Куэд къыбжеIэЦIыхум и цIэм куэд къыбжеIэ. ЩIэныгъэлIхэм къызэралъытэмкIэ, дэтхэнэми зэрихьэ цIэм езыр хуэфэщэжу, ар зэрызэхэт макъхэм я IукIэм ещхь гуэр хэлъу щытщ. Адыгэхэм гулъытэшхуэ хуащIу щытащ дунейм къытехьа сабийм хуэкIуэ цIэ фIэщыным. ЦIэхэр къызэрыхахыр лIыхъужьыгъэ зыхэлъ цIыху губзыгъэхэм я фэ ираплъурэт е къыщалъхуа зэман, зрихьэлIа къэхъукъащIэ иралъытурэт. Дауэ хъуми, сабийм фIащыну цIэм япэм нэхъ егугъуу икIи нэхъ хуэсакъыу щытащ. Иджы, ди зэманым, сабийм цIэ фIащыныр къызэрыхахыр лIыгъэрэ акъылрэ зыбгъэдэлъ цIыхухэм я фэ ираплъурэкъым. Ар зэлъытари цIыхум и гупсысэкIэм, и дуней тетыкIэм зэрызихъуэжарауэ къыщIэкIынщ. Нэхъапэм сабийм адыгэцIэ фIащу щытамэ, иджы нэгъуэщI къэралым къикIа цIэщ фIащыр. Дэ зэрытщIэщи, пасэрей зэманым адэ-анэм я быным цIэ фIащыжу щытакъым. Абы хуитыр адэшхуэ-анэшхуэхэрт, адэ шыпхъухэрт. Арауи къыщIэкIынт абыхэм фIащ цIэр лIыхъужьыгъэрэ акъыл жанкIэ гъэнщIауэ щIыщытыр. ЦIыхур нэхъ хъума хъунущ, нэхъ къэхъунущ жаIэурэ нэхъапэм щыгъуэ цIэм макъ «хьэ»-р пагъэувэуи щытащ. Псалъэм папщIэ, Хьэбас, Хьэзешэ, Хьэжбий, ХьэпащIэ. Иджы девгъэплъыт нобэрей ди щIалэгъуалэм я цIэхэм – Ричард, Владик, Радик, нэгъуэщIхэри. АдыгэцIэхэр апхуэдизу тыншу щхьэ дгъэкIуэдрэ? А цIэхэр, дауи, фIэзыщар адэ-анэрщ, атIэ адыгэ адэшхуэ-анэшхуэркъым. Иджы девгъэплъыт ди хъыджэбз цIыкIухэм я цIэхэм. Нэхъапэм нэхъ тегъэщIапIэ ящIу щытар цIыхубзыр щэныфIэу, Iэдэбу, дахэу щытынырщ. Я цIэхэри апхуэдэут зэрыщытыр и нэхъыбэм. Псалъэм папщIэ, Дахэнагъуэ, НэIэфI, Хужь - псоми къагъэлъагъуэр къабзагъэрэ дахагъэрэщ. Абы къыщынэмыщIауэ, муслъымэныцIэхэри къагъэсэбэпырт. Псалъэм папщIэ, Мадинэ, Iэминат, нэгъуэщIхэри. Уегупсысмэ, гъэщIэгъуэнщ икIи къезэгъыу къыщIэкIынукъым иджырей щIалэгъуалэм фIэтщымкIэ жьы хъуа цIыхум уеджэну. Дауэу пIэрэ Араланэ е Полинэ зыфIащам жьы хъуа нэужь зэреджэнур? ЖытIа псори къызэщIэпкъуэжмэ жыIэн хуейращи, зи лъэпкъыр фIыуэ зылъагъу, зи блэкIар зыфIэгъэщIэгъуэн, зи къэкIуэнур япэ изыгъэщ дэтхэнэри къытщIэхъуэ щIэблэм яфIэтщ цIэхэм дакIэлъывгъэплъ. Сабийм и цIэ щыфIэтщкIэ, абыхэм я къыхэхыкIэм икъукIэ гупсэхуу икIи губзыгъэу дыбгъэдэвгъэхьэ. А цIэр абы и гъащIэ псокIэ къызэрыдэгъуэгурыкIуэнур къэплъытэмэ, IупщI мэхъу абы и къыхэхыкIэм икъукIэ гулъытэшхуэ хуэщIын зэрыхуейр. ШЫГЪУШЭ Маринэ.
Поделиться:
Читать также:
19.05.2024 - 13:50 →
ЩIыхь тхылъхэр яритащ
18.05.2024 - 10:48 →
Унагъуэращ Хэкур къыщежьэр
17.05.2024 - 17:37 →
ЗыплъыхьакIуэм и еплъыкIэ
17.05.2024 - 15:35 →
Мазищым кърикIуахэр
17.05.2024 - 12:26 →
КъэкIыгъэхэм я нэIэ тетщ
|