«Динамо» (Ставрополь) - «Спартак-Налшык» (Налшык) - 0:0, пенальтикIэ - 5:3. Ставрополь. «Динамо» стадион. ШыщхьэуIум и 23-м. ЦIыху 600 еплъащ.
Судьяхэр: Шипков (Белореченск), Ежак (Сочэ), Новиков (Дон Iус Ростов).
«Динамо»: Лизенкэ, Дудаев, Исик, Пучков, Багателие, Эпхошвили, Бронников, Кучиев (Карагезов, 61), Кириленкэ, Кокоев, Серченков (Болгов, 79).
«Спартак-Налшык»: Къумыкъу, Далиев, Торосян, Масленников, ХьэцIыкIу (Блий, 65), Березов, Селяев (Жангоразов, 46), Гъуэгузокъуэ, Хьэшыр, Топурие (Мэкъуауэ А., 80), ЛIуп (Котов, 83).
Дагъуэ къыхуащIащ Пучковымрэ Торосянрэ
Илъэс етIуанэ хъуауэ зэкIэлъхьэужьу «Спартак-Налшыкым» и футболистхэр Урысей Федерацэм футболымкIэ и кубокыр къэхьыным теухуа зэхьэзэхуэм и япэ дыдэ лъэбакъуэм щолъэпэрапэ, Ставрополь крайм и командэхэм яхуэзэурэ. Нэгъабэ апхуэдэу къезыщIар топджэгур зи IэщIагъэу щымыт «Ставропольагросоюз»-м и мэкъумэшыщIэхэрамэ, иджы и нэхъыбэм я ныбжьыр илъэс тIощIым щIимыгъуа «Динамо»-м и футболист щIалэщIэхэращ. Вэсэмахуэ налшыкдэсхэм къапэщIэтам я къарур кърибгъэлъэгъуэну ирикъунущ мыгъэрей зэхьэзэхуэм щрагъэкIуэкIа джэгугъуитхуми ахэр къызэрыхагъэщIар икIи зыхэт гупым иужь дыдэ увыпIэр зэрыщаIыгъыр къэплъытэмэ.
Апхуэдизрэ зыфIахьа Ставрополь и «Динамо»-р хущIэкъуащ «Спартак-Налшыкым» и деж зыщигъэкъэбзэжыну. ИкIи ар абы къехъулIащ. Джэгум и кIыхьагъкIэ ар ди щIалэхэм зыкIи къапикIуэтакъым, уеблэмэ «Спартак-Налшыкым» и гъуащхьэтет Къумыкъу Аслъэнбэч мыхъуатэмэ джэгум хухаха зэманым хагъэщIэфынут. АрщхьэкIэ зэпэщIэтыныгъэр зэрытемыгъэкIуауэ, 0:0-у, щиухым зэIущIэ нэужь пенальтихэм Iуэхур хуэкIуащ. Абдежым хэгъэрейхэр щынэхъыфIу къыщIэкIащ: ставрополдэсхэм я топитхури метр пщыкIузым и деж щыту дагъэкIащ, дыдейхэм ящыщу Далиевыр гъуащхьэтетым ебзэджэкIыфакъым.
КъыкIэлъыкIуэ джэгугъуэр «Спартак-Налшыкым» Урысей Федерацэм футболымкIэ и етIуанэ лигэм и «Б» дивизионым и ЕтIуанэ гупым щригъэкIуэкIынущ. ФокIадэм и 3-м ди щIалэхэм кърагъэблэгъэнущ Мэхъэчкъалэ и «Легион»-р.
Хьэтау Ислъам.