Ди лъэпкъым и хабзэ дахэхэм ящыщщ зыхуэзэфIэмыкIым, тхьэмыщкIэм дэIэпыкъуэгъу хуэхъуныр. IуэрыIуатэми тхыдэми къыхощыж абыхэм я щапхъэ куэд. Ауэ, ди жагъуэ зэрыхъущи, нобэрей дунейм нэхъыбэу щытлъагъур нэгъуэщIщ, цIыхухэм IэщIыб ящI я адэжьхэм лIэщIыгъуэкIэрэ яхэлъа хьэл-щэныр. ПсапэкIэ ирикъуа щыIэ, хьэмэрэ фIы щIэныр емыкIуу къалъытэу ара? ГурыIуэгъуэкъым цIыхухэр гущIэгъуншэ щIэхъур.
Мы псалъэмакъым щхьэусыгъуэ хуэхъуар иджыблагъэ сызыIууа Iуэхугъуэрщ. Къуажэм кIуэж автобусым ситIысхьэжат. Абдежым псы IэфI птулъкIэ иIыгъыу зы щIалэ гуащIэмащIэ къыIухьащ. Ар ипэмкIэ ис щIалэм елъэIуащ птулъкIэм и щхьэр хутрихыну, ауэ модрейм хъуни-мыхъуни къыжриIакъым. Щымыхъум, машинэм и «бжэ жыпым» дэлъ Iэмэпсымэхэм ящыщ къищтэри, езым Iуихыжыну яужь ихьащ. АрщхьэкIэ и къарур пэлъэщакъым. Абы хэту шофёрхэм ящыщ зы къыIухьащ. «КхъыIэ, си птулъкIэм и щхьэр схуIух», - жиIэри щIалэм абыи зыхуигъэзащ. АрщхьэкIэ адрейми абы и лъэIур къридзакъым, ар зэримылэжьыгъэр губжьауэ къыжриIэри, IуигъэзыкIыжащ. ЩIалэ тхьэмыщкIэм зыкъиплъыхьри, нэгъуэщI хэкIыпIэ щимылъагъум, птулъкIэм и щхьэр дзэкIэ тричыну иужь ихьащ. Ари къыщемыхъулIэм, абы хуэмурэ IуигъэзыкIыжащ. Абдежым автобусым и кIэмкIэ щыс цIыхубзым ипэмкIэ щыс щIалэм зыхуигъэзащ: «Псы птулъкIэм и щхьэр а тхьэмыщкIэм хуIупхамэ, сыт ягъэ кIынт?» - жиIэри. ЩIалэм и жэуапри хьэзырыххэт: «Си хэт сэ ар, зыгуэр хуэсщIэну, хуеймэ и щхьэр ирегъэпсэуж!»
Дызэвгъэгупсысыж: фIы щIэныр благъагъэкIэ, цIыхугъэкIэ зэхадзу ара? «ФIы щIэи, псым хэдзэ», - жиIэкъэ адыгэ псалъэжьым. ГущIэгъуншагъэм нэхъ хьэл мыхъумыщIэ щыIэкъым. Ар узыфэ бзаджэм ещхьщ. Абы ди гъащIэм увыпIэ щеттмэ, дызыхуишэнкIэ хъунур уи нэгу къыщIэбгъэхьэну шынагъуэщ. ГущIэгъуншагъэрщ зи Iэужьыр апхуэдиз сабий зеиншэ дунейм щIытетыр, жьы хъуахэр щапIыж унэхэр щIыдиIэр. ЩIэблэм илъагъурщ ищIэжынур. АтIэ дэ сыт хуэдэ щапхъэ абыхэм едгъэлъагъур? Дунейр шэрхъщи, мэкIэрахъуэ. Нобэ дызыдэмыIэпыкъуам и пIэ пщэдей е дыкъэзылъхуахэр, е ди бынхэр, е ди къуэш-шыпхъухэр, е дэ езыр дыкъихутэнри хэлъщ. Абы щыгъуэм зыми и Iэ къытхуимышиймэ, хэт абыкIэ дгъэкъуэншэнур? Къуаншэр къыщIэплъыхъуэн щыIэкъым, уи Iуэху дэзымыгъэкIами хущIумытхъуэ. Уэ уи япэкIэ бгъэжа мывэм урихьэлIэжауэ аращ…
Хьэуэ, ищхьэкIэ зи гугъу тщIа щIалитIым хуэдэкъым псори. Тхьэм и шыкуркIэ, щыIэщ иджыри цIыху гу пцIанэхэр, хьэлэлхэр. Абыхэм ящыщщ зэман дэкIыу ди автобусым ипэм деж къэувыжа щIалэм и птулъкIэм и щхьэр хуIузыхар. Хэт ищIэрэ, абдеж ар къыщIыIухьэжам и щхьэусыгъуэри птулъкIэм и щхьэр хуIузымыхахэм нэхърэ нэхъыфI зэрыщыIэр, дунейр цIыху гущIэгъуншэ защIэу къызэрызэхэмынар къаригъэщIэну арагъэнт. Дыгугъэнщ апхуэдэ цIыхуфIхэр нэхъыбэу…
Мыр ди гъащIэм щыщ зы теплъэгъуэщ. Апхуэдэ дапщэ дунейм къыщыхъурэ? ГущIэгъуншагъэр икIи нэрымылъагъу Iэщэ шынагъуэщ. Ар «къэзыщтар» цIыху тхьэмыщкIэщ псэкIи акъылкIи.
