Я щыпэщIэкъым«Ищхъэрэ унэтIыныгъэ-2» газ бжьамийр къэзыгъэуахэм США-м и тIасхъэщIэх IуэхущIапIэхэр зэрахэтар щIауфэну хущIокъу, хэбгъэзыхьмэ, Iуэхур зыхэзыгъэкIхэр ягъэщхьэрыуэну яужь итщ: зэм «украинэ лъагъуэ» къагъуэт; зэми нэгъуэщI къагупсыс. Ауэ ар апхуэдэу зэрыщытым шэч къытозымыгъэхьэр Америкэм и Штат Зэгуэтхэм апхуэдэ щIэпхъаджагъэр я щыпэщIэу къызэрыщIэмыкIарщ. Уеблэмэ, ахэр ещхьт Вашингтон СССР-м и экономикэр къигъэтIэсхъэн мурадкIэ «зауэ щIыIэм» къыщигъэсэбэпа Iэмалхэм. НаIуэу зэрыщытщи, Совет Союз абрагъуэм и экономикэм и зэIузэпэщыгъэр куэдкIэ елъытат щIыдагъэрэ газу нэгъуэщI къэралхэм ярищэм. Ди жагъуэгъу нэхъыщхьэхэм яхузэфIэкI къагъанэртэкъым а къигъэхъуапIэ лъэщыр зэхуащIын папщIэ. «Дыщэ фIыцIэмкIэ» я гуращэхэм нэхъ тыншу лъэIэсырт: я IупэфIэгъу Сауд Хьэрыпым гурыIуэрти, уасэхэр ирагъэхуэхырт, ауэ гъэсыныпхъэ щхъуантIэм ехьэлIауэ ар къайхъулIэртэкъым. Къахуэнэжыр щIэпхъаджагъэхэм яхуэкIуэнырт. Экономикэ Iуэхухэм ятеухуа зэIущIэм щыIэу 1981 гъэм Франджым и президент Миттеран Франсуа США-м и Iэтащхьэ Рейган Рональд жриIащ езым и къэралым и щэхурылажьэ IэнатIэхэм я хъым КГБ-м и полковник Ветров Владимир къызэрихуар. Иужьрейр и унафэщIт чекистхэм нэгъуэщI щIыналъэхэм къыщаугъуея хъыбархэм, дэфтэрхэм я мыхьэнэмрэ пэжагъымрэ къэзыхутэ къудамэм. Ветровым хэIущIыIу ищIащ ди тIасхъэщIэххэу, ди къэралым къыхуэлажьэхэу 200-м щIигъу, абы яритащ техникэм пыщIа дэфтэр куэд. Унэ хужьым экономикэмкIэ и чэнджэщэгъу Вайс Гас ЦРУ-м и Iэтащхьэ Кейси Уильям игу къигъэкIауэ жаIэ Ветровыр къагъэсэбэпу технологие мытэмэмхэм я тхылъхэр Совет Союзым Iэрагъэхьэну. Абыхэм япкъ иткIэ ягъэхьэзыра Iэмэпсымэхэр зы зэман дагъуэншэу лэжьэнущ, ауэ иужькIэ зыри пэмыплъауэ къызэтещэхэнущ. Апхуэдэуи ящIащ. Агентхэм Iэрагъэхьащ зи гугъу тщIы шынагъуэм хуэдэхэмкIэ узэда технологием я пэхуэщIэхэр. Зыкъомрэ къапщыта иужь ахэр къагъэсэбэпу щIадзащ. Псом хуэмыдэу газ къыщIэшыным, гъэIэпхъуэным егъэщIылIа IэнатIэхэм. Мазэ зыбжанэкIэ хъарзынэу лэжьа иужь зыр зым кIэлъыкIуэу зэIыхьэу хуежьащ насосхэр, турбинэхэр, н.