Яшхыни ящIэни щагъуэт

Ди къэралыр санкцэхэмкIэ дакъузэми, Къэбэрдей-Балъкъэрым абы и ныбжь къытридзэми, хэгъэгум и макроэкономикэм зеужь. Ар, шэч хэмылъу, къызыпэкIуэр  Урысей Федерацэм и Президент Путин Владимир, УФ-м и Правительствэр, федеральнэ министерствэхэр щIыналъэхэм зэпыу имыIэу зэрадэIэпыкъурщ,  республикэм ис цIыхухэм я лэжьыгъэрщ, къэрал къулыкъущIапIэхэм щрагъэкIуэкI Iуэхухэрщ.  

2023 гъэм КъБР-м и экономикэ зыужьыныгъэр къапщтэмэ, псори зэхэту сом мелард 240-рэ и уасэ  къилэжьащ республикэм, ар 2022 гъэм еплъытмэ, проценти 105-рэ мэхъу. КъыщыщIагъэкIахэм я индексыр проценти  102,4-рэ мэхъу, республикэм щащIауэ, къыщагъэкIауэ ящахэм, цIыхухэм Iуэхутхьэбзэу хуащIахэм сом мелард 60,7-рэ уасэу хуэзащ.

Адрей илъэсхэми хуэдэу, мэкъумэш IэнатIэм хэхъуэ хъарзынэ иIащ. Къэбэрдей-Балъкъэр Республикэм и мэкъумэш IэнатIэм 2023 гъэм къыщалэжьахэм я индексыр проценти 110-м щIегъу, 2022 гъэм елъытауэ. Нэхъ пасэу къызэрабжам тещIыхьауэ, гъавэу кърахьэлIэжар тонн мелуан 1,3-рэ мэхъу, нэгъабэрейм еплъытмэ - проценти 111-рэ. Ари зэи къэмыхъуауэ, мы гъэм а бжыгъэм нэсащ. ХадэхэкIыу тонн мин 461-рэ къыщрахьэлIэжащ ди лъахэм, нэгъабэрейм елъытауэ - проценти 101-рэ. Пхъэщхьэмыщхьэу, мэракIуэхэкIыу тонн 785-рэ кърахьэлIэжащ, нэгъабэ тонн мин 657-рэ къыпачыжауэ аращ. НэгъуэщIу жыпIэмэ, процент 20-кIэ хэхъуащ.  Абы нэмыщIкIэ, жыгыщIэ гектар миным щыхасащ.

2023 гъэм щIы гектар мини 6,4-рэ псы зэрыщIагъэлъадэ IэмалхэмкIэ къызэрагъэпэщащ, 2022 гъэм гектар мини 2 къудейщ апхуэдэу яхузэтегъэпсыхьар.

НэщIэпыджэ Замирэ.