Дзюдоист ныбжьыщIэхэм я зэпеуэ

Урысей Федерацэм Къэрал кIуэцI IуэхухэмкIэ и министерствэм и Следственнэ IэнатIэхэр къызэрызэрагъэпэщрэ илъэс 60 зэрырикъум хуэгъэпсауэ дзюдомкIэ зэхьэзэхуэ щекIуэкIащ Налшык къалэм. 
Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым и спорт комплексым щызэхэта зэпеуэм кърихьэлIащ УФ-м и щIыналъэ 15-м я спортсмен ныбжьыщIэ 400-м щIигъу. 
Ар къыщызэIуахым турнирым хэтхэм фIэхъус псалъэкIэ захуигъэзащ къэрал кIуэцI IуэхухэмкIэ министру КъБР-м щыIэм и къуэдзэ – министерствэм и Следственнэ управленэм и унафэщI, юстицэм и полковник Попов Олег 

- Си фIэщ мэхъу мы зэхьэзэхуэхэр республикэм, къэралым я гъащIэм екIуу зэрыхэувэнур, спортсменхэр лъагапIэщIэхэм фыхуэзышэ ирехъу. Зэхьэзэхуэм хэт дэтхэнэми ехъулIэныгъэхэр фиIэну, нэхъ лъэщыр текIуэну! - жиIащ Поповым. 
 Спортсмен ныбжьыщIэхэм псалъэ гуапэхэмкIэ зыхуагъэзащ КъБР-м спортымкIэ и министрым и къуэдзэ Хэжь Зауррэ Къэбэрдей-Балъкъэрым дзюдзомкIэ и федерацэм и президент Емкъж Мухьэмэдрэ. Абыхэм къыхагъэщащ мыпхуэдэ зэхыхьэхэм Хэкум хуэпэжыным, ар фIыуэ лъагъуным укъызэрыхураджэр. Зэхьэзэхуэм и мурадыр дзюдоист нэхъыфIхэр къыхэхынырщ, адэкIэ зэпеуэ нэхъ инхэм хэтын папщIэ. 

Зэпеуэм псори дихьэхыу кIэлъыплъащ. ЩIалэ, пщащэ спортсмен ныбжьыщIэхэм къагъэлъэгъуащ зэрыкъарууфIэр, зэрыIэкIуэлъакIуэр. 
Зэхьэзэхуэм и къызэгъэпэщакIуэхэм текIуахэмрэ къыхэжаныкIахэмрэ иратащ кубокхэр, щIыхь тхылъхэр. Техникэ нэхъыфIым папщIэ дзюдоист ныбжьыщIищым саугъэт лъапIэхэр иратащ.