Мэлбахъуэ Тимборэ и цIэр зезыхьэ тхылъ хъумапIэм «Библиотекэм тхылъ ет» урысейпсо Iуэхум хэту «ШыщхьэуIу тхылъаджэ» фIэщыгъэм щIэт зэхыхьэ иджыблагъэ щекIуэкIащ.
Библиотекэм и унафэщI, филологие щIэныгъэхэмкIэ доктор, профессор, КъБР-м щIэныгъэхэмкIэ щIыхь зиIэ и лэжьакIуэ Емуз Анатолэ зэIущIэр къыщызэIуихым абы кърагъэблэгъа тхакIуэхэм зэрызурэ я гугъу ищIащ.
-Мыпхуэдэ зэхыхьэхэм ди къэралым щыпсэу тхакIуэхэр зэкъуегъэувэ, зэрегъэцIыху, апхуэдэу, цIыхур тхылъ еджэным дегъэхьэхынымкIи щхьэпэщ, - жиIащ Емузым.
«Библиотекэм тхылъ ет» Iуэхум хэту абы къыдэкIыгъуэ 500-м нэблагъэ тхылъ хъумапIэм тыгъэ хуищIащ. Емузым зэрыжиIамкIэ Лъэпкъ библиотекэм цIыху мин 72-м нэблагъэ йокIуалIэ, абы къикIращи, цIыхухэр тхылъ йоджэ.
УсакIуэ, КъБР-м щэнхабзэмкIэ щIыхь зиIэ и лэжьакIуэ Моттаевэ Светланэ тхылъым цIыхум дежкIэ мыхьэнэшхуэ иIэу къызэрилъытэр жиIащ къыщыпсалъэм.
ЦIыхухэм я хуитыныгъэхэмкIэ уполномоченнэу КъБР-м щыIэ Зумакулов Борис библиотекэм хуиIэ фIылъагъуныгъэм тепсэлъыхьащ. Лъэпкъ библиотекэр ди щIыналъэм щыпсэухэм я щэнхабзэ Iэужьыр щагъэлъапIэ, пщIэ лей щыхуащI щIыпIэу къызэрилъытэр жиIащ къэпсалъэм. Зумакуловым тхылъ 50-м нэблагъэ библиотекэм тыгъэ хуищIащ.
КъБР-м щIыхь зиIэ и журналист, Къэбэрдей-Балъкъэрым и къэрал саугъэтым и лауреат Къудей Владимир жиIащ кърахьэжьа Iуэхум щIэджыкIакIуэмрэ тхылъымрэ зэришалIэу къызэрилъытэр.
Лъэпкъ библиотекэм езым и дежкIэ иIэ мыхьэнэр зэрыиным теухуауэ щытащ «Горянка» газетым и редактор нэхъыщхьэ Къаныкъуэ Заринэ и къэпсэлъэныгъэр.
УФ-м щэнхабзэмкIэ щIыхь зиIэ и лэжьакIуэ Арзанус Александрэ тхылъым цIыхум и гупсысэр, дунейм еплъыкIэр убзыхунымкIэ мыхьэнэшхуэ иIэу къызэрилъытэм, абы и лъэныкъуэкIэ библиотекэм игъэзащIэ къалэным и гугъу ищIащ къыщыпсалъэм.
