Израилым и дзэм Палестинэм щызэрихьэ лейр къагъэувыIэн мурадкIэ, ООН-м ШынагъуэншагъэмкIэ и советым и унафэщI Гутерриш Антониу зэгухьэныгъэм и зимычэзу зэIущIэ зэхишащ дыгъэгъазэм и 8-м. АрщхьэкIэ дунейпсо цIыхубэр аргуэру пикIуэтащ лей зытехьэр Израилрауэ къэзылъытэ США-м. Урысейм къыбгъэдэкIыу зэгухьэныгъэм и утыкум ихьа Полянский Дмитрий (сурэтым) къэпсэлъа нэужь, цIыхухэр щыту Iэгу еуащ.
Хьэрып Эмират Зэгуэтхэм, Урысейм, Китайм ягъэхьэзыра резолюцэм и проектым Газэм щекIуэкI цIыхугъэншагъэр икIэщIыпIэкIэ ягъэувыIэну къигъэувырт. ЗэпэщIэува лъэныкъуитIым гъэру яубыдахэр Iэмалыншагъэ хэмыту яутIыпщыжу, Газэм щызэзэуэныр щагъэтыну иукъуэдийрт абы. Къыхэгъэщыпхъэщ ШынагъуэншагъэмкIэ советым и унафэщI Гутерриш Антониу а IэнатIэм зэрыпэувэрэ гузэвэгъуэшхуэм къиша мыпхуэдэ зэхуэс япэ дыдэу зэрызэхишар. Апхуэдэ хуитыныгъэ Секретарь Нэхъыщхьэм кърет ООН-м и Уставым и 99-нэ статьям, дунейпсо мамырыгъэм зэран хуэхъу Iуэхугъуэр IуагъэкIуэтыныр и щхьэкIэ къэуву япиубыдыну.
«Тхьэмахуийм нэблэгъауэ, Газэмрэ Израилымрэ щекIуэкI зауэм цIыхухэр бэлыхьышхуэ хадзауэ йокIуэкI, - жиIащ Гутерриш утыкум къыщыщыпсалъэм. - ШынагъуэншагъэмкIэ советым хэтхэр фыкъыхузоджэ мы цIыхугъэншагъэ хьэдэгъуэдахэр зэгъусэу къэдгъэувыIэным. Мыр бгъэIэпхъуэ мыхъун, икIэщIыпIэкIэ зэфIэгъэкIыпхъэ Iуэхущ. ЦIыхубэр бэлыхьым къыхэшын хуейщ. Сэ сыщыгъуазэщ Израилым и зауэ Iуэхур ХАМАС-мрэ Палестинэм щыIэ адрей дзэ зэгухьэныгъэхэмрэ иратыж жэуап хуэдэу зэриублар. Ауэ ХАМАС-р къуаншэщ жыпIэу, палестинэ цIыхубэр хьэзабым щIыхэбгъэтын щыIэкъым. ЦIыхухэр гужьеящ. Ахэр мэшынэ, мэбампIэ. Унагъуэхэм яIа псори яфIэкIуэдащ, мазэ бжыгъэ хъуауэ бетон пцIанэм телъу мэжей. Газэм зы дурэш къинакъым, мыбдежым бэлыхьым щыхъума сыхъунщ щыжыпIэфыну».
Урысейм и лIыкIуэр тIэу утыкум къыщыпсэлъащ а махуэм. Резолюцэм щхьэкIэ Iэ яIэтын ипэкIэ, Полянский Дмитрий жиIащ: «МазитI хъуауэ ООН-м ШынагъуэншагъэмкIэ и советым и пщэ дэлъ къалэныр хуэгъэзащIэркъым. Дунейм мамырыгъэр щихъумэну дызыщыгугъ зэгухьэныгъэм Израилым къиувыхьа Газэм зауэр щигъэувыIэфыркъым. Абы и щхьэусыгъуэр зыщ: езым лей зэрихьэу щытми, и щхьэ Iуэху дэкI закъуэмэ, ищIэр хъуауэ къэзыгъэув США-р зыдэщI Израилыр захуэу къилъытэу аращ. НэгъуэщIу жыпIэмэ, ШынагъуэншагъэмкIэ советым и унафэщIыр Iуэхум хагъэIэбэххэркъым. АпщIондэху езы Америкэм псори къегъэгугъэ лъэныкъуитIым я лIыкIуэхэр зэхуигъазэурэ, «щэхуу зэгуригъэIуэжыну». АрщхьэкIэ я IэбэкIэм и Iэужьу зэкIэ тлъагъур Газэ щIыналъэр палестин сабийхэм я кхъэлъахэ зэрыхъуарщ, сымаджэщхэр, школхэр, щтапIэ ихьэжыпIэхэр лагъымкIэ зэрызэтракъутарщ. Иджы хъыбарыщIэу къэIуари щIыдгъужынщ: Израилым зегъэхьэзыр Палестинэм и щIыунэхэм тенджызыпс иригъэлъэдэну, апхуэдэ щIыкIэкIэ хьэрып дзэ зэгухьэныгъэхэм яхурикъуну. Абы иужькIэ а щIыпIэм ущыпсэу мыхъужыххэну аращи, ар цIыхум кIэлъызэрахьэ хабзэншагъэ дыдэщ».