къ. ИкIэм-икIэжым я мурадар къайхъулIащ: 1982 гъэм и гъэмахуэм Уренгой-Сургут-Челябинск газ кIуапIэ бжьамийр зы щIыпIэм и деж къыщыуащ. Къэхъуам и Iэужьхэр гъэзэкIуэжыным мазэ зыбжанэ ихьащ, СССР-м ахъшэшхуэ къыIэрымыхьэу къэнащ. Арат КъухьэпIэр зыхуейри. Дауи, ар СССР-м хэIущIыIу щащIакъым, арщхьэкIэ Уфа и гъунэгъуу Аша гъущI гъуэгу станцым километри 10-кIэ фIэкIа пэмыжыжьэу къэхъуа насыпыншагъэм цIыхухэр апхуэдизкIэ игъэгужьеяти, ар зэрыпхущIауфэфын Iэмал щыIэтэкъым. 1989 гъэм мэкъуауэгъуэм и 4-м и жэщым абдеж цIыху зышэ мафIэгуитI щызэблэкIым газ бжьамий абрагъуэр къауэри, къэлында мафIэм цIыху 654-рэ хисхьащ, абыхэм ящыщу 200-р сабийт. Iуэхур зэхэзыгъэкIахэм къахутащ илъэсиплI ипэкIэ ухуэныгъэхэр щекIуэкIым эскаваторыр зы щIыпIэм и деж бжьамийм щыжьэхэуауэ щытауэ. Зэман дэкIри, иушкIумбар пхрыфыкIыу щIидзащ. Абдеж газ къыдиху щыхъуащ. МафIэгуитIыр щызэблэкIым абыхэм я шэрхъхэм къыщIидза хъуаскIэхэм газыр къагъэуат. Судыр илъэсихкIэ екIуэкIащ, ягъэкъуаншэ къулыкъущIэхэм ящыщу зыри ягъэтIысакъым. Хилъэфар хэкIуэда тхьэмыщкIэхэмрэ хэщIыныгъэшхуэ зыгъуэта къэралымрэщ. АрщхьэкIэ илъэс куэд дэкIа иужь Стэнфорд и университетым и профессор Швейцер Питер къыдигъэкIа тхылъым сэтей къыщищIащ Уфа и гъунэгъуу къыщыхъуа насыпыншагъэмкIэ къуаншэр эскаваторым тесар зэрыармырар. Ар зи IэдакъэщIэкIыр совет газ кIуапIэ бжьамийхэр зэIыгъэхьэным хуэгъэзауэ ЦРУ-мрэ франджы тIасхъэщIэх IуэхущIапIэмрэ ирагъэкIуэкIа Iуэхухэрщ. Газыр мафIэгуитIыр щызэблэкIым къызэрыуар зэрымыщIэкIэ къэхъуа насыпыншагъэщ. Американ IэщIагъэлIым жиIэрт апхуэдэ насыпыншагъэхэр къэзыша хьэгъэщагъэ куэд хамэ къэрал тIасхъэщIэх IуэхущIапIэхэм зэрызэхащIыхьар. Мыри аращ. Профессорым и тхылъым СССР-м и Iэтащхьэ Горбачев Михаил щыгъуазэ ящIат, арщхьэкIэ мыбы нэхъ къищтащ КъухьэпIэм фIэмынэмэ: ар зыхущIэкъур ткIиягъыр къэгъэщэбэным теухуа политикэр пхыгъэкIынырт. Пэжщ, мыпхуэдэ къулейсызыгъэхэр ухуакIуэхэм я емыгугъуныгъэкIэ е я щыуагъэкIэ къыщыхъуи щыIэщ, арщхьэкIэ сыт хуэдэ IэмалкIи Совет Союзыр лъэрымыхь щIыным теухуауэ Вашингтонрэ абы къуэтхэмрэ зэпымыууэ зытета гъуэгум иджырей Урысейм ехьэлIауи зэрызимыхъуэжам шэч хэлъкъым. Арат «Ищхъэрэ унэтIыныгъэ-2» газ кIуапIэ бжьамийр къызэрыуам США-р «зэрыхэлIыфIыхьар» зыми щIимыгъэщIагъуэр.
Поделиться:
Читать также:
26.04.2024 - 17:06 →
Тызылыкъуэр пэщIэдзэт
22.04.2024 - 16:16 →
Зы мащэм цIыху 233-рэ
22.04.2024 - 14:55 →
АдыгэлIым и цIэмрэ и картэмрэ
19.04.2024 - 16:34 →
Нартхэм я ныбжьыр
17.04.2024 - 12:43 →
Шуудзэ хъыжьэм и тхыдэ напэкIуэцI
|