Иджырей мардэм кърагъэтIасэуКъэбэрдей-Балъкъэрым Ухуэныгъэмрэ ЖКХ-мк1э и министерствэм и пресс-IуэхущIапIэм иджыблагъэ къызэритамкIэ, «ФIагъ лъагэ зиIэ гъуэгу шынагъуэншагъэхэр» лъэпкъ проектым ипкъ иткIэ федеральнэ гъуэгуу Аруан, Уштулу къуажэхэр, щIыналъэ гъуэгуу Старэ Шэрэдж, Жэмтхьэлэ, Сукан-Су жылэхэр зэпызыщIэхэр, километри 2,3-рэ зи кIыхьагъыр, мы махуэхэм къагъэщIэрэщIэж. Гъуэгухэм телъ асфальтобетоныжьыр техыным, иужькIэ щIым и щхьэфэр зэгъэзэхуэжыным, гъуэгубгъум къыIут мывэхэр гъэувыным, бгы джабэр гъэбыдэным ехьэлIа лэжьыгъэхэр къанэ щымыIэ зэфIэкIащ. Лэжьыгъэхэр езыгъэкIуэкI IуэхущIапIэм и IэщIагъэлIхэм асфальтобетоныщIэр зытралъхьэну гъуэгум и лъабжьэр иджыпсту ягъэбыдэ, а щIыпIэм хуэзэу щыIэ дэдзыхыпIэхэмрэ лъэмыжхэмрэ къагъэщIэрэщIэж. Абы иужькIэ къапэщылъщ асфальтобетоныщIэ къатит1у тралъхьэну, гъуэгу зэхыхьэпIэхэм, зэхэкIыпIэхэм деж асфальт тралъхьэну, гъуэгубгъухэр ягъэбыдэну. АдэкIэ, гъуэгум щызекIуэхэм я шынагъуэншагъэр къызэрагъэпэщын мурадкIэ гъуэгубгъухэм автомобиль дамыгъэхэр, къэухьхэр щагъэувынущ, ахэр къыхагъэщхьэхукIынущ. Апхуэдэуи «ФIагъ лъагэ зиIэ гъуэгу шынагъуэншагъэхэр» лъэпкъ проектым ипкъ иткIэ Налшык къалэ и Къэбэрдей уэрамми лэжьыгъэшхуэхэр щрагъэкIуэкI. Километр 1,3-рэ зи кIыхьагъ гъуэгур нэхъ бгъуэ иджыпсту ящIащ, абыи и лъабжьэр ягъэтIылъащ, лъэс зекIуапIэхэм ябгъухэмрэ гъуэгухэмрэ мывэхэр кърагъэтIылъэкIащ, уэздыгъэхэр зыпадзэну пкъохэр здэщытыну щIыпIэхэр къыхагъэщхьэхукIащ. Абы къыдэкIуэу, инженер коммуникацэхэр ягъэIэпхъуащ, гъуэгур зэрызэрагъэзэхуэж асфальтым и япэ къатыр тралъхьащ. Абы етIуаунэ къатри къыкIэлъыкIуэнущ, гъуэгухэр иджырей уэздыгъэхэмкIэ къагъэнэхунущ, автобус къэувыIэпIэщIэхэр ягъэувынущ, гъуэгу зэпхрыкIыпIэхэр къыхагъэщхьэхукIынущ, дамыгъэхэр, къэухьхэр ягъэувынущ. Гъуэгу лэжьыгъэхэр зэфIагъэкIыну я мурадщ жэпуэгъуэм ирихьэлIэу.
Поделиться:
Читать также:
19.05.2024 - 13:50 →
ЩIыхь тхылъхэр яритащ
18.05.2024 - 10:48 →
Унагъуэращ Хэкур къыщежьэр
17.05.2024 - 17:37 →
ЗыплъыхьакIуэм и еплъыкIэ
17.05.2024 - 15:35 →
Мазищым кърикIуахэр
17.05.2024 - 12:26 →
КъэкIыгъэхэм я нэIэ тетщ
|