Спорт хъыбархэр

Атлетикэ хьэлъэ

Зэрылъэщыр къагъэлъагъуэ

Мейкъуапэ къалэм и «Уэщтэн» спорт комплексым иджыблагъэ щекIуэкIащ Урысей Федерацэм атлетикэ хьэлъэмкIэ пашэныгъэр къыщыхьыным хуэунэтIауэ щIалэгъуалэм я зэхьэзэхуэ. Абы гупитIу гуэшауэ щызэпеуащ илъэс 15-18, 19-20 зи ныбжь спортсменхэр.

 
Къэбэрдей-Балъкъэрым и гъэсэнхэм зэхьэзэхуэм медалитху къыщахьащ. Гулиев Тамерлан килограмм 73-рэ зи хьэлъагъхэм я деж щытекIуащ, рывок, жим лIэужьыгъуэхэмкIэ зэхэту килограмм 289-рэ (132/157) къиIэтри. Ширдий Ислъам япэ щыхъуащ килограмми 109-рэ хъухэм я деж. Абы къиIэтащ килограмм 340-рэ (150/190). Килограмми 109-м щIигъу зи хьэлъагъхэм я деж зыри къытекIуакъым Марий Тимур (Мариев)???? – абы рывокымрэ жимымрэ зэхэту килограмм 395-рэ къиIэтащ. Нэгъуей Астемыр домбеякъ медалыр къыщихьащ килограмми 102-рэ хъу гупым хэтхэм я деж. Ди щIалэм зэхэту къиIэтащ килограмм 281-рэ (124/157). 
Къэбэрдей-Балъкъэрым и командэм хэтхэр зыгъасэр Шэкэм Михаилрэ Щауэ МуIэедрэщ. 

Iэпщэрыбанэ спорт

Хъарзынэу зыкъагъэлъагъуэ

Армэ Iэпщэрыбанэ зауэмкIэ «Доным и кубокыр» къэхьыным хуэунэтIа урысейпсо зэхьэзэхуэ Дон Iус Ростов къалэм щекIуэкIащ. Абы щызэпеуащ ныбжьыщIэхэмрэ балигъхэмрэ - псори зэхэту цIыху 300-м нэблагъэ. Ахэр къикIат Ростов, Самарэ, Челябинск, Волгоград областхэм, Ставрополь, Краснодар крайхэм, Къэбэрдей-Балъкъэрым, Дагъыстаным, нэгъуэщI щIыналъэхэми. 

Къэбэрдей-Балъкъэрым щыщу я хьэлъагъ елъытауэ зыхэта гупхэм япэ увыпIэр къыщахьащ Янченкэ Амиррэ ШэрыIужь Уэлийрэ. ЕтIуанэ хъуащ Мэлыхъуэ Тамерлан. Безынэ Алан, Теунэ Алим, Безыр Азэмэт, Гъубжокъуэ Вадим сымэ ещанэщ.
Республикэм и командэм, илъэс 14-15 хъухэмрэ илъэс 16-17-м итхэмрэ я деж щызэуам, ещанэ увыпIэр къихьащ.