Германием Iэпхъуа тырку адыгэхэм къатехъукIа, илъэс куэдкIэ нэмыцэ къэралым и «Удзыфэхэр» партым и унафэщIитIым язу лэжьа Оздемир (УанащIэ) Джем иджыблагъэ ерыскъыхэкIхэмрэ мэкъумэшымкIэ министру зэрагъэувам теухуа хъыбар ди газетым тетащ.
Зыпэрыува IэнатIэм зэрыхуэпэжынур, нэгъуэщIу жыпIэмэ, щIыуэпсым и къабзагъым хэлъхьэныгъэ хуищIыныр и гукъыдэжу зэрыщытыр имыбзыщIу, Оздемир Джем министру щытрагъэувэ зэIущIэм лъакъуэрыгъажэкIэ екIуэлIащ.
«Закъыхигъэщын щхьэкIэ зыщысхьыжакъым», - жаIэ къулыкъушхуэ зыIыгъхэм яхуэпсалъэурэ фIэкIа закъыхэзымыгъэщыфхэм. Апхуэдэуи щрет. Гъуэгу хэпшым и щапхъэу укъалъагъун нэхърэ нэхъыфI сыт щыIэ?
Лимузин зэгъэпэщахэмкIэ зэIущIэм къекIуэлIа и лэжьэгъухэм Джем къахэмыщыпIэ иIэтэкъым, абы и данэ пщэдэлъым «къыпыувэрт» къулыкъущIэхэм куэдрэ ядумылъагъу, лъакъуэрыгъажэкIэ уэрамым къыщыбжыхьын папщIэ зыщхьэрумытIагъэу мыхъуну тажыр. Жьы щIыIэм зыщихъумэн папщIэ, Оздемир кIэстум щIыIум бжьыхьэ кIагуэ щIыху къытрилъхьащ. КъызэрыгуэкI цIыхухэм ещхьыныр зэрыфIэмыемыкIур зи фIэщ хъуа цIыхухэм Джем зыкърагъэIащ ищIар ягу зэрырихьамкIэ.
Сэрейм къыщыщIэкIыжым, зыми темыплъэкъукI журналистхэм гу лъатащ Оздемир Германием и президент Штайнмайер Франк-Вальтер кърита министр дэфтэрыр лъакъуэрыгъажэ жыпым зэрырилъхьам.
ЗэрыжаIэмкIэ, Бундестагым премьер-министру тригъэува Шольц Олаф, япэщIыкIэ Бельвю сэрейм кIуэри, и министр гупым я IэнатIэхэр ятригуэшащ. Абы иужькIэ Рейхстагым игъэзэжри, дэтхэнэ зыри и къулыкъум тхьэрыIуэкIэ бгъэдигъэуващ. Рейхстагымрэ Бельвю сэреймрэ я зэхуакум I километррэ метр 600-рэ дэлъщ. А гъуэгуанэр лъакъуэрыгъажэкIэ зэпызыупщIа Оздемир гъуэгум тригъэкIуэдар дакъикъи 7- м щIигъущ.
Меркель Ангелэ и пIэ къиува премьер-министрыщIэ Шольц Олафи абы и унафэ щIэт адрей министрхэри, зэрыгурыIуэгъуэщи, зэрызекIуэр шофёр зыдэс я машинэ лъапIэхэмкIэщ.
НэхъапэIуэкIэ транспортымрэ бжыгъэр зи тегъэщIапIэ IэмэпсымэхэмкIэ министру зэрыщытам къыхэкIыу, Оздемир, Шольц Олаф иухуэ правительствэщIэми а IэнатIэр къыщыIэрыхьэн я гугъащ. ЕрыскъыхэкIхэмрэ мэкъумэш IуэхухэмкIэ министр IэнатIэр Хофрейтер Антон нэхъ хуагъэфащэрт. Ауэ зи насып кърихьэкIар илъэс 55-м ит ди лъэпкъэгъурщ.
Фигу къэдгъэкIыжынщи, Оздемир Джем и адэмкIэ адыгэщ. Ар Адыгейм къэкIуауэ щытащ, Германием щыIэ Адыгэ Хасэхэми ядолажьэ, шыр зи щIасэхэми ящыщщ. Нэмыцэ къэралыр адыгэш щызэрахуэ къэралибгъум язщ. Уеблэмэ Груссельберг къалэм «Шагъдий» и цIэу журнал къыщыдагъэкI. МэкъумэшымкIэ министрхэм ящыщу адыгэшыр нэхъыфIу зылъагъур куэд дэмыкIыу къэтщIэну къыщIэкIынщ.
