Туризмэр ирагъэфIакIуэ

17 декабря, 2023 - 13:49

Мэзкуу къалэм иджыблагъэ щекIуэкIащ «Russian Traveler Awards 2023» лъэпкъ саугъэтыр къэхьыным хуэунэтIауэ «Russian Traveler» («Урысейм зыплъыхьакIуэ») журналым къыхилъхьауэ щыта онлайн-IэIэтым ­къарикIуахэр наIуэ къащIыным теухуа гуфIэгъуэ зэIущIэ. Къэбэрдей-Балъкъэрым щып­сэухэр зыщыгуфIыкIын хъыбар къикIащ ­абы - ди республикэм дипломитI къыхуагъэфэщащ.

Япэ дипломыр къратащ КъБР-м Курортхэмрэ туризмэмкIэ и министерствэм, «Кавказ Gran Turismo» урысей турист проектыр зэригъэхьэзырам щхьэкIэ. ЕтIуанэр къыхуагъэфэщащ Iуащхьэмахуэ къурш уардэм. Абы япэ увыпIэр иратащ «ЩIыуэпсым и ухуэныгъэ» зэпеуэм зэрытекIуам щхьэкIэ. 
Апхуэдэуи  япэ  увыпIэр  ди  республикэм  къратащ «Экскурс-турист лъагъуэхэр» зэпеуэм «Кавказым и налъкъут» гъущI гъуэгу лъагъуэ-хэр егъэфIэкIуэным зэрыхэлIыфIыхьым щхьэ­кIэ. 
Онлайн-IэIэт зэпеуэр мазиплIкIэ екIуэкIащ. Саугъэт зэхуэмыдэхэм щIэбэныну абы къыщагъэлъэгъуат къэралым и щIыналъэ 50-м турист мыхьэнэ зиIэ я ухуэныгъэу е Iуэхугъуэу 500-м щIигъу. 
IэIэтым хэтащ «Russian Traveler» журналым и щIэджыкIакIуэу цIыху мини 3-м щIигъу. 

ХЬЭЩЫКЪУЕЙ  Олег. 

  • 29 просмотров
Поделиться: