Iулъхьэ стыркъым, Iулъхьэ къеIысхыркъым

Апхуэдэ къыхуеджэныгъэм щIэт Iуэхум хыхьэу Прохладнэ районым и полицэм и лэжьакIуэхэм зэIущIэ зыбжанэ ирагъэкIуэкIащ.
Урысейм и МВД-м Прохладнэ районымрэ Прохладнэ къалэмрэ балигъ мыхъуахэм ядэлэжьэнымкIэ щаIэ къудамэхэм я инспекторхэм къыхуеджэныгъэ лэжьыгъэ купщIафIэхэр утыку кърахьащ Коррупцэм пэщIэтыным хухэха махуэм ирихьэлIэу.
Коррупцэм ехьэлIа къэрал унафэхэмрэ ахэр гъэзэщIа зэрыхъумрэ зэрыт тхылъымпIэхэр шофёрхэм щыхуагуэша рейдхэм я мызакъуэу, абыхэм еджапIэ зэмылIэужьыгъуэхэм щрагъэкIуэкIащ «Iулъхьэ стыркъым! Iулъхьэ къеIысхыркъым!», «Корупцэм сэрэ ди гъуэгу зыкъым», «Коррупцэм узэрыпэщIэтыфыну зы Iэмалщ абы зыщахъумэну цIыхухэр къыхуебджэныр» зи фIэщыгъэ лекцэхэр. Абы хыхьэу къызэхуэсахэм гурагъэIуащ «коррупцэ», «Iулъхьэ», «Iулъхьэ зыIэпызыххэм я дэлэл» псалъэхэм къарыкIыр, а IуэхухэмкIэ къыщIэхуахэм къэралым жэуап зэрыригъэхьыр.
Лекцэм и кIэухыу ныбжьыщIэхэм я упщIэхэм жэуап иратащ полицэм и лэжьакIуэхэм. Балигъ мыхъуахэм ядэлэжьэнымкIэ инспекторхэм къыхагъэщащ зи гугъу ящIа Iуэху мыхъумыщIэхэм кърикIуэнкIэ хъунур ныбжьыщIэхэм къагурыIуауэ къызэралъытэр, ар я упщIэхэм IупщIу къызэрыхэщар.

Урысей МВД-м и Къэбэрдей-Балъкъэр къудамэм и пресс-IуэхущIапIэ.
Поделиться: