ЕгъэджакIуэм и дунейпсо махуэм ирихьэлIэу КъБР-м и Iэтащхьэ КIуэкIуэ Казбек Налшык дэт курыт школ №33-м и медиацентрым щахуэзащ республикэм и егъэджакIуэ нэхъыфIхэм ящыщ куэдым. Зэхуэсым щытепсэлъыхьащ щIыналъэм и егъэджэныгъэ IэнатIэр зэрыт щытыкIэм, ар адэкIи егъэфIэкIуэнымкIэ щыIэ хэкIыпIэхэмрэ Iэмалхэмрэ ягъэнэхуащ.
ЗэIущIэм хэтащ егъэджакIуэхэм я федеральнэ, щIыналъэпсо, щIыпIэ зэпеуэ зэмылIэужьыгъуэхэм щытекIуа, къыщыхэжаныкIа IэщIагъэлIхэр. Апхуэдэхэт Къэшэж Аслъэн, Шэшэн Рузаннэ, Дол Руслан, Жантудуев Рустам, Щэрмэт Мариянэ, Беккиевэ Мёлек, Лукьяевэ Жаннетэ, КъуэщIысокъуэ Каринэ, КIущ Iэсият, Лу Миланэ, Даур Каринэ, Сабешкинэ Ксение, Айшаев Кязим, Щэмырзэ Марианнэ, «КъБР-м и психолого-педагогикэ классхэр» проектым и зэгъэуIуакIуэ Дудкэ Галинэ, егъэджакIуэ ныбжьыщIэ Хьэмыкъуэ Миланэ, егъэджакIуэ унагъуэм я лIыкIуэ Петровэ Иринэ, «Пэрытхэм я зэщIэхъееныгъэ» РДДМ-м Шэрэдж щIыналъэм щиIэ къудамэм и пашэ Мокаевэ Айзэ, Бахъсэн къалэм егъэджэныгъэмкIэ и департаментым обществознаниемкIэ ЕГЭ лэжьыгъэхэм хэплъэ и комиссэм и унафэщI Хьэжы Лерэ сымэ.
КъБР-м егъэджэныгъэмрэ щIэныгъэмкIэ и министр Езауэ Анзор, КъБР-м и Парламентым и депутат Емуз Нинэ, курыт школ №33-м и унафэщI Блэныхь Казбек сымэ къызэхуэсахэр щагъэгъуэзащ республикэм и егъэджэныгъэ IэнатIэр мы зэманым зэрыт щытыкIэм. ЗэрыжаIамкIэ, ди республикэм егъэджэныгъэ IэнатIэм щыпэрытщ IэщIагъэлI мин 18-м щIигъу. Абыхэм ящыщу мини 10,7-р егъэджакIуэщ. ЦIыху мини 3-м щIигъум хуагъэфэщащ Урысей Федерацэм, Къэбэрдей-Балъкъэр Республикэм къабгъэдэкI къэрал дамыгъэхэр, щIыхьыцIэ лъагэхэр.
Республикэм и Iэтащхьэр къыщыпсалъэм къыхигъэбелджылыкIащ егъэджэныгъэ IэнатIэр къэралым иригъэкIуэкI социальнэ политикэм мыхьэнэшхуэ щызиIэ, увыпIэшхуэ щызыубыд Iыхьэу зэрыщытыр. Абы къыхэкIыу IэнатIэм щекIуэкI Iуэхугъуэ псоми, унафэр зэрыщызэрагъакIуэри хэту, гулъытэшхуэ дапщэщи зыхуащIхэм ящыщщ. Ар егъэфIэкIуэным хуэгъэпса хэкIыпIэхэмрэ Iэмалхэмрэ егъэджакIуэхэмрэ къэрал унафэщIхэмрэ сыт щыгъуи зэгъусэу яубзыху.
