Губгъуэ лэжьыгъэхэр зэпыуркъым

Къэбэрдей-Балъкъэрым Мэкъумэш хозяйствэмкIэ и министерствэм иджыблагъэ къызэритамкIэ, республикэм и мэкъумэшыщIэхэм гъавэр жыджэру кърахьэлIэж. Иужьрей махуэхэм дунейр зэрыхуэбари сэбэп къахуэхъуащ лэжьакIуэхэм.

Гектар мини 10-м щIигъум нартыху гъавапхъэу тонн мин 65-рэ къытрахыжащ. ХадэхэкI зэмылIэужьыгъуэу тонн мини 175-рэ, кIэртIофу тонн мини 105-рэ. Апхуэдэуи пхъэщхьэмыщхьэхэр къыпач, мэракIуэ лIэужьыгъуэхэри зэщIакъуэж.

Мыдрейуэ, республикэм и мыIэрысэхэр, пхъэгулъхэр, шыгъулдыкъащхъуэр (голубикэ) хамэ къэралхэм ирагъэшэн щIадзащ. Абыхэм я фIагъ ыр къапщытэ «Россельхознадзор»-м и IэщIагъэлIхэм, икIи а IуэхущIапIэм къызэритамкIэ, мыIэрысэу тонн мини 4, пхъэгулъу тонн 1,4-рэ, шыгъулдыкъащхъуэу тонн 400 нобэкIэ къапщытащ. Нэгъабэ и иджы хуэдэ зэманым хамэ къэралхэм ирагъэша мыIэрысэхэмрэ пхъэгулъхэмрэ я куэдагъым хуэдэ 1,5-2-кIэ хагъэхъуащ мы гъэм.

«Тэрчналмэсыр» аргуэру япэщ

Кавказ Ищхъэрэм и щIыналъэхэм ирагъэкIуэкIа «Экспортер года» зэхьэзэхуэм щытекIуахэмрэ абы къыхэжаныкIахэмрэ иджыблагъэ Мэхъэчкъалэ щагъэлъэпIащ.

Промышленность IэнатIэм щызэпеуахэм я деж япэ увыпIэр къыщихьащ Къэбэрдей-Балъкъэрым и «Тэрчналмэс» заводым. Къыхэдгъэщынщи, а IуэхущIапIэм ар и еплIанэ ехъулIэныгъэщ. Иджы «Тэрчналмэсыр» хэтынущ «Экспортер года» урысейпсо саугъэтыр къэхьынымкIэ зэхьэзэхуэм.