Гулъытэшхуэ хуащI

ЦIыкIухэм фIагъ лъагэ зиIэ медицинэ дэIэпыкъуныгъэхэр ягъуэтыным теухуауэ КъБР-м Узыншагъэр хъумэнымкIэ и министерствэм сытым дежи лэжьыгъэ пыухыкIахэр ирегъэкIуэкI. Сабийхэм зыхуэныкъуэ медицинэ Iуэхутхьэбзэхэр щыхуащIэу щIыналъэм щолажьэ Узыфэ зэмылIэужьыгъуэхэр зыпкърытхэм щеIэзэ республикэ сабий клиникэ центрыр, абы и поликлиникэ къудамэу 10, район сымаджэщхэм сабийхэм щеIэзэ и къудамэхэр, педиатрие пэшхэр. ЦIыкIухэм я узыншагъэр егъэфIэкIуэжынымкIэ, зэфIэгъэувэжынымкIэ щыIэщ «Звездочка» сабий санаторэр, Сабий реабилитацэ центрыр.

Республикэм и педиатрие IэнатIэм зегъэужьыным, сабийхэм ягъуэт медицинэ Iуэхутхьэбзэхэр егъэфIэкIуэным ипкъ иткIэ, абыхэм зыхуэныкъуэ дэIэпыкъуныгъэхэр щагъуэт IуэхущIапIэхэр къагъэщIэрэщIэж. Республикэ сабий клиникэ центрым щрагъэкIуэкI зэгъэпэщыжыныгъэ лэжьыгъхэр и кIэм нэблэгъащ. ЖыпIэнурамэ, нэхъ Iуэху гугъухэр ящхьэщыкIащ: унащхьэр, бжэ-щхьэгъубжэхэр, ток зэрекIуалIэ, зэрагъэхуабэ Iэмэпсымэхэр зэрахъуэкIащ, унэм и щIыбыр зыхуей хуагъэзащ.
 Сабийхэм фIагъ лъагэ зиIэ медицинэ дэIэпыкъуныгъэхэр егъэгъуэтынымкIэ мы IуэхущIапIэр Кавказ Ищхъэрэ федеральнэ щIыналъэм щыIэ медицинэ центр нэхъ лъэщхэм ящыщ зы хъунущ. Республикэ сабий клиникэ сымаджэщыр цIыкIухэм медицинэ дэIэпыкъуныгъэ етынымкIэ щIыналъэм узыншагъэр хъумэнымкIэ и IэнатIэм и IуэхущIапIэ нэхъыщхьэщ, мы зэманым педиатрие IэнатIэр зэуIуу абы щолажьэ. Апхуэдэу сымаджэщым хэту къызэIуахынущ сабий эндокринологиемкIэ, нефрологиемрэ къыдалъхуауэ иIэ псантхуэ-лыпцIэналъэ узыфэхэмкIэ, генетикэ, куэдрэ узримыхьэлIэ узыфэ щIагъуэхэмкIэ центр, реабилитацэмкIэ, офтальмологиемкIэ къудамэхэр, апхуэдэуи микробиологиемкIэ лабораторие, хирургие корпус щхьэхуэ. 
 Сымаджэщым Iуэхутхьэбзэхэр щыхуащIэ унэтIыныгъэ 20-мкIэ, КъБР-м и районхэмрэ къалэхэмрэ щыпсэу сабий куэдым абы я узыншагъэр щрагъэфIэкIуэж.
 КъищынэмыщIауэ, мы зэманым зэгъэпэщыжыныгъэ лэжьыгъэхэр щрагъэкIуэкI Тэрч район сымаджэщым и сабий поликлиникэ къудамэм, РДКМЦ-м и къалэ сабий поликлиникэхэу №№1,4-хэм. 
 Сыт и лъэныкъуэкIи зыхуей хуагъэзэжащ икIи сымаджэхэм я тыншыпIэм хуэщIауэ IэнатIэр щызэтеублащ Май, Бахъсэн район сымаджэщхэм сабийхэм щакIэлъыплъ и къудамэхэм, РДКМЦ-м и поликлиникэ №1-м.