ЦIыху куэдыр иджыпсту топсэлъыхь хы ФIыцIэм и къабзагъэм шэч къытрахьэу. Ар щалъагъу дунейм и къэхъукъащIэхэм я зэранкIэ иужьрей илъэс зыбжанэм псым куэд зэрызэтрикъутэм.
- Сочэ и курортхэм я зэфIэкI псори ирахьэлIэ цIыхухэм я зыгъэпсэхугъуэ зэманыр шынагъуэншэу къызэгъэпэщыным. Мы илъэсым зэрыщIидзэрэ УФ-м и «Роспотребнадзор» IуэхущIапIэм и лэжьакIуэхэм мини 3-рэ къапщытащ физико-химие, бактерие я лъэныкъуэкIэ псым и щытыкIэр, - къет къалэ администрацэм и хъыбарегъащIэ IэнатIэм.
ЗыгъэпскIыгъуэ зэманым и кум хуэзэу (бадзэуэгъуэм и 14-м къыщыщIэдзауэ шыщхьэуIум и 20-м нэсыху) къэпщытэныгъэу 400 ирагъэкIуэкIащ. Абыхэм къызэрагъэлъэгъуамкIэ, псым и къабзагъэр зытетын хуей мардэм текIакъым. Иджыпсту зэманыр здынэсам хы ФIыцIэм и Iуфэхэм зыщагъэпсэху цIыху мини 195-м.
- ЩIыпIэм щыпсэухэри зыгъэпсэхуакIуэ къакIуэхэри щIэгузэвэн щымыIэу, Сочэ къалэм и Iэтащхьэ Копайгородский Алексей сыт щыгъуи и нэIэ тетщ «Роспотребнадзор»-м къигъэува къабзагъэ мардэхэр зыгъэпскIыпIэ щIыпIэхэм зэрыщагъэзащIэм, - жеIэ Сочэ къалэм и администрацэм курортхэмкIэ, туризмэмрэ ерыскъыхэкIхэмкIэ и Департаментым и унафэщI Ярыш Кирилл.
Псым и щытыкIэр махуипщI къэскIэ зэ лабораторэм къыщапщытэ, зэрагъэува пIалъэм тету, ар къыщащтэри цIыху нэхъыбэ зэкIуалIэ зыгъэпскIыпIэхэрщ. Мы гъэм зэрыщIидзэрэ цIыхур зэфэ псым и щытыкIэри мини 6-рэ къапщытащ - псори тэмэмщ.
Мыр щIыдгъужынщ: мы махуэхэм Сочэ къалэм иригъэблэгъащ и мелуан еплIанэ зыгъэпсэхуакIуэр. Ар Астрахань къалэм щыщ Жоховэ Юлие техуащ. Зи насып кърихьэкIа пщащэм иратащ зыхуей хуэзэу бгылъэ щIыпIэхэм зэрызыщигъэпсэхунумрэ дунеяплъэ къызэрырашэкIынумкIэ щыхьэт тхылъымрэ.
Мы гъэм Сочэ иригъэблэгъэфынущ цIыху мелуани 7-м щIигъу. Ар нэгъабэ нэхърэ цIыху мин 200-кIэ нэхъыбэщ.
