«Унэ нэхъыфI. ПщIантIэ нэхъыфI» фIэщыгъэм щIэт 2-нэ урысейпсо зэпеуэр Къэбэрдей-Балъкъэрым щрагъэжьащ.
«Урысей зэкъуэт» политикэ партым къыхилъхьа зэпеуэмкIэ я мурадыр къат куэду зэтет унэхэм щыпсэухэм я зэдай мылъкум хуагъэсакъынырщ, яхь жэуаплыныгъэр зэхрагъэщIэнырщ. КъищынэмыщIауэ, апхуэдэ унэхэм щыпсэухэм яIэ хуитыныгъэр ягурыгъэIуэнымрэ къат куэду зэтет унэхэр зэрызрахьэнур зыубзыху хабзэщIэхэм жылагъуэр щыгъэгъуэзэнымкIэ щхьэпэщ мы Iуэхур.
Зэпеуэм наIуэ къищIын хуейщ унэхэр зэпэщу зезыхьэхэм къагъэсэбэп Iэмалхэр. Ар зи фIыщIэ цIыху жыджэрхэмрэ унэхэр зезыхьэ IуэхущIапIэхэмрэ я цIэ ираIуэнущ.
Iуэхум и къызэгъэпэщакIуэщ «Урысей зэкъуэт» политикэ партыр, УФ-м Ухуэныгъэмрэ псэупIэ коммунальнэ хозяйствэмкIэ министерствэр, «Фонд развития территорий» компаниер, «ЖКХ Контроль» IуэхущIапIэр.
Зэпеуэр лIэужьыгъуэ зыбжанэу гуэшауэ щытынущ: «ПщIантIэ нэхъыфI», «Унэ зэрыIыгъ», «Унэ щIыхьэпIэ нэхъыфI», «Хуабэр, уэздыгъэр щызэрагъэзахуэ унэ». Къапщытэнущ пщIантIэр зэрызэгъэпэщар, унэм щIэсхэм абы ирахьэлIа къарур, лъэпощхьэпо зрихьэлIэхэм зэгъусэу хэкIыпIэ къызэрыхуагъуэтыр, псэупIэм теухуауэ зыхурагъащIэ Iуэхутхьэбзэхэм текIуадэ ахъшэр зэрагъэмащIэ щIыкIэр къалъытэнущ. Мы зэпеуэм цIыху щхьэхуэхэри, IуэхущIапIэхэри хыхьэ хъунущ икIи ирагъэхь лъэIу тхылъхэр абы хухаха moydom.er.ru. сайтым макIуэ. Тхылъхэр ягъэува жыпхъэхэм итмэ, «цIыхубэ IэщIагъэлIхэм» я деж Iэ Iэт щрагъэкIуэкIыну я сайтым къралъхьэнущ. Абы щытекIуэхэм федеральнэ къэпщытакIуэ гупыр хэплъэнурэ, нэхъыфIхэр къыхахынущ.
Хэтынухэм жэпуэгъуэм и 10 пщIондэ зрагъэтх хъунущ. ЦIыхубэ Iэ Iэтыр щэкIуэгъуэм и 30 пщIондэ екIуэкIынущ. Абы кърикIуахэр дыгъэгъазэм и 1 - 8-хэм къызэщIакъуэжыну трагъэпсыхьащ. ТекIуахэр дыгъэгъазэм и 20-м нэхърэ мынэхъ кIасэу ягъэлъэпIэну я мурадщ. ТекIуахэм я цIэ-унэцIэр абы хухаха moydom.er.ru сайтым къралъхьэнущ.
Зэпеуэм электрон жыпхъэм иту зебгъэтх, тхылъхэр ебгъэхь хъунущ, https://moydom.er.ru сайтым ит упщIэхэм сыхьэтыр 18:00 хъуху жэуап епту жэпуэгъуэм и 10 пщIондэ ебгъэхьын хуейщ. Абы ебгъэхь хъунур къат куэду зэтет унэхэм щIэсхэр зэхыхьэу ящIа е зэлэжьа гуэрщ.
ЛъэIу тхылъым Iэмал имыIэу къыщыбгъэлъэгъуапхъэхэр:
- УФ-м и щIыналъэ уздыщыщыр;
- Муниципальнэ IуэхущIапIэр, щапхъэу къагъэлъагъуэ унэм и бжыгъэр;
- Зыхиубыдэ номинацэр;
- Эссер печатнэ дамыгъэу мини 8-м щIигъу хъунукъым. Абы Iэмал имыIэу итын хуейщ:
- къат куэду зэтет унэм щIэсхэм зэфIаха Iуэхур (зи гугъу ящI Iуэхур кIэщIу къетхэкIын);
- къагъэсэбэпа Iэмалхэр;
- ящIам кърикIуар (бжыгъэ пыухыкIа е Iуэху зэфIэкIа гуэр);
- унэм е абы елэжь, и унафэ зыIэщIэлъ компанием хъыбарегъащIэ IэнатIэхэмкIэ къата видео е тхыгъэ тедзауэ щыIэмэ, абыхэм я электроннэ ссылкэхэр е газетым традза тхыгъэм и скан дэщIыгъупхъэщ. Видеом и ссылкэр YouTube каналым илъын е куэд щеплъыфыну сервисхэм щыбгъуэтын хуейщ.
Тхыгъэм ящIа лэжьыгъэр къытещу (Iэмал зэриIэкIэ зэрыщытамрэ иужькIэ иращIамрэ плъагъуу) сурэтипщIым нэблагъэ (150 кб дэтхэнэри хъууэ) и гъусэн хуейщ.
ТекIуэхэмрэ къыхэжаныкIахэмрэ щIыхь тхылъхэр, ахъшэ сертификатхэр, фэеплъ саугъэтхэр иратынущ. Зэпеуэм хэт дэтхэнэми абы и къызэгъэпэщакIуэхэм къабгъэдэкI фIыщIэ тхылъ хуагъэхьынущ.
Фигу къэдгъэкIыжынщи, гъэ кIуам Налшык къат куэду зэтету дэт унэхэм яз «Лучшая практика работы ТСЖ» унэтIыныгъэмкIэ урысейпсо зэпеуэм щытекIуауэ щытащ. Кадыровым и цIэр зезыхьэ уэрамым тет №24 унэм «дыжьын» къыхуагъэфэщащ. ТекIуахэр къыхэзыхар IэщIагъэлIхэм я закъуэкъым, онлайну Iэ Iэт ирагъэкIуэкIати, абы цIыху мини 127-рэ хэтащ.
Кадыровым и цIэр зезыхьэ уэрамым тет №24 унэр жьы, кхъахэ хъуа унэхэм къыщIагъэкIхэм хуащIауэ щытащ. Абы щыпсэухэр зэгухьауэ (ТСЖ къызэрагъэпэщащ) хуэмуурэ я унэр ирагъэфIакIуэ, зыхуей хуагъазэ. Абыхэм я пщIантIэм сабий джэгупIэхэр дащIыхьащ, кIэрыхубжьэрыху идзыпIэхэр ирагъэувэкIащ, унэм къедзылIа щIыр зыхуей хуэзэу зэрахьэ, пандусхэр яIэщ, унэм щыпсэухэм щIэх-щIэхыурэ зэгъусэу Iэхэлъахэр ягъэкъабзэ.