ЩIымахуэм дощIэращIэ

Налшык и гъущI гъуэгу станцым и Iэгъуэблагъэр къызэрагъэщIэрэщIэжрэ куэд щIакъым. 1813 гъэм ящIа унэр, зэрыфлъагъущи, и архитектурэ гъэпсыкIэкIэ псоми къащхьэщокI. А лъэхъэнэм яухуа дэтхэнэми хуэдэу, абы и теплъэр зэманми дэкIуэдакъым – лъабжьэ быдэмрэ пасэрей чырбыш плъыжьым бгъэдэлъа быдагъымрэ я къалэныр нэсу ягъэзэщIащ - сыт хуэдэ дуней къэхъукъащIэми пэщIэтыфащ. Апхуэдэу фIыщIэншэу къэбгъанэ хъунукъым совет лъэхъэнэм апхуэдэ архитектурэ фэеплъхэм гулъытэшхуэ хуащIу зэрыщытари - ахэр къекIуэкIащ къэрал IуэхущIапIэхэм я хэщIапIэу. Аращ хъума щIэхъуари.

 Налшык и блэкIар къызыхэщ сурэтыжьхэм гъущI гъуэгу станцыр а зэрыщыта дыдэм хуэдэу щыдолъагъу, екIуу зехьа унэ кIыхь дахэм и гупэр розэ гъэгъахэм щIауфэу. А утыкур нобэм къэси розэншэ ящIакъым. АрщхьэкIэ иужьрей лэжьыгъэхэм къадэкIуэу, мафIэгу къэувыIэпIэм и утыкум зэхъуэкIыныгъэ щхьэхуэхэр иратащ, мы зэманым зекIуэ гъэпсыкIэхэм нэхъ пэгъунэгъуу. ЖыпIэнурамэ, апхуэдэ Iуэху бгъэдыхьэкIэм а щIыпIэм нэхъ теплъэ Iей иритауэ къыпхуэмылъытэну щIэщыгъуагъ, щIэрыщIагъ хилъхьащ: алэрыбгъум хуэдэу иубгъуа удзыпцIэм гъэпсыкIэ щхьэхуэм тету щыхаса щхъуантIагъэхэр куэд хъуркъым. Абы ихъуреягъыр нэхъ Iэхуитлъэхуит зэуэ ищIащ, цIыхухэми зекIуапIэ нэхъыбэ къахуэнэу. Удз гъагъэхэсапIэ инышхуитIым я зэхуакухэр плиткэкIэ къращIыкIащ абдежхэм щагъэува тетIысхьэпIэхэм уекIуэлIэну тыншу. ЩIыпIэр нэхъапэм утыку къудейуэ щытамэ, иджы лъэс зекIуапIэ хуит хъуащ, уэздыгъэ дахэхэмкIэ къэгъэнэхужауэ.

ГипскIэ гъэщIэрэщIа пкъохэмрэ гранит дэкIуеипIэ Iэбыдэлъэбыдэхэмрэ къагъэщIэрэщIэжащ, иджыри илъэс куэдкIэ къалэр зэрагъэдэхэнум шэч хэмылъу. Станцым и гупэм къит гъуэгу зэхэкIыпIэм и лъэс зекIуапIэхэри (Лениным и проспектыр щиухым хуэзэу) дахащэу къагъэщIэрэщIэжащ, гъущI гъуэгу станцым и утыкум пищэ щIыкIэу.

А псори зэкIэ щIиуфащ щIышылэм и уэсым. Гъатхэм къыщIэщынущ бжьыхьэ лэжьыгъэхэм зэтраIыгъа щхъуантIагъэхэм я дахагъэ псори.

ЖАНХЪУЭТ Дисэ.