Япэ махуэхэм щыщIэдзауэ нартыху жылэхэр ящэ

Илъэс къэс Къэбэрдей-Балъкъэрым нартыху жылэ нэхъыфIхэм хуэдэу тонн мин 15 къыщыщIагъэкI. Жылэхэр зэмылIэужьыгъуэ куэд зэрыхъум къыхэкIыу, Урысей Федерацэм и щIыналъэ куэди, нэгъуэщI къэралхэри къыщIоупщIэ, ящэху.

Нэхъыбэр здрагъашэр Ростов, Воронеж, Белгород, Самарэ, Нижегородск, Ульяновск, Пензэ, Смоленск, Рязань, Томск, Омск, Свердловск, Иркутск областхэрщ, апхуэдэуи Татарстаным, Башкортостаным, Удмуртием, Мордовием ящэху. Беларусь Республикэми хуабжьу щIэупщIэ щиIэщ ди нартыху жылэхэм.

2023 гъэм ди республикэм и жылэгъэкIхэм къэралым и мэкъумэш IэнатIэм нартыху жылэу тонн мини 8,5-рэ хуагъэхьэзыращ, апхуэдэуи хамэ щIыпIэхэм ирагъэшащ тонн мини 3. Абы и нэхъыбэр здашар Беларусь Республикэрщ.

Къэбэрдей-Балъкъэрым и жылэгъэкI IэнатIэхэм нартыху жылэ нэхъыбэ дыдэ щащэ пIалъэщ илъэсым и япэ мазищыр. 2024 гъэри апхуэдэу щIидзащ. Япэрей лэжьэгъуэ махуипщIым къриубыдэу жылэ тонн мин 500 зращэнухэм гурыIуакIэщ, абы щыщу фитосанитар сертификаткIэ тонни 160-р - Беларусь, адрейхэр карантин сертификаткIэ Москва, Свердловск, Белгород, Воронеж областхэм яшэнущ.

Россельхознадзорым и Кавказ Ищхъэрэ щIыналъэ управленэм и лэжьакIуэхэр зыкIэлъыплъыр гъавэм и карантин, фитосанитар щытыкIэм и закъуэкъым, атIэ нартыху жылэм и фIагъри лIэужьыгъуэхэр зыхуэдэхэри къапщытэ. 

Иджыпсту нартыху жылэм и щэгъуэщ.

Къэбарт Мирэ.