ЗэIущIэм щыжаIахэм къыдыщIагъуу, къызэпкърахыу зэхуэсым къыщыпсэлъащ егъэджакIуэхэри, я еплъыкIэхэмрэ Iуэху зехьэкIэхэмрэ наIуэ къащIу. ЕгъэджакIуэхэр зытепсэлъыхьа Iуэхугъуэхэм ящыщ куэдым гулъытэ хуищIащ КIуэкIуэ Казбек. Апхуэдэхэщ, къапщтэмэ, дерс нэужьым егъэджакIуэхэм ирагъэкIуэкI класс сыхьэтхэм, IэщIагъэхэм щыхуагъасэхэм, нэгъуэщI лэжьыгъэми улахуэ пэкIуэн зэрыхуейр. Апхуэдэу зэхуэсым къыщыхалъхьащ Анэдэлъхубзэр езыгъэджхэм я урысейпсо зэпеуэм и щIыналъэ Iыхьэм щытекIуамрэ абы къыхэжаныкIахэмрэ КъБР-м и Iэтащхьэм къыбгъэдэкI саугъэтыр зратхэм хэгъэхьапхъэу. Республикэм и Iэтащхьэм къалэн ящищIащ а Iуэхугъуэхэр тэрэз ящIыну. КъинэмыщIауэ, хэплъэнущ унагъуэхэм ядэлэжьэнымрэ психолого-педагогикэ классхэмкIэ центр къызэIухыным и проектым. Абы Iэмал къитынущ республикэм щахуримыкъу психологхэм я бжыгъэм хагъэхъуэну, апхуэдэуи щытыкIэ гугъум ихуа школакIуэхэм дэIэпыкъуныгъэ ягъуэтынущ. Программэм и лейуэ ныбжьыщIэхэм школхэм зэращыдэлэжьэнуми зрагъэубгъунущ. Абы папщIэ еджапIэхэм Iэмал псори яIэщ.
ЩIыналъэм и пашэм гунэс щыхъуащ егъэджакIуэ ныбжьыщIэхэм я зэпеуэ егъэкIуэкIыпхъэу зэрыжаIари, егъэджэныгъэр езыгъэфIакIуэ проектхэм мылъку хуаутIыпщын зэрыхуейри, дзэ-хэкупсэ IуэхухэмкIэ щIэблэм щадэлажьэ центрхэр зыгъэпсэхугъуэ лъэхъэнэм лагерхэм къыщызэгъэпэщыпхъэу къызэрыхалъхьари. Естественнэ щIэныгъэхэр - физикэр, химиер, биологиер - школхэм щезыгъэджхэм я зэфIэкIхэр федеральнэ еджапIэ нэхъыщхьэхэм щыхагъэхъуэну зэраубзыхум, а предметхэмкIэ студентхэр школхэм практикэ къэгъэкIуэным арэзы техъуащ ар.
Зэхуэсым зи гугъу щащIахэм ящыщщ егъэджакIуэхэм я улахуэм адэкIи хэгъэхъуэным, IэщIагъэлIхэр школым ешэлIэнымкIэ политикэм, еджакIуэхэр тхылъхэмкIэ къызэгъэпэщыным ехьэлIахэри. Республикэм и унафэщIым зэрыжиIамкIэ, а унэтIыныгъэхэм ящыщ дэтхэнэми гулъытэ щыхуащI щIыналъэм, абыхэмкIэ ирагъэкIуэкI лэжьыгъэхэм адэкIи жыджэру пащэнущ.
ЕгъэджакIуэхэм фIыщIэ ин хуащIащ республикэм и унафэщIхэм, курыт школыщIэхэр зэраухуэм, щыIэхэр зэрызэрагъэпэщыжым папщIэ. Абы, шэч хэмылъу, егъэджэныгъэм и фIагъыр къеIэт. КIуэкIуэ Казбек къыхигъэщащ 2026 гъэм и кIэух пщIондэ ди республикэм ит школ псори щIэрыщIэу зэгъэпэщыжа зэрыхъунур. УнафэщIхэр йолэжь сабий гъэсапIэхэр зыхуей хуэгъэзэным хуэгъэпса щIыналъэпсо программэми.
ЗэIущIэм и кIэухыу КIуэкIуэ Казбек егъэджакIуэхэм фIыщIэ яхуищIащ къыхалъхьэ жэрдэмыфIхэм папщIэ. Ахэр, дауи, сэбэпышхуэ хъунущ республикэм и егъэджэныгъэ IэнатIэр адэкIи егъэфIэкIуэнымкIэ.
