ЗэгурыIуэныгъэ зэращIылIащ

Урысей гвардием Къэбэрдей-Балъкъэрым щиIэ къулыкъущIапIэм и унафэщI, полицэм и полковник Васильев Сергей иджыблагъэ яIущIащ КъБР-м и ЩIалэгъуалэ правительствэм хэтхэм.

ЗэIущIэм кърихьэлIащ КъБР-м и ЩIалэгъуалэ правительствэм и унафэщI Бейтыгъуэн Исмэхьилрэ курортхэмрэ туризмэмкIэ и министр Хьэмыкъуэ Сэлимрэ. Лъэныкъуэхэр тепсэлъыхьащ зэгъусэу утыку къралъхьэфыну Iуэхугъуэхэм, и гугъу ящIащ щIыналъэм къихъуэ щIалэгъуалэр хэкупсэу къэгъэтэджыным ехьэлIауэ яхузэфIэкIыну жэрдэмхэмрэ пэхуэщIэхэмрэ.

«Мы лъэхъэнэм ди пащхьэ къиувэ къалэнхэм ящыщщ ди щIалэгъуалэм я гур щалъхуа лъахэм етауэ гъэсэныр, абы пыщIа лэжьыгъэхэр зэпыу имыIэу егъэкIуэкIыныр. Пэжщ, ди хэгъэгум и къэрал къулыкъущIапIэхэми жылагъуэ зэгухьэныгъэхэми абы хуэгъэпса Iуэхугъуэ куэд къыщыхалъхьэ, икIи ахэр хъарзынэу щагъэзащIэ. Апхуэдэу щыт пэтми, дэ дыхуэныкъуэщ а унэтIыныгъэр цIыхум и тхьэкIумэ имыкIыу изыгъэт жэрдэмхэм, ар гъащIэм щыщ зы Iуэхугъуэу къозыгъащтэ гукъэкIхэм. ЦIыхум и цIыхугъэр къэIэтыныр теухуащ дэтхэнэ зыми, къызыхэкIа лъэпкъ, зэрыпсалъэ бзэ, зэрихьэ дин емылъытауэ. Дэ дыщыпсэу щIыналъэм и щIыдэлъху лъэпкъхэм дунейм и къэгъэщIыгъэ псоми я плъыфэ зэщIэжьыуэмкIэ ухэзыгъэплъэн гуащIэ якъуэлъщ. Дэ ди пщэрылъщ абыхэм я щэнхабзэ беягъ псори къызэщIэIэтыныр, щIалэгъуалэм я псэкупсэ дунейм екIуу икIи езэгърабгъуу хэухуэнэныр. ЩIалэгъуалэ правительствэр щIыщыIэм и зы щхьэусыгъуэщ нобэрей дунейм къигъэув зэхъуэкIыныгъэхэр къэлъытауэ, ипэкIэ плъэ, зэхэщIыкI зиIэ, гъащIэм и лъэныкъуэ псоми нэ жанкIэ хэплъэ ныбжьыщIэхэм гъуэгу етыныр – ахэращ щIыналъэр къызыхуэнэнур, абы и зыужьыныгъэм телэжьэнур. Хэкупсэу гъэсэныр абы и зы пкъыгъуэщ – Хэкум лъагъуныгъэ хузимыIэм укъигъэпэжынукъым, абы и зыузэщIыныгъэми хилъхьэн щыIэкъым. ЩIалэгъуалэм я къэкIуэнум телажьэ IуэхущIапIэхэм, зэгухьэныгъэхэм дадэлэжьэныр къызыхэкIыр аращ. ЗэрыжаIэщи, IитIыр зэрымытхьэщIмэ, зэрыщIэркъым – дызэщIымыгъумэ, тхузэфIэкIынур куэдкIэ нэхъ мащIэщ», – жиIащ Бейтыгъуэн Исмэхьил.

Лъэныкъуэхэр зэгурыIуащ Урысей гвардием щIыпIэхэм щиIэ къудамэхэм щылажьэ щIалэгъуалэм я деж зэрыкIуэнум, Къэбэрдей-Балъкъэрым, Урысейм и адрей щ1ыналъэхэм щыпсэу лъэпкъхэм я тхыдэмрэ щэнхабзэмрэ ехьэлIа Iуэхугъуэхэм теухуа лекцэхэр, Iэнэ хъурейхэр, зэIущIэхэр къызэрыхузэрагъэпэщынум.

«Ди къулыкъущIапIэм гулъытэшхуэ хуещI, мыхьэнэи ирет къыддэлажьэ щIалэгъуалэм я зэхэщIыкIым зегъэубгъуным, зыпэрыт IэнатIэм ехьэлIауэ яIэ есэныгъэм къищынэмыщIауэ, дунейм къыщекIуэкIыр къагурыIуэу, яхуэфащэ уасэ иратыфу гъэсэнми. Си фIэщ мэхъу ди зэIущIэм къыщытпсэлъахэр ахэр зыузэщIын жэрдэм защIэ зэрыхъунур. Псэкупсэ Iуэхугъуэхэм, лIыгъэм и дерсхэм, хахуагъэм и щапхъэхэр къэзыIуэтэж псалъэмакъхэм ди щIалэхэм я зэхэщIыкIым лъэужьышхуэ къызэрытринэнур хьэкъыу сощIэ», – жиIащ Васильев Сергей.

ЗэIущIэм и кIэухым Урысей гвардием Къэбэрдей-Балъкъэрым щиIэ къулыкъущIапIэмрэ КъБР-м и ЩIалэгъуалэ правительствэмрэ зэрызэдэлэжьэнумкIэ зэгурыIуэныгъэ зэращIылIащ.

ЩХЬЭЩЭХУЖ Инал.