Бжьыхьэ гъуэгу лэжьыгъэхэр

«ГъуэгуфI шынагъуэншэхэр» лъэпкъ проектым хиубыдэу зыхуей хуагъэзащ Старэ Шэрэдж - Жэмтхьэлэ - Сукан-Суу гъуэгур. Абы къыдэкIуэу Зэрэгъыж къуажэм лъэс зекIуапIэ щаухуэ.

Жылэр щитIысыкIар щIы захуэу зэрыщытым и фIыгъэкIэ, унэ лъапсэхэр фIыуэ транспорт гъуэгум пэщIэхащ икIи адрей къуажэхэм елъытауэ, куэбжэпэ бгъуфIэхэр яIэщ. Абы къыхэкIыу, лъэс зекIуапIэхэр къуажэдэсхэмкIэ игъуэ дыдэщ. Иджыпсту зи лъабжьэр ягъэхьэзыра гъуэгу Iыхьэхэм асфальтыр тралъхьэ, бетон къэухьхэр ягъэув.

Кавказ Ищхъэрэ щIыналъэ гъуэгу фондым и мылъкум къыхэкIа ахъшэкIэ километри 4 зи кIыхьагъ гъуэгур къагъэнэхунущ. Мы зэманым ирихьэлIэу уэздыгъэхэр зыфIадзэну пкъои 130-рэ, ахэр электрокъарукIэ зыгъэнщIыну трансформатор подстанцу 2 ягъэуващ. Лэжьыгъэхэр бжьыхьэм къриубыдэу и кIэм нагъэсынущ.

2023 гъэр икIыху Шэрэдж щIыналъэм щелэжьынущ гъуэгу километри 10-м. Зэрэгъыж жылэм къищынэмыщIауэ, абы хиубыдэнущ Балъкъэр Ипщэ къуажэм дэт IуэхущIапIэхэм, еджапIэм, мэжджытым екIуалIэ гъуэгухэр.