Узыншагъэм и хъумакIуэхэр ягъэлъапIэ

Къэбэрдей-Балъкъэр Республикэм къэрал кIуэцI IуэхухэмкIэ министру щыIэм и къуэдзэ, полицэм и полковник Бахъуэ Аслъэн  МВД-м и Медико-санитар частым и гупым ехъуэхъуащ Медицинэм и лэжьакIуэм  и махуэм ирихьэлIэу.

- Республикэм къэрал кIуэцI IуэхухэмкIэ министру щыIэ, полицэм и генерал-лейтенант Павлов Василий къыбгъэдэкIыу сынывохъуэхъу фи махуэмкIэ.

Урысей МВД-м къулыкъу щызыщIэхэм я пщэрылъхэр ягъэзэщIэныр куэдкIэ елъытащ лэжьакIуэхэм я узыншагъэм. МВД-м и медицинэ IуэхущIапIэм зэфIех хабзэхъумэхэр я къалэнхэм ехъулIэным хуэхьэзырынымкIэ, езыхэми абыхэм я унагъуэхэмрэ ветеранхэмри я узыншагъэм я нэIэ тетщ. Абы медицинэ дэIэпыкъуныгъэр ярет къалэнхэр щагъэзащIэм, къызэрымыкIуэ щытыкIэхэмрэ IэщэкIэ зэщIэузэда зэныкъуэкъухэр хэту фэбжь зыгъуэтхэм. Абы дэ тщыщ дэхэнэми зыхыдегъащIэ гъащIэм и лъапIэныгъэмрэ фэ къыхэфха IэщIагъэм и мыхьэнэр зыхуэдэмрэ.

Насып, узыншагъэ быдэрэ зэIузэпэщыгъэрэ фиIэну ди гуапэщ, - жиIащ Бахъуэ Аслъэн.

Я къалэнхэр гурэ псэкIэ зэрагъэзащIэм папщIэ, Медицинэ лэжьакIуэм и махуэр зэрагъэлъапIэм и щIыхькIэ, КъБР-м щыIэ МВД-м и ЩIыхь тхылъхэр иратащ медико-санитар частым и лэжьакIуэ зыбжанэм.