Къазмакъыр куэдым и хущхъуэщ

- ГуащIэри IэфIри зыщIэлъ къазмакъыр ди республикэм куэду къыщокI. Ахэр нэхъыбэрэ щыфлъагъунущ псы Iуфэхэм, екIэпцIэ мэз цIырхъхэм, мэз лъапэхэм, ныджэхэм. Ахэр къыпыпчыным зэманышхуэ ехь, зэрыцIыкIу дыдэм къыхэкIыу, арщхьэкIэ абы хущхъуэгъуэу бгъэдэлъыр къэплъытэмэ, жыг къуацэм тет банэхэми емылъытауэ, бламыгъэкIым хуэдэщ.

Къазмакъыр гъэгъуауи, гъэвауи, а зэрыщыт дыдэм хуэдэуи пшхыну фIыщ. Ар и хущхъуэщ склероз, артрит узхэм. Къазмакъей лIэужьыгъуэ куэд иджыпсту къыщагъэкIащ Сыбыр щIыналъэм - ар щIыIэ дыдэми (градус 45-м) пэщIэтыфщ, нэхъыбэм IэкIэ къыпач, е жыгыр яутхыпщIри къыпагъэлъэлъ. А къэкIыгъэ телъыджэм и теплъэр, цIыкIущ жумыIэмэ, апельсиным ещхьщ икIи ар къулейщ витаминхэмрэ токоферол, пектин, сахарид, филохинон пкъыгъуэхэмкIэ, урсуловэ, тритерпеновэ кислотахэмкIэ.

Абы хэлъ В-ситостерин пкъыгъуэр щыгъупщэх хъуахэмкIэ хущхъуэшхуэщ. Аращ ныбжь зиIэхэм ар махуэ къэс яшхын щIыхуейр, ауэ щыхъукIэ, а хущхъуэхэр зэрызэхалъхьэ Iэмал куэд щыIэщ.

Къазмакъыр зэрысэбэпыр нобэ къэунэхуауэ аракъым - ар къыхощ ижь-ижьыж зэманым ятха усэхэми Гиппократ и псалъэхэми. Къазмакъыр зэрыкъулей аскорбиновэ кислотам лъыр зэрегъэубыд, лъынтхуэхэр ехъумэ, пыхусыхур, щIыIэ узхэр пщхьэщех, иммунитетыр егъэбыдэ, гу, шхалъэ, нэ, гинекологие, псантхуэ узхэмкIэ сэбэпщ, Iэпкълъэпкъым зэран хуэхъухэр къыхеш, щIыфэм, щхьэцым я щытыкIэр ирегъэфIакIуэ, гукъыдэжыр къеIэт. Апхуэдиз узымкIэ хущхъуэ икIи дэнэ дежи узыщрихьэлIэ а къэкIыгъэр махуэ къэс, фи гум зэрыфIэпихкIэ, фшхы, узхэм защыфхъумэн папщIэ, - хъыбар къыдегъащIэ «ГъавэхэкIхэм я фIагъыр къэзыпщытэ» центрым и Кавказ Ищхъэрэ къудамэм Къэбэрдей - Балъкъэрым щигъэлажьэ IэнатIэм.