ЦIыхум и лъагъуэр цIыкIу щIыкIэ езым къыхехыж. Пасэу зи гъуэгу къэзыгъуэта, зи зэфIэкIыр зыгъэунэхуа, зыхуейр къызыгурыIуа цIыхум ехъулIэныгъэфIхэр зыIэрегъэхьэф, игурэ и щхьэрэ зэтелъу лъэ быдэкIэ гъащIэм хоувэф. Апхуэдэщ нобэ футболым хуэIэкIуэлъакIуэ, щIыналъэ утыкухэм бжьыфIэу щыджэгу, зи цIэр фIыкIэ къраIуэ, Къэрэшей-Шэрджэс Республикэм и «Нарт» футбол командэм и капитан Абидокъуэ Вадим.
Адыгэ щIалэм и ныбжьыр илъэси 9-м иту футболым зыхуигъэсэн щIидзауэ щытащ сабий спорт гъэсакIуэ нэхъыфI Лъэпсырыкъуэ Борис и нэIэм щIэту.
Пэжщ, абы мыкIуэ ипэкIэ, иджыри сабий дыдэу, и ныбжьыр илъэситхум щIигъуа къудейуэ, Ставрополь къалэм дэт, дуней псом щыцIэрыIуэ, Скакун Василий и цIэр зезыхьэ акробатикэмкIэ еджапIэм илъэситIкIэ кIуауэ щытащ, а спорт лIэужьыгъуэм хуагъасэу. Абы щыгъуэм щIалэ цIыкIур зыхэта зэпеуэхэм япэ увыпIэ фIэкIа къыщихьакъым.
ИужькIэ, Черкесск къалэм дэт, ГимнастикэмкIэ олимп резервхэр щагъэхьэзыр еджапIэ-гъэсапIэм ящтэри, ехъулIэныгъэфIхэр къыщигъэлъагъуэу щыIащ, зэхьэзэхуэхэм япэ-ещанэ увыпIэхэр къыщихьу.
Ауэ, зэрыцIыкIу лъандэрэ топым бгъэдыхьэкIэ хэха хуиIэт Вадим. И гуращэ нэхъыщхьэр - футболымкIэ утыку инхэм щыджэгунрат…
Черкесск къалэм дэт 2-нэ курыт еджапIэм е 8-нэ классыр къиухри, Вадим и зэфIэкIым хигъэхъуэну Ставрополь олимп резервхэр щагъэхьэзыр и еджапIэ цIэрыIуэм щIэтIысхьащ. ЕджапIэр къиуха нэужь, а IуэхущIапIэ дыдэм и училищэми (СУОР) щеджэжащ, футбол классымкIэ IэщIагъэ зригъэгъуэтащ.
Иджыри СУОР –м щеджэу Абидокъуэр щыджэгуащ езы училищэм и командэм, пIалъэ кIыхькIэ щытащ командэм и капитану. Ставрополь къалэм и командэ нэхъыщхьэм - «Динамо»-м - хэту, и ныбжьыр илъэс 17-м нэса къудейуэ, урысейпсо зэпеуэм пашэныгъэ къыщахьауэ щытащ, икIи а крайм и чемпионатым «Футболист нэхъыфI» щыхъуащ.
Илъэс бжыгъэкIэ Вадим и зэфIэкI щигъэлъэгъуащ, щытхъуи щиIащ Пятигорск и Машук-КМВ командэм.
ИужькIэ, Къэрэшей-Шэрджэс Республикэм футболыр зи щIасэхэр илъэс 20 хъуауэ зыщIэхъуэпсар – республикэм профессиональнэ командэ иIэныр - хэгъэгум и Iэтащхьэм и фIыщIэкIэ къыщагъэщIэрэщIэжым, япэ дыдэ абы щыджэгуну кърагъэблэгъахэм ящыщщ Абидокъуэ Вадим, занщIэуи командэм и капитан хъуну дзыхь кърагъэзащ.
Щыуатэкъым къызэгъэпэщакIуэхэр Абидокъуэм хуащIа дзыхьымкIэ. Пэжщ, футболыр командэ псом я къару щагъэлъагъуэ джэгукIэщ. Ауэ, къызэгъэпэщакIуэ зэчий ин зыбгъэдэлъ капитан, пашэ уиIэныр уасэншэщ. Апхуэдэщ Вадим.
Футбол джэгупIэ утыкум КъШР-м и профессиональнэ командэ зэримыхьэрэ илъэс 20 дэкIауэ, 2023 гъэм накъыгъэм и 31-м республикэм и стадион къагъэщIэрэщIэжам III дивизионым Кавказ Ищхъэрэ, Ипщэ - щIыналъэхэр къызэщIэзыубыдэ чемпионатыр щекIуэкIауэ щытащ.
А махуэм Къэрэшей-Шэрджэсым и «Нарт» командэ цIэрыIуэм и япэ джэгугъуэр дригъэкIуэкIат Каспийск къикIа «УОР-Дагестан»-м. ИкIи стадионым ис цIыхухэм, футболыр зигу къэкIахэм я Iэгуауэ иным щIэту, «Нартым» 4:2-уэ текIуэныгъэр къихьауэ щытащ...
Мазитхум къриубыдэу екIуэкIащ футбол командэ 16 щызэпэщIэта чемпионатыр. Зыми къыхимыгъэщIауэ, кIэух джэгугъуэм нэсащ. Абы икIын папщIэ зыпэщIэувар Ростов областым хыхьэ Каменск-Шахтинск къалэм и «Строитель» командэрат.
Финал ныкъуэм ахэр щызэпэщIэхуагъэххэт, «Нартым» абдеж япэ дыдэ текIуэныгъэр щыфIахьат.
Жэпуэгъуэм и 14-м Черкесск щекIуэкIащ мы командитIым я етIуанэ зэпэщIэтыныгъэр. Ар финалрат.
ЖыпIэнурамэ, «Нартыр» псэемыблэжу джэгуащ, футболыр зи щIасэхэм Iэгуауэ мыухыжкIэ яIэтащ фIыуэ ялъагъу командэм и дэтхэнэ ехъулIэныгъэри. Апхуэдэт, мы зэдэджэгугъуэм «Нартым» и футболистхэу командэм и капитан Абидокъуэ Вадимрэ ебгъэрыкIуэ Къурашын Азэмэтрэ дахуа топитIыр.
ЗэпэщIэтыныгъэр 2:2-уэ иухами, ипэкIэ къызэрыхагъэщIауэ щыта бжыгъэр «Нартым» зэран къыхуэхъуащ… Арами, чемпионатым япэ-етIуанэ увыпIэхэр къыщызыхьа командэхэр етIуанэ Лигэм щыджэгуну Iэмал къратащ.
«Нартым» и капитан Абидокъуэ Вадим куэдкIэ узыщызыгъэгугъ футболист щIалэщ. Ди гуапэщ ди лъэпкъэгъу щIалэм и мурадхэр къехъулIэну, «Нартыр» утыку нэхъ инхэм иришэну.
