэу зэхэдзат: медиа IэнатIэм пэрыхьагъащIэ ныбжьыщIэхэр (илъэси 8 - 13-м итхэр), лъабжьэ зиIэ ныбжьыщIэхэр (илъэс 14-м щегъэжьауэ адэкIэ кIуэхэр). Дэтхэнэ зыми къыхиха унэтIыныгъэмкIэ пэIудзауэ зыузэщI курсхэм щIэныгъэ щызрагъэгъуэтащ зэпеуэм и япэ Iыхьэм. Апхуэдэу псоми журналистикэмкIэ, видеопродакшнымкIэ, медиащэнгъасэмкIэ, блогингымкIэ, сурэт щIынымкIэ, дизайнымкIэ, псэлъэкIэмкIэ, кино техынымкIэ, нэгъуэщI куэдымкIэ я лэжьыгъэхэм ублапIэ яхуэхъун есэныгъэхэр щызыIэрагъэхьащ, ахэр утыкум ирахьа лэжьыгъэхэми хаухуэнэжащ. Зэхьэзэхуэм хэтхэм къыхуагъэув упщIэхэм жэуап ирату щызэныкъуэкъуащ етIуанэ Iыхьэм, я зэфIэкIхэр здынэсыр щагъэлъэгъуащ.
Лэжьыгъэ нэхъыфIхэр зи IэдакъэщIэкIхэр зыхэта, «МедиаЗэщIэхъееныгъэ» зыфIаща зэхуэсышхуэр Мэзкуу щызэхашэжащ. Абы къекIуэлIа цIыху 500-м Iэмал яIащ медиа IэнатIэм ехьэлIауэ ягъэхьэзыра пэхуэщIэхэмкIэ утыкум зыщагъэлъэгъуэну. Япэ махуэхэм зэпеуэм къыхэжаныкIахэм папщIэ мастер-классхэр ирагъэкIуэкIащ, къэралпсо мыхьэнэ зиIэ телередакцэхэм къыщрашэкIащ, VK интернет утыкум и хэщIапIэм щыхьэщIащ.
«Сэ сыщIохъуэпс медиадунейм и курыкупсэм сыхэтыну, «мыр Кумыщ Сафиещ» къысхужаIэу си нэтынхэмкIэ, си лэжьыгъэхэмкIэ сыкъацIыхуу сыщытыну. ФIы дыдэу къызгуроIуэ а гуращэм утемылажьэмэ, хъуэпсапIэ къудейуэ къызэрынэнур. МахуэщIэ къэс хъыбарщ, купщIэрэ щIэупщIэрэ яIэу. И купщIэр зэхэхауэ къыщIэупщIэм деж нэхьэсыныр медиа IэнатIэм и къалэн нэхъыщхьэщ. Мис ар сэри къалэн зыщысщIыжу Iуэхум сыхыхьэну сыхущIокъу. Гукъинэж сщыхъуащ «Уи макъ зэрызэбгъэпэщыжынумрэ унэрыс псэлъакIуэу укъызэрымынэжынумрэ» зыфIаща мастер-классыр. Сыту куэдым гу лъызигъэта?! КъызэрыщIэкIамкIэ, унэм къыщIэпсэлъыкIхэм ещхьт си Iуэху щIэкIэр. Ауэ мыпхуэдэ зэпеуэхэм укъыхыхьэху, цIыху нэхъыбэ нэIуасэ къэпщIыху, фIыуэ плъагъу IэнатIэми хууиIэ зэхэщIыкIри нэхъыбэ хъунущ. СыхущIегъуэжыркъым зэпеуэм сыкъызэрыхыхьам, слъэгъуамрэ си нэгу щIэкIамрэ къару къысхалъхьауэ къысщохъу. Уи макъыр зэхахыну ухуеймэ, узыщымысхьыжу улэжьэн хуейщ. Лажьэращ лыжь зышхыр, зи гуащIэ емыблэжращ и гуащIэдэкIым щыгуфIыкIыжыр», – жиIащ Кумыщ Сафие.
Зэпеуэм къыщыхэжаныкIахэмрэ щытекIуахэмрэ «Известия Hall» утыкушхуэм щагъэфIэжащ. НыбжьыщIэхэм я лэжьыгъэр зэрырагъэфIэкIуэн техникэщIэхэр тыгъэу иратащ, журналистикэм зыпызыщIэну хуейуэ зи лэжьыгъэр нэхъыфI дыдэу къалъытахэми пресс-картэхэр иратащ. А картэхэр зыIэрыхьахэм Iэмал яIэщ сыт хуэдэ Iуэхугъуэ къэралым щемыкIуэкIми, кIуэуэ абы теухуа нэтын игъэхьэзырыну.
Утыкушхуэм екIуу зыщызыгъэлъэгъуа адыгэ пщащэм и зэфIэкI нэхъыбэ хъуну, и цIэр фIыкIэ куэдрэ къраIуэну ди гуапэщ.