Хьэрыпыбзэ зыщIэ урысей лIыкIуэм и къэпсэлъэныгъэм и кIэм Палестинхэм щыщхэм я анэдэлъхубзэмкIэ захуигъэзащ, я гузэвэгъуэр зэрызыхащIэр, къаугъэр къызэрыхъейрэ къадэщI ди къэралым лъэкI къызэримыгъанэр ягуригъаIуэу.
Резолюцэм папщIэ Iэ яIэта нэужь, ШынагъуэншагъэмкIэ советым хыхьэ къэрал I5-м щыщу I3-р а мамырыгъэр зыгъэнэхъапэ дэфтэрымкIэ арэзы хъуащ, Великобританием Iэ иIэтыххакъым, США-м унафэр къимыщтэу, «вето» жыхуаIэ мыдэныгъэр къигъэлъэгъуащ.
«Мис, мамырыгъэм хуэгъэпса унафэм аргуэру гущIэгъуншэу пэщIэувэри, США-м щыщ ди гъусэхэм Палестинэмрэ Израилымрэ щыпсэу цIыху минхэм укI тезыр тралъхьэнымкIэ арэзы хъуащ, цIыхубзхэри сабийхэри яхэту. Абыхэм ящIам къикIыр тхыдэм къигъэлъэгъуэжынщ, - жиIащ Полянскэм етIуанэу къыщыпсалъэм. – Ауэ сэ шэч къытесхьэркъым мы ди IэIэтым кърикIуар США-ми Инджылызми щыпсэу цIыху къызэрыгуэкIхэм я гум мастэу зэрыхэуам. Ди жагъуэ мэхъу унафэ ткIий иукъуэдииным и пIэкIэ, ШынагъуэншагъэмкIэ советым аргуэру къыхуеджэныгъэ къудейкIэ Iуэхур зэриухар. Абы къегъэлъагъуэ ар захуагъэм пэщIэува США-м и жыIэ зэрыщIэтыр».
Мы зэпэщIэтыныгъэр къызэрыхъеижрэ, япэ махуэм щегъэжьауэ Урысейм псоми ягу къегъэкIыж илъэс куэд ипэкIэ Палестинэ къэрал щхьэхуэ яухуэну унафэ къащтауэ зэрыщытар. А еплъыкIэм зэгуигъэпа Израилым и премьер-министр Нитаньяху Биньямин дыгъэгъазэм и 10-м Урысейм и Президент Путин Владимир зыкъыпищIэри, дакъикъэ 50-кIэ къепсэлъащ. ГурыIуэгъуэщ еплъыкIэкIэ узэтехуэ-узэтемыхуэм емылъытауэ, къэралхэм я зэхуаку хабзэ зэрыдэлъыпхъэр. Мыбдежми щхьэж и Iуэху бгъэдыхьэкIэм къытенэжащ. Ауэ зы гугъэ щыIэщ: Америкэм Израилым унафэ хуищIащ иригъэкIуэкI псори дыгъэгъазэм, илъэсым и кIэм нигъэсыну.
Палестинэм щыщу щтапIэ ихьэжхэр дуней хъурейм зэрыщызэбграшыр нобэ дэри долъагъу. Абыхэм ящыщхэр Дагъыстэнми, Шэшэнми, Ингушми, Къэбэрдей-Балъкъэрми къашащ. Шэч хэлъкъым къэрал IуэхущIапIэхэми гущIэгъу зыхэлъ цIыху щхьэхуэхэми а тхьэмыщкIэхэм зэрызыщIагъэкъуэнум, гъащIэ зиIэр къелынущ. Ауэ езыхэм фIыуэ къагуроIуэ езыхэм я Хэкум зэрамыгъэзэжынур, а къыздрахуа щIы кIапэр аргуэру Израилым зэрызэрипхъуэнур.
Налшык къаша цIыху 86-м бысымхэр гумащIэу ябгъэдохьэ. Къэбэрдей-Балъкъэрым и Правительствэми, УФ-м и МЧС-м и къудамэу КъБР-м щыIэми, Муслъымэнхэм я IуэхущIапIэми, цIыху щхьэхуэхэми зыхуей хуагъазэ щхьэхуимыту хьэщIэ тхуэхъуахэр. Абыхэм ящыщу 38-р сабийщ, 48-р балигъщ. ИджыкIэ щыгъын хуабэхэр зэхуахьэсын яухащ, адэкIэ щхьэхуэу зыхуэныкъуэ хьэпшыпхэр къыхуащэхунущ. МылъкукIэ ядэIэпыкъуну хуейм 8-963-165-17-97 телефоным пыщIа картэм ахъшэ иригъэхьыфынущ.
Дыгъэгъазэм и 13-м хъыбар къэIуащ ООН-м и Ассамблее Нэхъыщхьэм ищхьэкIэ зи гугъу щытщIа, Палестинэм зауэр икIэщIыпIэкIэ щагъэувыIэным зэрытригъэчыныхь унафэр къызэрищтам теухуа хъыбар. Къэрали 153-м арэзыуэ Iэ яIэтащ, 23-м яIэтыххакъым, иджыри къэралипщIыр, США-мрэ Израилымрэ яхэту, адрейхэм япэщIэуващ.
