Ди щIалэхэм медалиплI къахьащ

 Грэпплинг

Грэпплингыр бэнэкIэ лIэужьыгъуэщIэу ди къэралым и спорт IэнатIэм къыхыхьахэм ящыщщ. Мыдрей дызэсахэм емыщхьу, мыбы сыт хуэдэ фэбжьи уи пэщIэщIэгъум епхыну хуит уещI. Уеблэмэ и пщэр щыпкъузыкIыу бэуапIэ иумытыну ухуитщ.
Мы спорт лIэужьыгъуэм и сэбэпынагъэу къалъытэр къарукIэ къыппэщIэувэм зыщыпхъумэжыфынырщ. Мыбы дихьэх сабийр шынэкъэрабгъэ хъунукъым, гушхуауэ, и къарукIэ иIэ лъэкIыныгъэм щыгугъыу къохъу.
Санкт-Петербург грэпплинг спорт бэнэкIэ лIэужьыгъуэмкIэ Урысейм и чемпионат щекIуэкIащ. Мыбы хэтащ спортсмен 500. Абы щыщу 6-р Къэбэрдей-Балъкъэрым щыщт. Килограмм 92-рэ зи хьэлъагъ гупым Урыс Мухьэмэд япэ увыпIэр, Хьэсанэ Мурат етIуанэр къыщахьащ. ГуэныкIэ Зауррэ Муфсаров Хьэбибрэ килограммищэ хъухэм я деж ещанэ щыхъуащ.
Ди спортсменхэм я гъэсакIуэхэр Юнус Рустамрэ Шыхъуэстэн Русланрэщ.

Триатлон

Ди спортсмен ныбжьыщIэр ещанэщ

Триатлоныр атлетикэ псынщIэм пэблагъэ спорт лIэужьыгъуэщ. Мыбы щызэпеуэнкIэ хъунущ лъэсуи лъакъуэрыгъажэкIи къызэдэжэнымкIэ, псы есынымкIэ, нэщанэ еуэнымкIэ, нэгъуэщIхэмкIи. Мыр куэдым икъукIэ яфIэгугъусыгъу спорт зэхьэзэхуэщ. Мыбы зэ зэпеуэгъуэм лIэужьыгъуищщ хагъэхьэр. Нэхъыбэу километриплIым нэблагъэкIэ псым есынкIэ зэпоуэ, километри 180-кIэ зэхэту лъакъуэрыгъажэкIэ, лъэсу къызэдожэ. Сэбэпынагъыу мыбы халъагъуэр Iэпкълъэпкъым зэрызригъэужьымрэ цIыхур Iэчлъэч зэрищIымрэщ. Абы къищынэмыщIауэ гу, лышх узхэм ущехъумэ, пшэр уигъэхъуркъым, Iэжан-лъэжан уещI, гукъыдэж къует, уи щхьэ куцIыр нэхъыфIу егъэлажьэ.
Спорт джэгукIэ лIэужьыгъуищу зэхэту илъэс 15 - 16 зи ныбжь щIалэхэри хъыджэбзхэри Урысейпсо зэхьэзэхуэм щызэпеуахэщ. Ар щекIуэкIащ Ростов къалэм. Зэпеуэм хыхьэрт нэщанэ еуэныр, псы есыныр, къызэдэжэныр. КърихьэлIахэр командиплIт зэрыхъур - Къэбэрдей-Балъкъэрыр, Краснодар крайр, Ростов областыр, Луганск Республикэр. Ди спортсменхэр 6 хъурти, ещанэ увыпIэр Воронин Артём къихьащ. Абы и гъэсакIуэр Зенин Сергейщ.